Ọrivẹ re si Rhe Timoti 1:1-18
1 Pọl, ọyinkọn ri Kristi Jesu womarẹ ọhọre rẹ Ọghẹnẹ, vwo nene ive rẹ arhọ rọ herọ womarẹ Kristi Jesu,
2 vwo rhe Timoti, ọmọ ọghanghanre:
E jẹ ẹse re muwan rọye-en, arodọnvwẹ, kugbe ufuoma ro nẹ obọ rẹ Ọghẹnẹ rọ dia Ọsẹ na kugbe Kristi Jesu Ọrovwavwanre rhe, nene uwe dia.
3 Me kpẹvwẹ Ọghẹnẹ, ohwo re me vwẹ ẹwẹn obrorhiẹn rọ fonro vwẹ ẹga ọfuanfon kẹ kirobo rẹ esẹ mẹ ride ruru, ọkieje yen me vwọ karophiyọ owẹ vwẹ orẹ mẹ, te ason te uvo.
4 Me vwọ karophiyọ ameoviẹ wẹn na, urhuru me vwọ mrẹ wẹ ko si vwe, rere me sa vwọ vọn vẹ aghọghọ.
5 Kidie me karophiyọ esegbuyota wẹn rọ vrabọ rẹ omeru, ra ka mrẹ vwẹ oma rẹ oni wẹn rode Lọis kugbe oni wẹn Yunaisi, ri mi ji vwo imuẹro nẹ wo vwori.
6 Fikirẹ ọnana yen me vwọ karophiyọ owẹ nẹ wo rhe koko erhanre phiyọ okẹ rẹ Ọghẹnẹ ru wo vwori womarẹ abọ re me ghwẹ kpahen owẹ.
7 Kidie Ọghẹnẹ kẹ avwanre ẹwẹn rẹ oshọ-ọ, ẹkẹvuọvo ọ rẹ ẹgba kugbe ọ rẹ ẹguọnọ kugbe ọ rẹ iroro ro fiotọ.*
8 Ọtiọyena, wo jẹ oma vo owẹ wo vwo soseri kpahen Ọrovwavwanre yẹrẹ omẹvwẹ re mu phiyọ uwodi fiki rọye-en, ukperẹ ọtiọyen, re ẹkẹn rẹ oja wẹn fikirẹ iyẹnrẹn esiri na womarẹ ẹroẹvwọsuọ wẹn kpahen ẹgba rẹ Ọghẹnẹ.
9 O sivwin avwanre ji se avwanre vẹ use ọfuanfon, ọ dia fikirẹ iruo rẹ avwanre-e, ẹkẹvuọvo fikirẹ ọhọre romobọ rọyen kugbe ẹse re muwan rọye-en. A kẹ avwanre ọnana womarẹ Kristi Jesu vwẹ ọke grongron rọ wanre,
10 ẹkẹvuọvo asaọkiephana, ọ nabọ teyenphia gbonozẹ womarẹ ẹvwọphia rẹ Osivwin rẹ avwanre, Kristi Jesu, ohwo ro si ughwu no ro de ji dje oborẹ avwanre se vwo vwo arhọ kugbe ugboma ro jegbon womarẹ iyẹnrẹn esiri na kẹ avwanre,
11 fiki rọyen yen a vwọ reyọ ovwẹ vwo mu ohwo ro ghwoghwo kugbe ọyinkọn kugbe oyono.
12 Ọnana yen obo re je suọ re me vwọ rioja rẹ erọnvwọn nana, ẹkẹvuọvo oma vo ovwẹ-ẹ. Kidie me riẹn Ohwo ri mi se gbuyota na, me je vwẹrosuọ nẹ ọ sa sẹro rẹ obo re me vwọ kẹ yọnre rhirin re te ẹdẹ yena.
13 Rhe nene uwan rẹ eta re vọnre vẹ erere ru wo nyo mie vwe kugbe esegbuyota vẹ ẹguọnọ ru wo vwori fikirẹ oyerinkugbe wẹn vẹ Kristi Jesu.
14 Sẹro rẹ erọnvwọn eghanghanre nana ra vwọ kẹ wẹ yọnre womarẹ ukẹcha rẹ ẹwẹn ọfuanfon rọhẹ* evunrẹ avwanre na.
15 Wọ riẹnre nẹ ihwo eje rehẹ ubrakpọ rẹ Esha yanjẹ uvwe vwo, ọtiọyen ji te Figelọs kugbe Hẹmojẹnis.
16 E jẹ Ọrovwori na gbe arodọnvwẹ kẹ evwruwevwin rẹ Onisiforọs, kidie ọ sasa ẹwẹn mẹ vwẹ ọke buebun, oma rẹ ejọnrọn ra vwọ kanre ovwẹ na je vuọ-ọ.
17 Ukperẹ ọtiọyen, ọke rọ vwọ hẹ Rom, ọ nabọ frẹkotọ guọnọ ovwẹ, ọ da mrẹ vwẹ.
18 E jẹ Ọrovwori na ruo rere ọ mrẹ arodọnvwẹ mie Jihova* vwẹ ẹdẹ yena. Wọ je nabọ riẹn iruo eje ro ruru vwẹ Ẹfesọs.