Iruo rẹ Iyinkọn Na 13:1-52
13 Asaọkiephana vwẹ Antiọk, emraro kugbe iyono hẹ ukoko rọhẹ etiyin: Banabas, Simiọn re se Naija, Lushọs ri Sairini, Manaen rọ vẹ Hẹrọd, osun rẹ ubrakpọ na gbe yono ẹbe kugbe, kugbe Sọl.
2 Rẹ ayen vwo gbodibo* kẹ Jihova* ji chiri owẹnvwe, ẹwẹn ọfuanfon na da tanẹ: “Ovwan sane Banabas kugbe Sọl phiyọ ọkọkọ kẹ vwẹ vwọ kẹ iruo re me vwẹ fiki rọyen vwo se ayen na.”
3 Ọtiọyena ọke rẹ ayen vwo chiri owẹnvwe je nẹrhovwo nu, ayen da ghwabọ kpahen ayen, ji ji ayen yanran.
4 Ọtiọyena, eshare nana rẹ ẹwẹn ọfuanfon na jiri na de kpo Sẹlusha, ayen da ro okọ vwo nẹ etiyin kpo Saiprọs.
5 Ayen vwo te Salamis, kẹ ayen ghwoghwo ota rẹ Ọghẹnẹ vwẹ sinagọg rẹ ihwo ri Ju na. Jọn kọyen gbodibo* kẹ ayen.
6 Ọke rẹ ayen vwọ yan ọsoso rẹ otọ na rẹ ame riariẹ phiyọ rhirin re te Pafọs nu, ayen da mrẹ ohwo ri Ju ọvo re se Ba-Jesu, rọ dia ọmraro rẹ efian kugbe ohwo ro ruẹ imajiki.
7 Ọ vẹ Sajọs Pọlọs rọ dia osun* kugbe ohwo ro vwo erianriẹn mamọ na yen gba herọ. Sajọs Pọlọs de se Banabas kugbe Sọl kidie o vwo owenvwe ọgangan ro vwo nyo ota rẹ Ọghẹnẹ.
8 Ẹkẹvuọvo Elimas rọ dia ohwo ro ruẹ imajiki na (kidie ọyen otọ rẹ odẹ rọyen) kọ vwọsua ayen, kọ davwẹngba ro vwo si ẹwẹn rẹ osun na vwo nẹ esegbuyota na.
9 Ọtiọyena, Sọl re ji se Pọl da rhe vọn vẹ ẹwẹn ọfuanfon na, ọ da tẹnrovio,
10 ọ da tanẹ: “E wẹwẹ rọ vọnre vẹ koka koka rẹ ọghware* kugbe koka koka rẹ umiovwo na, ọmọ rẹ Idẹbono na, ọvweghrẹn ri kemu kemu rọ dia ọsoso, wo che siobọnu uruemu ru wo vwo miovwo idjerhe ọphiọnphiọn ri Jihova* na?
11 Nighere! Obọ ri Jihova* hẹ enu wẹn, ẹro wẹn che rhu, wọ cha mrẹ elo rẹ ọnre na vwẹ uvwre ọke ọvo-o.” Ugege yena, evwru ro vwo ọkpan kugbe ebri de rhurho, ko beghe rọ vwọ guọnọ ohwo rọ cha yọnrọn obọ rere o suon.
12 Ọke rẹ osun na vwọ mrẹ obo re phiare na, o de segbuyota, kidie uyono ri Jihova* gbere unu.
13 Asaọkiephana Pọl kugbe otu re vẹ ọyen gba herọ da ro okọ vwo nẹ Pafọs, ayen de rhi te Pẹga vwẹ Pamfilia, ẹkẹvuọvo Jọn da yanjẹ ayen vwo, o de rhivwin kpo Jerusalẹm.
14 Ẹkẹvuọvo, ayen de nẹ Pẹga vwo kpo Antiọk vwẹ Pisidia. Ayen da ro sinagọg na vwẹ Ẹdẹ Urovwoma, ayen de chidia.
15 Ọke rẹ ayen vwo se Urhi na kugbe Ẹbe rẹ Emraro na vwẹ azagba nu, isun ri sinagọg na da vwẹ ovuẹ rhe ayen nẹ: “Iniọvo, ovwan de vwo ota rẹ uduephiophiyawọ vwọ kẹ ihwo na, ovwan ta.”
16 Ọtiọyena Pọl de vrẹn mudia, o de kpogho obọ rọyen, ọ da tanẹ:
“Ihwo rẹ Izrẹl kugbe ovwan ihwo ri chekọ re djoshọ rẹ Ọghẹnẹ, ovwan kerhọ.
17 Ọghẹnẹ rẹ ihwo nana re dia ihwo rẹ Izrẹl sane esẹ rẹ avwanre ride, ọ da kpare ihwo na kpenu ọke rẹ ayen vwọ dia otọ rẹ Ijipt kerẹ erhorha, ọ da reyọ ayen norhe vẹ obọ ọgangan rọyen.
18 O de chirakon rayen vwẹ omarẹ ẹgbukpe 40 vwevunrẹ aton na.
19 Ọke rọ vwọ ghwọrọ ẹgborho ighwrẹn vwẹ otọ ri Kenan nu, ọ da vwẹ otọ rayen vwọ kẹ ayen kerẹ uku.
20 Enana ejobi phiare vwẹ uvwre rẹ omarẹ ẹgbukpe 450.
“Ọnana vwọ wan nu, ọ da vwẹ iguẹdjọ kẹ ayen rhirin re te ọke ri Samuẹl rọ dia ọmraro na.
21 Ẹkẹvuọvo ọke vwọ yan obaro, ayen da nokpẹn rẹ ovie, Ọghẹnẹ da vwẹ Sọl ọmọ ri Kish, ohwo rẹ uvwiẹ ri Bẹnjamin vwọ kẹ ayen vwẹ ẹgbukpe 40.
22 Ọke ro vwo sio no nu, ọ da vwẹ Devid vwo mu ovie, ohwo ro soseri kpahen nẹ: ‘Me mrẹ Devid ọmọ ri Jesse, ohwo ro ruẹ obo rọ vẹ ubiudu mẹ shephiyọ; o che ru erọnvwọn eje re me guọnọre.’
23 Kirobo rẹ ive rọyen hepha, Ọghẹnẹ reyọ osivwin ọvo, Jesu, vwo nẹ uvwiẹ* rẹ ọshare nana rhe vwọ kẹ Izrẹl.
24 Tavwen ohwo yena ke rhe, Jọn ghwoghwo omaebrophiyame vwẹ azagba vwọ kẹ ihwo rẹ Izrẹl eje kerẹ oka rẹ okurhẹriẹ.
25 Ẹkẹvuọvo ri Jọn vwo kuẹ iruo rọyen phiyọ re, kọ tanẹ: ‘Ono yen ovwan rorori nẹ me hepha? Me dia ọye-en. Ẹkẹvuọvo nighere! Ohwo ọvo cha vwẹ obuko mẹ, mi muwan rẹ ohwo rọ rhan isabato rẹ awọ rọye-en.’
26 “Iniọvo, ovwan emọ rẹ orua rẹ Ebraham kugbe ihwo ri chekọ rehẹ ohri rẹ ovwan re djoshọ rẹ Ọghẹnẹ, a vwẹ ota rẹ usivwin na vwo rhe avwanre re.
27 Kidie ihwo re dia Jerusalẹm kugbe isun rayen vughe ohwo nana-a, ẹkẹvuọvo ọke rẹ ayen vwọ ga kerẹ iguẹdjọ, ayen ru orugba rẹ erọnvwọn rẹ Emraro na tare, re se phia gorigori kẹdurovwoma kẹdurovwoma.
28 Dede nẹ ayen mrẹ orọnvwọn vuọvo rọ cha nẹrhẹ e hwe-e, jẹ ayen vuẹ Pailet nẹ o hwe.
29 Ọke rẹ ayen vwo ru erọnvwọn eje re si kpahọn gba nu, ayen de muo vwo nẹ enu rẹ urhe na, ayen de muo phiyọ ushi.*
30 Ẹkẹvuọvo Ọghẹnẹ kparerọ vrẹn nẹ ughwu,
31 ẹdẹ buebun yen ọ vwọ vwomaphia kẹ ihwo ri nenire nẹ Galili kpo Jerusalẹm. Enana keyen soseri kpahọn kẹ ihwo na asaọkiephana.
32 “Ọtiọyena avwanre ghwoghwo iyẹnrẹn esiri ro shekpahen ive re ve kẹ esẹ ride na kẹ ovwan.
33 Ọghẹnẹ ru orugba rọyen kẹ avwanre re dia emọ rayen re, womarẹ Jesu rọ kpare vrẹn nẹ ushi; kirobo re siro vwẹ une rẹ ejiro rivẹ na nẹ: ‘Wẹwẹ ọmọ mẹ; nonẹna me rhe dia ọsẹ wẹn re.’
34 Ọghẹnẹ kparerọ nẹ ughwu, o rhe che gbo-on. O dje uyota nana phia rọ vwọ tanẹ: ‘Mi che ru orugba rẹ ive rẹ ẹguọnọ ro jẹ rhẹriẹ ra sa vwẹroso na kẹ wẹ, ọ ri mi ve kẹ Devid.’
35 Ọtiọyen ọ je ta vwẹ une rẹ ejiro ọfa nẹ: ‘Wọ cha vwẹ uphẹn kẹ ọ rọ fuevun kẹ wẹ nẹ o gbo-on.’
36 Vwọ kẹ Devid, ọ vwẹ ẹga kẹ Ọghẹnẹ* ọke rọ vwọ hẹ akpọ, ọ da vwerhẹn vwọrẹ ughwu, e de sho vẹ esẹ rọyen ride, o de gbon.
37 Ẹkẹvuọvo vwọ kẹ ohwo rẹ Ọghẹnẹ kpare vrẹn na, o gbonri-i.
38 “Ọtiọyena iniọvo, ovwan riẹn ọnana, nẹ womarẹ ohwo nana yen e vwo ghwoghwo evwoghovwo rẹ imwemwu kẹ ovwan na.
39 Urhi ri Mosis na se ru ovwan phiyọ evwata-a, ẹkẹvuọvo fikirẹ ọshare nana, Ọghẹnẹ ko se kohwo kohwo ro segbuyota ọvwata.
40 Ọtiọyena, ovwan nomaso rere obo ra tare vwẹ Ẹbe rẹ Emraro na vwo jẹ phia kẹ ovwan:
41 ‘Ovwan no, ovwan ihwo re jẹ ihwo fia na, jẹ o gbe ovwan unu rere ovwan ghwọrọ kufia, kidie mi ruiruo ọvo vwẹ ẹdẹ rẹ ovwan na, iruo rẹ ovwan cha vwẹ ọke vuọvo vwo segbuyota-a, ọ da tobọ dianẹ ohwo ọvo nabọ gbikun rọyen fiotọ kẹ ovwan.’”
42 Asaọkiephana rẹ ayen vwọ rua otafe yanran, ihwo na ke rẹ ayen nẹ ayen rhe ta ota kpahen erọnvwọn nana vwẹ Ẹdẹ Urovwoma rọ vwọ kpahọn.
43 Ọke rẹ osikoko ri sinagọg na vwo kuphiyọ nu, ihwo ri Ju buebun kugbe ihwo ri kurhẹriẹ kpo ẹga rẹ ihwo ri Ju re ga Ọghẹnẹ de nene Pọl vẹ Banabas, ọke rẹ ayen vwo nene ihwo na ta ota, ayen de jiro kẹ ayen nẹ, ayen dia evunrẹ ẹse rẹ Ọghẹnẹ re muwan rọye-en na.
44 Vwẹ Ẹdẹ Urovwoma rọ vwọ kpahọn, dino ihwo ejobi rehẹ evunrẹ orere na yen kokori rẹ ayen vwo nyo ota ri Jihova.*
45 Ọke rẹ ihwo ri Ju vwọ mrẹ otu na, ayen da rhe vọn vẹ omaẹriọ, kẹ ayen ta eta rẹ ẹgua vwọsua oborẹ Pọl ta na.
46 Ọtiọyena Pọl vẹ Banabas de fiudugberi ta kẹ ayen nẹ: “Ovwan yen ofori nẹ a ka ta ota rẹ Ọghẹnẹ na kẹ. Rọ vwọ dianẹ ovwan senrọ, rẹ ovwan rhe kere oma rẹ ovwan phiyọ ihwo ri muwan vwọ kẹ arhọ ri bẹdẹ-ẹ na, nighere! avwanre brẹ ihwo rẹ ẹgborho na ra.
47 Kidie Jihova* vwẹ iji kẹ avwanre womarẹ eta nana nẹ: ‘Me vwẹ owẹ vwo mu kerẹ urhukpẹ rẹ ẹgborho na rere wọ vwọ dia usivwin re toba rẹ akpọ na.’”
48 Ọke rẹ ihwo rẹ ẹgborho na vwo nyo ọnana, kẹ ayen ghọghọ je vwẹ urinrin vwọ kẹ ota ri Jihova,* ihwo eje ri vwo omamọ ẹwẹn rẹ ayen vwọ dia idjerhe ro suẹn kpo arhọ ri bẹdi bẹdẹ de rhi segbuyota.
49 Vwọba, ota ri Jihova* na da hrabọ ro ẹkuotọ na eje.
50 Ẹkẹvuọvo ihwo ri Ju na da kpare ophu rẹ eya ri titiri re djoshọ rẹ Ọghẹnẹ kugbe eshare ri titiri vwevunrẹ orere na, ayen da nẹrhẹ e mukpahen Pọl vẹ Banabas, e de do ayen phiyọ otafe rẹ orere na.
51 Ọtiọyena ayen de tue ekpẹn nẹ awọ rayen, ayen de kpo Aikoniọm.
52 Idibo na da rhe vọn vẹ aghọghọ kugbe ẹwẹn ọfuanfon ọkieje.
Eta rehẹ obotọ na
^ Yẹrẹ “gbodibo vwẹ azagba.”
^ Ni Eta re Vwomaphia.
^ Yẹrẹ “Jọn kọyen vwẹ ukẹcha.”
^ Osun rẹ ubrakpọ ọvo vwẹ usuon ri Rom. Ni Eta re Vwomaphia.
^ Yẹrẹ “iwayo.”
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.
^ Vwẹ Grik, “ubi.”
^ Yẹrẹ “ushi rẹ ẹkarophiyọ.”
^ Yẹrẹ “o ru ọhọre rẹ Ọghẹnẹ.”
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.