Ọrivẹ ri Pita 3:1-18
3 Iniọvo eghanghanre, ọnana yen ọbe rivẹ ri mi siẹ rhe ovwan, kerẹ ọrẹsosuọ na, me reyọ vwọ rhanriẹ ẹgba iroro rẹ ovwan womarẹ ẹkarophiyọ,
2 nẹ ovwan karophiyọ eta rẹ emraro efuanfon na tare* jovwo vẹ iji rẹ Ọrovwori kugbe Osivwin na, rẹ iyinkọn rẹ ovwan vwọ phia.
3 Ẹsosuọ ovwan riẹn ọnana nẹ, vwẹ ẹdẹ re koba na, ihwo re reyọ ihwo vwọ jehwẹ cha rhe vẹ ehwẹjẹ rayen, ayen mi ji ru nene ojevwe romobọ rayen,
4 jẹ ayen ta: “Kẹ ive rẹ ọrhire* rọyen na rhọ? Rhanvwẹ ọke rẹ esẹ avwanre ride vwọ vwerhẹn vwẹ ughwu rhi te ọke nana, erọnvwọn eje jehẹ obo re hepha vwo nẹ ọtonphiyọ rẹ emama rhe.”
5 Kidie ayen vwẹ arogba vwo kuẹrofia kẹ uyota nana nẹ, nẹ ọke grongron rhire yen idjuvwu na vwọ herọ womarẹ ota ro nẹ unu rẹ Ọghẹnẹ rhe, ọyen otọrakpọ na je vwọ va nẹ evunrẹ ame rhe, o de ji mudia kokoroko vwẹ uherevie rẹ ame;
6 womarẹ enana yen a vwọ ghwọrọ akpọ rẹ ọke yena, ọke rẹ oghwe vwo ku.
7 Ẹkẹvuọvo, womarẹ ota vuọvo na yen a vwọ sẹro rẹ idjuvwu na kugbe akpọ na re herọ asaọkiephana vwọ kẹ erhanre bẹsiẹ ẹdẹ rẹ ẹdjọeguo kugbe oghwọrọ rẹ ihwo ri jẹ Ọghẹnẹ ẹriẹn vwo te.
8 Ẹkẹvuọvo, iniọvo eghanghanre, we jẹ ọnana chọrọ ovwan ẹro-o nẹ ẹdẹ ọvo ri Jihova* pha kerẹ ẹgbukpe uriorin, ẹgbukpe uriorin da rha họhọ ẹdẹ ọvo.
9 Jihova* gbeghẹrẹ kpahen ive rọyen kirobo rẹ ihwo evo roro-o, ẹkẹvuọvo o vwo edirin rẹ ovwan, kidie ọ guọnọre nẹ ohwo vuọvo ghwọrọ-ọ, ukperẹ ọtiọyen ọ guọnọre nẹ ihwo eje kurhẹriẹ.
10 Ẹkẹvuọvo ẹdẹ ri Jihova* cha rhe kerẹ oji, rẹ idjuvwu na cha vwọ wanvrẹ vẹ edo rode, ekuakua rehẹ evun rọyen cha tuabọ gangan e me wran, e mi rhe tueghe akpọ na vẹ iruo rehẹ evun rọyen phia.
11 Rọ vwọ dianẹ ekuakua nana ejobi cha wran kufia vwẹ idjerhe ọtiọna na, ovwan gbe roro kpahen oka rẹ ihwo ro fori nẹ ovwan dia. Ovwan vwo uruemu ọfuanfon ji vwobọ vwẹ irueru ri djerephia nẹ ovwan vwomakpahotọ kẹ Ọghẹnẹ,
12 rẹ ovwan vwọ hẹrhẹ ẹcha* rẹ ẹdẹ ri Jihova* je kọn phiyọ ẹwẹn* ọkieje, ra cha wan oma rọyen vwọ vwẹ erhanre ghwọrọ idjuvwu na, ekuakua rehẹ evun rọyen me je wran kufia fikirẹ ọtuabọ ọgangan!
13 Ẹkẹvuọvo kirobo ro veri, avwanre hẹrhẹ idjuvwu kpokpọ kugbe akpọ kpokpọ rẹ erọnvwọn ejobi da cha dia ọsoso.
14 Ọtiọyena iniọvo eghanghanre, ovwan vwọ hẹrhẹ erọnvwọn nana re na, ovwan gba davwẹngba rẹ ovwan ejobi rere ukuotọ rọyen ọ vwọ mrẹ nẹ ovwan vwo oka yẹrẹ upe-e, ovwan ji vwo ufuoma.
15 Vwo kpobarophiyọ, we kere edirin rẹ Ọrovwavwanre na phiyọ usivwin kirobo rẹ oniọvo rẹ avwanre ọghanghanre Pọl ji si rhe ovwan vwo nene aghwanre ra vwọ kẹ,
16 rọ vwọ ta eta kpahen erọnvwọn nana kirobo ro ruru vwẹ ẹbe ro siri eje. Ẹkẹvuọvo, ọ bẹnre re se vwo vwo ẹruọ rẹ erọnvwọn evo rehẹ evun rayen, erọnvwọn nana kọyen igbori* kugbe ihwo ri mudia ga-an chahan, kirobo rẹ ayen ji ru ẹbẹre ri chekọ rẹ Isiesi Ọfuanfon na. Ọnana cha so oghwọrọ kẹ ayen.
17 Ọtiọyena iniọvo eghanghanre, ovwan vwọ riẹn ọnana nure na, we gbe nomaso rere oruchọ rẹ ihwo ri jurhi ẹyọnrọn na vwo jẹ ovwan esuon ghwrẹ vẹ ayen, rere ọyọnregan* rẹ ovwan vwo jẹ ovwan ẹva abọ.
18 Ukperẹ ọtiọyen, ovwan rhophiyọ vwẹ ẹse re muwan rọye-en kugbe erianriẹn rẹ Ọrovwavwanre kugbe Osivwin rẹ avwanre Jesu Kristi. Ọyen a vwẹ urinrin kẹ vwẹ asaọkiephana rhirin bẹdi bẹdẹ. Isẹ.
Eta rehẹ obotọ na
^ Yẹrẹ “erọnvwọn rẹ emraro efuanfon na mraro rọyen phiyotọ.”
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.
^ Vwẹ Grik, “ọrhire.” Ni Eta re Vwomaphia.
^ Ni Eta re Vwomaphia.
^ Yẹrẹ “ji vwo owenvwe ọgangan kpahọn.”
^ Yẹrẹ “ihwo re yonori-i.”
^ Yẹrẹ “emudiagan.”