Ọrivẹ re si Rhe Timoti 4:1-22
4 Mi jurhi kẹ wẹ vwẹ obaro rẹ Ọghẹnẹ kugbe Kristi Jesu rọ dia ohwo ro che guẹdjọ rẹ ihwo ri yerẹn kugbe i ri ghwuru womarẹ ẹvwọphia rọyen kugbe Uvie rọyen:
2 Ghwoghwo ota na; ruo vẹ okpakpa vwẹ ọke ro shephiyọ kugbe ọke ro shephiyọ-ọ; ghwọku, vwẹ orhọesio ọgangan phia, bru ihwo uche, ruo vẹ edirin ọgangan kugbe ona rẹ uyono.
3 Kidie ọke cha rẹ ayen rhe che nene uyono rọ vọnre vẹ erere na-a, ẹkẹvuọvo ayen che nene ojevwe romobọ rayen, ayen cha ghwẹ iyono vwo gidi oma, re cha vuẹ ayen oborẹ ayen guọnọ nyo.*
4 Ayen rha cha kerhọ rẹ uyota na-a, ikuegbe rẹ efian kọyen ayen cha kerhọ rọyen.
5 Ẹkẹvuọvo vwọ kẹ wẹ, sẹro rẹ iroro wẹn vwẹ erọnvwọn eje, chirakon rẹ ebẹnbẹn, ghwoghwo iyẹnrẹn esiri na ọkieje,* nabọ ruiruo rẹ odibo egbe wẹn na fiotọ.
6 Kidie e ku vwe kerẹ izobo rẹ udi asaọkiephana, ọke re che vwo siobọnu vwe sikẹre mamọ re.
7 Me họnre omamọ ohọnre na nure, me djonẹ na toba re, me yọnrọn esegbuyota na.
8 Vwo nẹ ọke nana yanran, a sẹro rẹ erhu rẹ ophiọnphiọn vwọ kẹ vwẹ, rẹ Ọrovwori na rọ dia oguẹdjọ rẹ ọvwata cha vwọ hwosa kẹ vwẹ vwẹ ẹdẹ yena, jẹ ọ dia omẹvwẹ ọvo-o, ẹkẹvuọvo ji te ihwo eje ri vwo ẹguọnọ rẹ ẹvwọphia rọyen.
9 Davwẹngba wẹn eje wo vwo bru vwe rhe kẹrẹkpẹ.
10 Kidie Dimas yanjẹ uvwe vwo kidie o vwo ẹguọnọ rẹ eyeren* nana, o kpo Tẹsalonaika re, Krẹsẹns kpo Galesha, Taitọs kpo Dalmesha.
11 Luk ọvo vẹ ovwẹ yen gba herọ. Reyọ Mak nene oma rhe, kidie ọ vwẹ ukẹcha kẹ vwẹ vwẹ iruo rẹ odibo egbe na.
12 Ẹkẹvuọvo, mi ji Taekikọs kpo Ẹfesọs.
13 Wọ da cha, ghwa ewun ekpahen re me yan jovwo vwẹ asan ri Kapọs vwẹ Troas nene oma rhe, kugbe ukpirhin ẹbe na, ma rho kẹ ọ ra vwẹ ophiẹn ru na.
14 Alẹkzanda rọ dia odjogun na ru vwe djadja. Jihova* cha hwosa rẹ obo ro ruru na kẹ.
15 Wo mi ji nomaso kpahọn, kidie ọ vwọso ovuẹ rẹ avwanre na gangan.
16 Vwẹ obọ rẹsosuọ mi vwo gun ẹkẹn unu mẹ, ohwo vuọvo rhe chochọn mẹ-ẹ, ẹkẹvuọvo ayen eje djẹ juvwe vwo—e jẹ Ọghẹnẹ kere ba ayen obọ-ọ.
17 Ẹkẹvuọvo Ọrovwori na mudia kẹrẹ ovwẹ, o de phi ẹgba phiyọ ovwẹ oma, rere a sa vwọ wan oma mẹ vwọ nabọ ruiruo rẹ aghwoghwo na fiotọ, ẹgborho na ejobi se vwo nyo; o ji sivwin uvwe vwo nẹ unu rẹ okpohrokpo na.
18 Ọrovwori na che sivwin uvwe vwo nẹ kiruo kiruo umwemwu, je sẹro mẹ vwọ kẹ Uvie rọyen rọhẹ obodjuvwu. E jẹ urinrin dia vwọ kẹ rhirin bẹdi bẹdẹ. Isẹ.
19 Vwẹ uyeren mẹ vwọ kẹ Priska kugbe Akuila kugbe evwruwevwin rẹ Onisiforọs.
20 Ẹrastọs daji Kọrẹnt, ẹkẹvuọvo me yanjẹ Trofimọs vwo vwẹ Mailitọs kidie ọ muọga.
21 Davwẹngba wẹn eje wo vwo bru vwe rhe bẹsiẹ ọke ekpahen vwo te.
Yubulọs vwẹ uyeren rọyen vwo rhe we, ọtiọyen ji te Pudins, Lainus, Klọdia, kugbe iniọvo na eje.
22 E jẹ Ọrovwori na nene ẹwẹn ru wo djephia na dia. E jẹ ẹse rọyen re muwan rọye-en na nene uwe dia.
Eta rehẹ obotọ na
^ Vwẹ Grik, “ri che ririe orhọn rayen.”
^ Yẹrẹ “ruiruo rẹ oghwoghwota.”
^ Yẹrẹ “oge.” Ni Eta re Vwomaphia.
^ Ni Eta re Vwomaphia.