Iruo rẹ Iyinkọn Na 19:1-41
19 Enana vwọ phia na, rẹ Apolọs vwọ hẹ Kọrẹnt, Pọl da wan idjerhe otọ ro sheri kẹ abadi vwo kpo Ẹfesọs. Ọ da mrẹ idibo evo vwẹ etiyin,
2 ọ da ta kẹ ayen nẹ: “Ẹwẹn ọfuanfon na ro ovwan oma ọke rẹ ovwan vwo segbuyota?” Ayen da kpahen kẹ nẹ: “Avwanre ji rhi nyo kpahen ẹwẹn ọfuanfon dẹvo-o.”
3 Ọ da ta kẹ ayen nẹ: “Oka rẹ omaebrophiyame vọ yen e bru ovwan phiyọ?” Ayen da tanẹ: “Omaebrophiyame ri Jọn.”
4 Pọl da tanẹ: “Jọn bru ihwo phiyame kerẹ oka rẹ okurhẹriẹ, rọ vwọ vuẹ ihwo na nẹ ayen se ọ rọ cha vwẹ obuko rọyen gbuyota, kọyen Jesu.”
5 Ayen vwo nyo ọnana, ayen de bromaphiyame vwẹ odẹ rẹ Ọrovwori na Jesu.
6 Ọke ri Pọl vwọ ghwabọ kpahen ayen, ẹwẹn ọfuanfon na da ro ayen oma, kẹ ayen jẹ ejajẹ ọrhorha je mraro.
7 Ayen ejobi te omarẹ eshare 12.
8 Ọ vwọ ro sinagọg na, ọ da ta ota vẹ uduoyivwin* vwẹ emeranvwe erha, ko yono ihwo je davwẹngba rọ vwọ nẹrhẹ ayen vwo imuẹro kpahen Uvie rẹ Ọghẹnẹ.
9 Ẹkẹvuọvo ọke rẹ ihwo evo vwo ru uyovwin gangan* sen nẹ ayen che segbuyota-a, jẹ ayen je ta eta ebrabra vwọ kpahen Idjerhe Na vwẹ obaro rẹ otu na, o de sioma reyọ nẹ ohri rayen, ọ da hẹriẹ idibo na vwo nẹ ayen, kọ ta ota kẹdi kẹdẹ vwẹ ọguan rẹ isikuru ri Tiranọs.
10 O ru ọnana vwẹ ẹgbukpe ivẹ, te ẹdia rẹ ihwo eje re dia ubrakpọ rẹ Esha vwo nyo ota rẹ Ọrovwori na, te ihwo ri Ju te ihwo ri Grik.
11 Ọghẹnẹ ko ruiruo rẹ igbevwunu ride womarẹ Pọl,
12 a tobọ reyọ emwa vẹ eprọni rọyen vwo rhe ihwo re họnvwa ọga, ega rayen de kpo, ẹwẹn rẹ Idẹbono de nẹ ayen oma.
13 Ẹkẹvuọvo ihwo ri Ju evo ri nẹ asan kpo asan djẹ ẹwẹn rẹ Idẹbono da je davwẹngba vwọ reyọ odẹ rẹ Ọrovwori na Jesu vwọ djẹ ẹwẹn umwemwu nẹ ihwo oma; ayen me tanẹ: “Me ta kẹ wẹ vwẹ odẹ ri Jesu ri Pọl ghwoghwo na.”
14 Asaọkiephana, emeshare ighwrẹn rẹ orherẹn rode rẹ ihwo ri Ju ọvo re se Siva ruẹ ọnana.
15 Ẹkẹvuọvo ẹwẹn umwemwu na da kpahen kẹ ayen nẹ: “Me riẹn Jesu, me je riẹn Pọl; ẹkẹvuọvo ono yen ovwan?”
16 Ọtiọyena ọshare rẹ ẹwẹn umwemwu hẹ oma rọyen na de pho mu ayen, o de nene ayen họnre, o de phi ayen kparobọ, ayen da vwẹ ẹbẹban vẹ era vwọ djẹ nẹ uwevwin na.
17 Ihwo eje re dia Ẹfesọs da rhe riẹn kpahọn, te ihwo ri Ju te ihwo ri Grik; oshọ de mu ayen eje, jẹ e titi odẹ rẹ Ọrovwori na Jesu.
18 Buebun vwẹ usun rẹ ihwo ri segbuyota me rhe, ayen me fan je niyẹnrẹn rẹ oborẹ ayen ruru vwẹ azagba.
19 Vwọrẹ uyota, ihwo buebun ri ruẹ imajiki jovwo da ghwẹ ẹbe rayen koko, ayen da torhẹ ayen vwẹ irharo rẹ ihwo ejobi. E vwo roro uchunu rayen, i te idọnọ efuanfon 50,000.
20 Ọtiọyena vwẹ idjerhe rode, ota ri Jihova* kọ rhuaphiyọ je hẹrẹphiyọ.
21 Ọke rẹ erọnvwọn nana vwọ phia nu, Pọl de brorhiẹn vwevunrẹ ẹwẹn rọyen nẹ, ọke rẹ ọyen da wan Masidonia kugbe Akaya vrẹ nu, ọyen che kpo Jerusalẹm. Ọ da tanẹ: “Ọke mi de kpo oboyin nu, mi ji che kpo Rom.”
22 Ọtiọyena o de ji Timoti vẹ Ẹrastọs, ihwo ivẹ vwẹ usun rẹ ihwo ri gbodibo kẹ vwo kpo Masidonia, ẹkẹvuọvo ọyen komobọ da dia ubrakpọ rẹ Esha vwẹ ọmọke.
23 Vwẹ ọke yena oyanghan rode da vwomaphia vwọ kpahen Idjerhe Na.
24 Kidie ọshare ọvo re se Dimitrọs, odjogun rọ vwẹ idọnọ ọfuanfon vwo duvwẹn ọrhan rẹ Atẹmis, ghwa erere buebun vwo rhe ewena na.
25 O de se ayen vẹ ihwo efa ri ruẹ oka rẹ erọnvwọn tiọyen koko, ọ da tanẹ: “Ihwo na, ovwan nabọ riẹn nẹ eki nana ọyen efe rẹ avwanre nẹcha.
26 Asaọkiephana ovwan mrẹre ji nyo oborẹ Pọl nana vwọ riẹriẹ otu buebun ji ku ẹwẹn rayen rhẹriẹ, ọ dia evunrẹ Ẹfesọs ọvo-o, ẹkẹvuọvo dino ubrakpọ rẹ Esha eje, rọ vwọ tanẹ eghẹnẹ ra vwẹ obọ ru na ghene dia eghẹnẹ-ẹ.
27 Vwọba, oshọ mu vwe nẹ ọ dia eki nana rẹ avwanre chua na ọvo yen che she-e, ẹkẹvuọvo ihwo je cha vwẹ ẹro ri phovwin vwo ni uwevwin rẹ ẹdjọ rẹ ọghẹnẹ aye rode na re se Atẹmis, ọghẹnẹ rẹ ubrakpọ rẹ Esha eje kugbe ihwo re dia akpọ na eje vwẹ ẹga kẹ na rhe che vwo urinri-in.”
28 Ayen vwo nyo ọnana, ophu de mu ayen mamọ, kẹ ayen kperẹ nẹ: “Atẹmis rẹ ihwo rẹ Ẹfesọs na rhoro!”
29 Orere na ejobi da rhe yanghan ku, ayen eje da họrhọ ro afieha na, ayen de kpono Geyọs vẹ Aristakọs nene oma, ihwo ri Masidonia re vẹ Pọl gba yan.
30 Vwọ kẹ Pọl, ọ guọnọ ro evun rọyen bru ihwo na ra, ẹkẹvuọvo idibo na rhọnvwe kẹ-ẹ.
31 Evo vwẹ usun rẹ inotu re vwẹrote erẹ vẹ eha* re dia igbeyan rọyen dede je vwẹ ovuẹ rhe, rẹ ayen vwọ rẹ nẹ ọ rua evunrẹ afieha na-a, o vwo jẹ arhọ rọyen e phio phiyọ ẹdia rẹ imuoshọ.*
32 Vwọrẹ uyota, evo kperẹ orọnvwọn ọvo jẹ efa kperẹ orọnvwọn ọfa, kidie otighi hẹ ohri rẹ ihwo ri siomakoko na, buebun rayen riẹn oboresorọ ayen vwo siomakoko-o.
33 Ayen da reyọ Alẹkzanda nẹ otu na rhe, ihwo ri Ju na de gere kpo obaro, Alẹkzanda de kpogho obọ rọyen, kọ guọnọ guẹn ẹkẹn unu rọyen vwẹ obaro rẹ ihwo na.
34 Ẹkẹvuọvo ọke rẹ ayen vwọ mrẹvughe nẹ ohwo ri Ju yen o ruẹ, ayen eje ki kperẹ vẹ upho ọvo vwẹ omarẹ inọke ivẹ nẹ: “Atẹmis rẹ ihwo rẹ Ẹfesọs na rhoro!”
35 Ọke rẹ ohwo rọ ma rho vwevunrẹ orere na vwọ nẹrhẹ otu na fọ nu, ọ da tanẹ: “Ihwo rẹ Ẹfesọs, ono vwẹ usun rẹ ihworakpọ na yen jẹ riẹn nẹ orere rẹ Ẹfesọs yen sẹro rẹ uwevwin rẹ ẹdjọ rẹ Atẹmis rode na kugbe oma ro she nẹ obodjuvwu rhe na?
36 Rọ vwọ dianẹ a cha sa phrọ erọnvwọn nana-a na, ovwan gbe hwe oma mu, ovwan muẹ ruẹ-ẹ.
37 Kidie ovwan mu eshare nana rhe etinẹ, ọ dianẹ kẹ ayen gborho iwevwin rẹ ẹga yẹrẹ ta eta rẹ ẹgua kpahen ọghẹnẹ aye rẹ avwanre-e.
38 Ọtiọyena, ọ da dianẹ Dimitrọs kugbe ewena re vẹ ọyen gba herọ vẹ ohwo ọvo vwo ota, ẹdẹ rẹ aguare herọ, isun* na jehẹ etiyin; e jẹ ayen se ohwohwo ẹdjọ.
39 Ẹkẹvuọvo ọ da dianẹ ovwan guọnọ orọnvwọn ọfa rọ vrẹ ọyena, e che brorhiẹn rọyen vwẹ osikoko re seri vwo nene urhi.
40 Vwọrẹ uyota, obo re phiare nonẹna sa nẹrhẹ a tanẹ avwanre reyọ vwọsua usuon, kidie o vwo orọnvwọn vuọvo rẹ avwanre sa tanẹ ọyensorọ rẹ otu nana vwo muẹ do na-a.”
41 Ọ vwọ ta ọnana nu, ọ da hra otu na.
Eta rehẹ obotọ na
^ Yẹrẹ “uduefiogbere.”
^ Yẹrẹ “ihwo evo vwọ rhanre oma vi kokoroko.”
^ Ni Eta re Vwomaphia.
^ Yẹrẹ “igemu.”
^ Yẹrẹ “ideghene.”
^ Isun rẹ ubrakpọ sansan vwẹ usuon ri Rom. Ni Eta re Vwomaphia.