Iruo rẹ Iyinkọn Na 14:1-28
14 Asaọkiephana vwẹ Aikoniọm, ayen da ro sinagọg rẹ ihwo ri Ju na, ayen da ta ota vwẹ idjerhe rọ nẹrhẹ ihwo buebun segbuyota, te ihwo ri Ju te ihwo ri Grik.
2 Ẹkẹvuọvo ihwo ri Ju ri segbuyota-a da kpare ophu rẹ ihwo rẹ ẹgborho na je nẹrhẹ ayen* vwo utuoma kpahen iniọvo na.
3 Ọtiọyena ayen da ghwọrọ ọke buebun vwọ ta ota vẹ uduoyivwin* womarẹ ogangan ri Jihova,* ohwo ro soseri kpahen ota rẹ ẹse rọyen re muwan rọye-en, rọ vwọ nẹrhẹ ayen ru eka vẹ igbevwunu sansan.
4 Ẹkẹvuọvo ihwo rẹ orere na da ghare oma; evo ka ẹbẹre rẹ ihwo ri Ju na, efa da rha ka ẹbẹre rẹ iyinkọn na.
5 Ọke rẹ ihwo rẹ ẹgborho na kugbe ihwo ri Ju vẹ isun rayen vwọ davwẹngba rẹ ayen vwọ phọphọ ayen ji phi ayen,
6 a da vuẹ ayen kpahọn, ayen da djẹ kpo irere ri Laikonia, Listra kugbe Dabe, kugbe eko re riariẹ irere na phiyọ.
7 Kẹ ayen ghwoghwo iyẹnrẹn esiri na vwẹ oboyin.
8 Asaọkiephana vwẹ Listra, o vwo ọshare ọvo ro chidia otọ, awọ rọyen ghwuru. Ukpono yen ọ hepha nẹ evun rhe, ọ je yan dẹvo-o.
9 Ọshare nana kerhọ ri Pọl ọke rọ vwọ ta ota. Pọl vwọ tẹnrovio je mrẹ nẹ o vwo esegbuyota rọ sa nẹrhẹ oma rọyen gan,
10 ọ da kpare upho kpenu tanẹ: “Vrẹn mudia.” Ọtiọyena ọshare na de pho kpenu ọ da tuẹn oyan phiyọ.
11 Ọke rẹ otu na vwọ mrẹ oborẹ Pọl ruru na, ayen de kperi phia vwẹ ejajẹ ri Laikonia nẹ: “Eghẹnẹ na rhe họhọ ihworakpọ re, ayen ji bru avwanre rhire!”
12 Kẹ ayen se Banabas Zus, ayen de rhe se Pọl Hẹmis, rọ vwọ dianẹ ọyen ma ta ota na.
13 Orherẹn ri Zus rẹ uwevwin rẹ ẹdjọ rọyen hẹ asan ra wan rua orere na, da reyọ erhuẹn kugbe erhu rẹ idodo rhe asan anurhoro na, ọ vẹ otu na ke guọnọ ze izobo.
14 Ẹkẹvuọvo, ọke rẹ iyinkọn na Banabas kugbe Pọl vwo nyo kpahọn, ayen da bẹrẹ iwun rayen, ayen da djẹ ro ohri rẹ otu na, ayen de kperi phia nẹ:
15 “Ihwo na, diesorọ ovwan vwo ruẹ erọnvwọn nana? Avwanre jẹ ihworakpọ ri vwo ovwiẹrẹ sansan kerẹ ovwan. Avwanre ghwoghwo iyẹnrẹn esiri na kẹ ovwan, rere ovwan vwo kurhẹriẹ vwo nẹ erọnvwọn ifefe nana vwo bru Ọghẹnẹ ro jeghwo na ra, ohwo rọ ma odjuvwu na kugbe akpọ na kugbe abadi na kugbe erọnvwọn eje rehẹ evun rayen.
16 Vwẹ uvwiẹ re wanre, ọ vwẹ uphẹn kẹ ẹgborho na nẹ ayen nene idjerhe ro je ayen,
17 dedena o soseri kpahen oma rọyen womarẹ emu esiri ro ruẹ, rọ vwọ kẹ ovwan osio vwo nẹ obodjuvwu cha, je nẹrhẹ ekankọn rẹ ovwan mọ emamọ buebun vwẹ ọke ro fori, ọ nẹrhẹ ovwan ria evun vọn, je nẹrhẹ ubiudu rẹ ovwan vọn vẹ aghọghọ.”
18 Dede nẹ ayen ta eta nana eje, jẹ ẹgbẹgba yen ayen sa vwọ dobọ rẹ otu na ji, rẹ ayen vwo jẹ izobo eze kẹ ayen.
19 Ẹkẹvuọvo ihwo ri Ju de nẹ Antiọk kugbe Aikoniọm rhe, ayen da riẹriẹ otu na, ayen de phi Pọl, ayen de kpono ro otafe rẹ orere na, vẹ ẹwẹn nẹ o ghwu nure.
20 Ẹkẹvuọvo ọke rẹ idibo na vwọ riariẹ phiyọ, o de vrẹn ọ da ro evunrẹ orere na. Vwẹ ẹdẹ rọ vwọ kpahọn, ọ vẹ Banabas de kpo Dabe.
21 Ọke rẹ ayen vwo ghwoghwo iyẹnrẹn esiri na vwẹ orere yena je vwẹ ukẹcha kẹ imihwo vwọ dia idibo nu, ayen de rhivwin kpo Listra, Aikoniọm, kugbe Antiọk.
22 Ayen da bọn idibo* na gan vwẹ etiyin, ayen de phiuduphiyọ ayen awọ nẹ ayen dia evunrẹ esegbuyota na, rẹ ayen vwọ tanẹ: “Avwanre che rhiẹromrẹ ukpokpogho buebun, tavwen a ke ro Uvie rẹ Ọghẹnẹ na.”
23 Vwọba, ayen da vwẹ ekpako vwo mu kẹ ayen vwẹ ukoko ọvuọvo, ayen da nẹrhovwo ji chiri owẹnvwe, ayen de phi ayen phiyọ obọ ri Jihova,* ohwo rẹ ayen segbuyota na.
24 Ayen da wan evunrẹ Pisidia, ayen de rhi te Pamfilia,
25 rẹ ayen vwo ghwoghwo ota na vwẹ Pẹga nu, ayen de kpo Atalaya.
26 Ayen da ro okọ nẹ etiyin vwo kpo Antiọk, asan re de phi ayen phiyọ obọ rẹ Ọghẹnẹ nẹ o dje ẹse rọyen re muwan rọye-en na kẹ ayen fikirẹ iruo rẹ ayen ru toba re na.
27 Ọke rẹ ayen vwo te oboyin ji se iniọvo rẹ ukoko na koko nu, ayen de gbikun rẹ erọnvwọn buebun rẹ Ọghẹnẹ wan oma rayen ru, kugbe nẹ o rhie ẹchẹ rẹ esegbuyota na kẹ ẹgborho na re.
28 Ọtiọyena, ayen de nene idibo na dia ọke grongron.
Eta rehẹ obotọ na
^ Yẹrẹ “erhi rayen.” Ni Eta re Vwomaphia.
^ Yẹrẹ “uduefiogbere.”
^ Ni Eta re Vwomaphia.
^ Yẹrẹ “erhi rẹ idibo.” Ni Eta re Vwomaphia.
^ Ni Eta re Vwomaphia.