Ọrẹsosuọ ri Jọn 1:1-14
1 Ọbe rẹ ọshare rọ kpakore* na si rhe Geyọs, ohwo rọ pha ghanghanre, ri mi ghini vwo ẹguọnọ rọyen.
2 Oniọvo ọghanghanre, me nẹrhovwo nẹ, e jẹ o rhe yovwẹn kẹ wẹ vwẹ kemu kemu wo ruẹ, wo ji vwo omakpokpọ, kirobo ro yovwẹn kẹ wẹ* asaọkiephana.
3 Kidie me ghọghọre mamọ ọke rẹ iniọvo na vwọ rhe ji soseri kpahen uyota rẹ wọ yọnre na, kirobo rẹ wọ yan vwevunrẹ uyota na.
4 O vwo orọnvwọn ọfa rọ kẹ vwẹ aghọghọ* vrẹ ọnana-a: ri mi vwo nyo nẹ emọ mẹ yan vwevunrẹ uyota na.
5 Oniọvo ọghanghanre, wo dje evun-ẹfuọn wẹn phia womarẹ oborẹ wo ru vwọ kẹ iniọvo na, dede nẹ ayen erhorha vwọ kẹ wẹ.
6 Ayen soseri kpahen ẹguọnọ wẹn kẹ ukoko na. Ayen da ro idjerhe, biko vwẹ ukẹcha kẹ ayen vwẹ idjerhe rẹ oma da vwerhen Ọghẹnẹ.
7 Kidie fikirẹ odẹ rọyen, ayen vwọ yan oyan na, ayen reyọ emu vuọvo mie ihwo rẹ ẹgborho na-a.
8 Ọtiọyena, avwanre vwo oghwa re vwo rhiabọdede ihwo tiọyena je vwẹrote ayen, rere avwanre vẹ ayen sa vwọ wian kugbe vwevunrẹ uyota na.
9 Mi si orọnvwọn ọvo rhe ukoko na, ẹkẹvuọvo Diotrifis rọ guọnọ ẹdia rẹsosuọ vwẹ ohri rayen na, rhọnvwa rhiabọreyọ emu vuọvo mie avwanre vẹ ọghọ-ọ.
10 Kọyensorọ me da rhe, me cha vwẹ obo ro ruẹ na vwọ phia rọ vwọ hrahra erharhe eta kpahen avwanre.* Ọnana te kẹ-ẹ, ọ je rhọnvwa rhiabọdede iniọvo na vẹ ọghọ-ọ, ihwo re je guọnọ dede ayen, ọ davwẹngba rọ vwọ da ayen obọ ji je djẹ ayen nẹ ukoko na.
11 Oniọvo ọghanghanre, wọ vwẹrokere obo re brare-e, ẹkẹvuọvo vwẹrokere obo ri yovwirin. Ohwo ro ruẹ obo ri yovwirin jẹ obọ rẹ Ọghẹnẹ o nurhe, ohwo ro ruẹ obo re brare je rhe mrẹ Ọghẹnẹ-ẹ.
12 Ayen eje ta omamọ rẹ ota kpahen Dimitrọs, obo ro yeren akpọ vwo nene uyota na wan ji dje ọnana phia. Vwọrẹ uyota, avwanre soseri kpahọn, wọ je riẹn nẹ oseri rẹ avwanre se kpahọn na uyota.
13 Mi vwo erọnvwọn buebun re me guọnọ si rhe we, jẹ me guọnọ vwẹ ugbẹn vẹ inki vwo si ayen rhe we-e.
14 Ẹkẹvuọvo, mi rhẹro rọyen nẹ me cha mrẹ wẹ kẹrẹkpẹ rere e rhiẹromrẹ ohwohwo ta ota kugbe.
E jẹ ufuoma nene uwe dia.
Iniọvo na vwẹ uyeren rayen vwo rhe we. Vwẹ uyeren mẹ vwọ kẹ iniọvo na ọvuọvo.
Eta rehẹ obotọ na
^ Yẹrẹ “Ọbe rẹ ọkpako.”
^ Yẹrẹ “erhi wẹn.” Ni Eta re Vwomaphia.
^ Yẹrẹ ọ sa dia, “obo re nẹrhẹ me kpẹvwẹ.”
^ Vwẹ Grik, “ọ ta eta umwemwu kpahen avwanre.”