Ọrivẹ ri Pita 2:1-22
2 Ẹkẹvuọvo, emraro rẹ efian da je vwomaphia vwẹ ohri rẹ ihwo na kirobo rẹ iyono rẹ efian je cha vwomaphia vwẹ ohri rẹ ovwan. Enana cha bẹbẹ vwẹ ẹko re sua ohra vwo mu, ayen me tobọ sen onini rọ dẹ ayen. Ọnana cha nẹrhẹ ayen so oghwọrọ kẹ oma rayen kpakpata.
2 Vwo kpobarophiyọ, ihwo buebun cha vwẹrokere iruemu ra ghẹmrẹ* rayen, a me rhe ta erharhe eta kpahen idjerhe rẹ uyota na fikirẹ ayen.
3 Vwọba, kidie nẹ ayen vwo urhuru, kẹ ayen cha vwẹ eta rẹ ophiẹnvwe vwọ ghwa ovwan re, ẹkẹvuọvo ẹdjọeguo rayen re brorhiẹn rọyen phiyotọ ọke grongron rhire na che gbeghẹrẹ-ẹ, oghwọrọ rayen muẹro.
4 Vwọrẹ uyota, Ọghẹnẹ siomauko ro vwo jẹ oja egbe vwọ kẹ emekashe ri ru umwemwu na-a, ẹkẹvuọvo o do ayen phiyọ Tatarọs,* ọ da vwẹ ejọnrọn kanre ayen phiyọ ebri hwi vwọ hẹrhẹ ẹdjọeguo.
5 O ji siomauko ro vwo jẹ oja egbe vwọ kẹ akpọ awanre na-a, ẹkẹvuọvo, o sivwin Noa, ohwo ro ghwoghwo ophiọnphiọn, vẹ ihwo ighwrẹn efa, ọke rọ vwọ reyọ oghwe vwọ ghwọrọ akpọ rẹ irumwemwu na.
6 O brorhiẹn hwe irere ri Sodọm vẹ Gomora, ọ da torhẹ ayen hirhephiyọ iwurhie. Ọnana udje rẹ obo re cha phia kẹ irumwemwu.
7 O sivwin Lọt rọ dia ọvwata, rẹ ofu djeri mamọ fikirẹ uruemu ra ghẹmrẹ* rẹ ihwo ri jurhi ẹyọnrọn na,
8 kidie kẹdi kẹdẹ yen ivun vwo miovwo ọvwata yena fikirẹ jurhi ẹyọnrọn rọ mrẹ, ro ji nyo kpahan ọke rọ vwọ hẹ ohri rayen.
9 Ọtiọyena, Jihova* riẹn obo rọ wan sivwin ihwo re vwomakpahotọ kẹ vwo nẹ ọdavwini, ẹkẹvuọvo, ọ sẹro rẹ ihwo re dia evwata-a vwọ hẹrhẹ ẹdẹ rẹ ẹdjọeguo, rọ cha vwọ ghwọrọ* ayen kufia,
10 ma rho kẹ ihwo re guọnọ gbe oma rẹ ihwo efa ẹgua, ri nẹ ogangan rẹ usuon phovwin.*
Ayen gbaudu ji yinvwaro, oshọ rẹ ayen vwọ ta eta ebrabra kpahen ihwo ri vwo urinrin* mu aye-en.
11 Ẹkẹvuọvo, emekashe ri vwo ẹgba vẹ ogangan vrẹ ayen ta eta rẹ ekan vwọso aye-en fikirẹ ọghọ rẹ ayen muẹ kẹ Jihova.*
12 Ẹkẹvuọvo, eshare nana pha kerẹ eranvwe ri jẹ ọhọ evwo, ri ruẹ nene eroma rayen, re vwiẹre re vwo mu ayen je teyen ayen hwe. Ayen ta eta ebrabra kpahen erọnvwọn rẹ ayen riẹnre-e. Ayen che rhiẹromrẹ oghwọrọ rẹ ayen so kẹ oma rayen,
13 ojaẹriọ kọyen cha dia osaẹhwa rẹ orharhe idjerhe rẹ ayen nene na.
Vwẹ oghẹruvo dede, oma vwerhen ayen rẹ ayen vwo ru ojevwe rẹ ugboma rayen. Ayen pha kerẹ eka kugbe ipe re ghọghọ vwevunrẹ iyono rẹ ophiẹnvwe rayen vwẹ ọke rẹ ayen vẹ ovwan vwọ ria orẹ kuẹgbe.
14 Ẹro rayen vọnre vẹ igberadja egbe, ayen se siobọnu umwemwu-u, ayen je phiẹn ihwo ri mudia ga-an. Ayen vwo ubiudu re yono phiyọ urhuru evwo. Ayen emọ ra hanrhere.
15 Ayen sen idjerhe ọphiọnphiọn na, e de sun ayen ghwru. Ayen nene idjerhe ri Balaam ọmọ ri Biọ ro ru obo re brare kidie o vwo ẹguọnọ rẹ osa ra cha hwa kẹ,
16 ẹkẹvuọvo, a ghwọkuo fikirẹ ogbeku rọyen. Eranvwe ro muẹ eghwa rọ ta ota-a, kọyen vwẹ urhuru rẹ ohworakpọ ta ota kẹ, ọ da dobọ rẹ oyan rẹ ẹkpa rẹ ọmraro na ji.
17 Ayen pha kerẹ ito ri vwo ame-e kugbe evwru rẹ odju ọgangan muẹ, a sẹro rẹ ebri hwi hẹrhẹ ayen.
18 Ayen ta eta rẹ omaẹyan re dia eta ifefe. Ayen reyọ ojevwe rẹ ugboma kugbe iruemu ra ghẹmrẹ* vwọ riẹriẹ ihwo ri ghwe kurhẹriẹ obọ vwọ rhoma ruẹ iruemu echọchọ rẹ ayen siobọnu jovwo re.
19 Ayen ve ive rẹ ugbomọphẹ kẹ ayen, jẹ ayen komobọ eviẹn rẹ umiovwo; kohwo kohwo re phi kparobọ, ọyen ọviẹn vwọ kẹ ọ ro phiro kparobọ na.*
20 Vwọrẹ uyota, ọ da dianẹ ọke rẹ ayen vwọ vrabọ rẹ ẹgua rẹ akpọ na womarẹ erianriẹn ọgbagba rẹ Ọrovwori kugbe Osivwin na Jesu Kristi nu, ayen da rhoma vwobọ vwẹ erọnvwọn nana, ri de ji phi ayen kparobọ, kọyen ẹdia rayen vwẹ ukuko na bra vrẹ ọrẹsosuọ.
21 O rhe yovwin ọ da dianẹ ayen nabọ riẹn idjerhe rẹ ọvwata na jovwo-o vwọ vrẹ ọ rẹ ayen vwọ riẹn nu, ayen da rhoma chukoku iji ọfuanfon ra vwọ kẹ ayen na.
22 Isẹ rẹ uyota nana de ghwe rugba vwẹ oma rayen: “Eranko rọ kpa nu rhoma rhivwin kpo obo rọ kpa phiyotọ, esi ra họ nu rhoma re gbune vwẹ ibehre.”
Eta rehẹ obotọ na
^ Yẹrẹ “iruemu rẹ omavovwẹ kanre.” Vwẹ Grik, a·sel′gei·a, siẹrẹ a da reyọ vwọ ta ota kpahen orọnvwọn rọ vrẹ ọvo. Ni Eta re Vwomaphia.
^ Ni Eta re Vwomaphia.
^ Yẹrẹ “uruemu rẹ omavovwẹ kanre.” Vwẹ Grik, a·sel′gei·a. Ni Eta re Vwomaphia.
^ Ni Eta re Vwomaphia.
^ Vwẹ Grik, “nyavwe.”
^ Yẹrẹ “ri muọghọ kẹ ogangan rẹ usuo-on.”
^ Kọyen, ihwo ri mu eghwa buebun vwẹ ukoko na.
^ Ni Eta re Vwomaphia.
^ Yẹrẹ “iruemu rẹ omavovwẹ kanre.” Vwẹ Grik, a·sel′gei·a, siẹrẹ a da reyọ vwọ ta ota kpahen orọnvwọn rọ vrẹ ọvo. Ni Eta re Vwomaphia.
^ Yẹrẹ “orọnvwọn ro phi ohwo kparobọ yen a dia ọviẹn kẹ.”