Vwo Rhe Filimọn 1:1-25
1 Pọl re mu phiyọ uwodi fikirẹ Kristi Jesu, kugbe Timoti oniọvo rẹ avwanre, vwo rhe Filimọn ohwo rẹ avwanre vẹ ọyen gba wian kuẹgbe rẹ avwanre vwo ẹguọnọ kpahen,
2 kugbe oniọvo aye Afia, vẹ Akipọs rọ dia isodje kerẹ avwanre, kugbe ukoko rọhẹ uwevwin wẹn:
3 E jẹ ẹse re muwan rọye-en kugbe ufuoma rẹ Ọghẹnẹ rọ dia Ọsẹ rẹ avwanre kugbe Ọrovwori Jesu Kristi nene ovwan dia.
4 Ọkieje yen me vwọ kpẹvwẹ Ọghẹnẹ mẹ, ọke mi de se odẹ wẹn vwẹ ẹrhovwo mẹ,
5 ri mi vwo nyo kpahen esegbuyota wẹn ọkieje, vẹ ẹguọnọ wo vwo kpahen Ọrovwori na Jesu kugbe ihwo efuanfon na eje.
6 Me nẹrhovwo nẹ e jẹ esegbuyota ru wo djephia na mu we vwo vwo ọmrẹvughe rẹ emu esiri ejobi rẹ avwanre vwori womarẹ Kristi.
7 Mi vwo aghọghọ rode, udu mẹ je nabọ totọ dẹn mi vwo nyo kpahen ẹguọnọ wẹn oniọvo mẹ, kidie wọ nẹrhẹ ubiudu rẹ ihwo efuanfon na sasa.
8 Fikirẹ ọnana, dede nẹ mi vwo ugbomọphẹ kerẹ ọyinkọn ri Kristi mi vwo jurhi kẹ wẹ nẹ wo ru obo ri shephiyọ,
9 jẹ mi che yovwunu kẹ wẹ fikirẹ ẹguọnọ, wọ je riẹn nẹ mẹvwẹ ri Pọl je kpakore, me jehẹ uwodi asaọkiephana fikirẹ Kristi Jesu.
10 Me rẹ wẹ fikirẹ ọmọ mẹ Onisimọs re me rhe dia ọsẹ kẹ me vwọ hẹ uwodi na.
11 Ọ dia ohwo rẹ emuọvo kẹ wẹ jovwo-o, jẹ asaọkiephana, omamọ rẹ ohwo kẹ vwẹ vẹ owẹ.
12 Mi jo rhivwin bru we cha, ohwo ri mi vwo ẹguọnọ kpahen mamọ.
13 Me guọnọre nẹ o nene uvwe dia obonẹ rere ọ reyọ ẹdia wẹn vwo gbodibo kẹ vwẹ uvwre ọke me vwọ hẹ uwodi fikirẹ iyẹnrẹn esiri na.
14 Ẹkẹvuọvo me guọnọ ru emu vuọvo ru wo jẹ rhọnvwaphiyọ-ọ, rere wọ vwọ vwẹ ọhọre obọ wẹn vwo ru obo ri yovwirin, ọ dia a gba wẹ-ẹ.
15 Ọkiọvo, ọnana yen sorọ rọ vwọ djẹ ju we vwo vwẹ ọmọke,* rere o se vwo rhivwin bru we rhe bẹdẹ,
16 ọ rha dia kerẹ ọviẹn ọfa-a, ẹkẹvuọvo, ọ tobọ yovwin nọ ọviẹn, kerẹ oniọvo rọ pha ghanghanre, ma rho vwọ kẹ vwẹ, tobọ vrẹ ọtiọyen vwọ kẹ wẹ vwọrẹ ugboma kugbe vwevunrẹ Ọrovwori na.
17 Wo de se vwe ugbeyan wẹn, gba nabọ dede kirobo wo che dede uvwe.
18 Vwọba, ọ da dianẹ o ru we chọ jovwo yẹrẹ kọ riosa wẹn, roro kẹ vwẹ rere me hwa.
19 Mẹvwẹ ri Pọl yen vwẹ obọ mẹ vwo si ọbe nana: Me cha hwa rhivwin—wẹ komobọ riẹnre nẹ osa mẹ ru wọ rere yen ma rho.
20 Oniọvo mẹ, ruẹse nana kẹ vwẹ vwevunrẹ Ọrovwori na, ru ubiudu mẹ sasa vwevunrẹ Kristi.
21 O muvwẹro nẹ wo che ru obo re me tare na, kọyensorọ mi vwo si rhe we, me riẹnre nẹ wọ cha tobọ ru vrẹ ọtiọyen.
22 Vwọba ọyena, muegbe rẹ asan me cha dia phiyotọ hẹrhẹ ovwẹ, kidie me rhẹro rọyen nẹ womarẹ ẹrhovwo rẹ ovwan, e che siobọnu uvwe bru ovwan rhe.
23 Epafras re me vẹ ọyen gba hẹ uwodi fikirẹ Kristi Jesu, vwẹ uyeren rọyen rhe we,
24 ọtiọyen ji te Mak, Aristakọs, Dimas, kugbe Luk re me vẹ ayen gba wian kuẹgbe.
25 E jẹ ẹse re muwan rọye-en rẹ Ọrovwori Jesu Kristi nene ovwan dia fikirẹ ẹwẹn esiri rẹ ovwan djephia.
Eta rehẹ obotọ na
^ Vwẹ Grik, “unọke ọvo.”