Iruo rẹ Iyinkọn Na 26:1-32
26 Agripa da ta kẹ Pọl nẹ: “Wo se gun ẹkẹn unu wẹn.” Pọl da rionbọ rọyen phia ọ da tuẹn ota ẹta phiyọ rọ vwọ chochọn rẹ oma rọyen:
2 “Vwọ kpahen erọnvwọn na eje rẹ ihwo ri Ju na ta vwọso ovwẹ na, Ovie Agripa, oma vwerhen ovwẹ nẹ obaro wẹn yen me da cha chochọn rẹ oma mẹ nonẹna,
3 ma rho kidie nẹ wọ nabọ riẹn ẹkuruemu na ejobi, ọtiọyen ji te aphro rọhẹ ohri rẹ ihwo ri Ju na. Ọtiọyena, me rẹ wẹ nẹ wọ nabọ kerhọ mẹ vẹ edirin.
4 “Vwọrẹ uyota, ihwo ri Ju na eje nabọ riẹn oka rẹ akpọ ri mi yerin nẹ ọke rẹ eghene rhe vwẹ ohri rẹ ihwo* mẹ kugbe vwevunrẹ Jerusalẹm,
5 ayen ri vughe uvwe jovwo na se soseri rọyen nẹ mẹvwẹ Farisi jovwo, ọ da dianẹ ayen guọnọ ru ọtiọyen, jẹ ihwo ri Farisi yọnrọn urhi rẹ obo ra ga Ọghẹnẹ wan kokoroko vwọ vrẹ ihwo ri Ju efa.
6 Ẹkẹvuọvo asaọkiephana, fikirẹ iphiẹrophiyọ rẹ ive rẹ Ọghẹnẹ ve kẹ esẹ rẹ avwanre ride yen a vwọ reyọ ovwẹ vwo guẹdjọ na;
7 ive vuọvo nana yen uvwiẹ 12 rẹ avwanre rhẹro rẹ ayen vwọ mrẹ orugba rọyen womarẹ ẹga ọfuanfon rẹ ayen muomaphiyọ rẹ ayen vwọ kẹ Ọghẹnẹ te ason te uvo. Fikirẹ iphiẹrophiyọ nana yen ihwo ri Ju vwọ ta ota vwọsua ovwẹ na, E Ovie.
8 “Diesorọ ovwan vwo no* nẹ Ọghẹnẹ cha sa kpare ihwo ri ghwuru vrẹ-ẹn?
9 Vwọ kẹ vwẹ, mi ke vwo imuẹro nẹ ofori nẹ me vwọso odẹ ri Jesu, ohwo ri Nazarẹt na vwẹ kidjerhe kidjerhe.
10 Ọnana yen obo ri mi ghwe ru dẹn vwẹ Jerusalẹm, mi mu buebun rẹ ihwo efuanfon na phiyọ uwodi kidie me reyọ ogangan vwo mie irherẹn ride na; ọke ra da guọnọ teyen ayen hwe me ghwobọphiyọ.
11 Me davwẹngba vwọ gba ayen vwọ sen esegbuyota rayen womarẹ oja re me vwọ ria ayen kọke kọke vwẹ sinagọg na eje; kidie nẹ mi muophu gangan kpahan ayen, me da tobọ kpo irere efa re mukpahen ayen.
12 “Vwẹ ọnana ri mi ruẹ na, ri mi vwo kpo Damaskọs vẹ ogangan kugbe uturhi rẹ irherẹn ride na vwọ kẹ vwẹ,
13 me vwọ hẹ idjerhe vwẹ oghẹruvo koko na, E Ovie, me da mrẹ elo ọvo ro nẹ obodjuvwu rhe ro lo vrẹ ọ rẹ ọnre, rọ riariẹ ovwẹ vẹ ihwo re vẹ ovwẹ gba hẹ usun na phiyọ.
14 Ọke rẹ avwanre eje vwo she teyen otọ nu, mi de nyo urhuru ọvo rọ ta kẹ vwẹ vwẹ ejajẹ ri Hibru nẹ: ‘Sọl, Sọl, diesorọ wo vwo muẹkpahan ovwẹ? Wọ sua omaẹwan kẹ oma wẹn kidie wọ họnra vwọso ovwẹ.’*
15 Ẹkẹvuọvo me da tanẹ: ‘Ono yen owẹ, Ọrovwori?’ Ọrovwori na da tanẹ: ‘Mẹvwẹ Jesu, ohwo ru wo muẹkpahan na.
16 Ẹkẹvuọvo gbe vrẹn wo mudia. Ọnana yen sorọ me vwọ vwomaphia kẹ wẹ, me vwọ jẹ wẹ reyọ kerẹ odibo kugbe oseri rẹ erọnvwọn ru wọ mrẹ re kugbe erọnvwọn re me cha nẹrhẹ wọ mrẹ vwọ kpahen ovwẹ.
17 Mi che sivwin uwe vwo nẹ obọ rẹ ihwo nana kugbe ẹgborho ri mi ji we brẹ ra na,
18 rere wo rhiẹro rayen, si ayen vwo nẹ ebri rhe urhukpẹ, kugbe vwo nẹ otọ rẹ ogangan rẹ Eshu bru Ọghẹnẹ rhe, rere ayen sa vwọ mrẹ evwoghovwo rẹ imwemwu ji vwo uku vwẹ ohri rẹ ihwo re ru fon womarẹ esegbuyota rẹ ayen vwo kpahen ovwẹ.’
19 “Ọtiọyena, Ovie Agripa, mi ru nene emramrẹ rẹ odjuvwu na,
20 mi de ghwoghwo ovuẹ na kẹ ihwo ri Damaskọs ẹsosuọ tavwen mi ki ghwoghwo kẹ ihwo rehẹ Jerusalẹm kugbe ihwo rehẹ ẹkuotọ ri Judia eje, ọtiọyen ji te ihwo rẹ ẹgborho na, nẹ ayen kurhẹriẹ bru Ọghẹnẹ rhe, womarẹ ayen vwo ruiruo ri dje okurhẹriẹ phia.
21 Ọnana yen sorọ rẹ ihwo ri Ju na vwo shabọ phiyọ ovwẹ vwevunrẹ uwevwin rẹ ẹga na je davwẹngba rẹ ayen vwọ teyen ovwẹ hwe.
22 Ẹkẹvuọvo, kidie nẹ mi rhiẹromrẹ ukẹcha ro nẹ obọ rẹ Ọghẹnẹ rhe, kọyensorọ mi ji se vwo soseri kẹ ihwo itete vẹ ihwo ride rhi te nonẹna, me ta ota vuọvo rọ fẹnẹre-e jokparẹ oborẹ emraro na kugbe Mosis tare nẹ e cha phia—
23 nẹ Kristi na cha rioja, kugbe nẹ kerẹ ohwo rẹsosuọ ra cha rhọvwọn nẹ ughwu, o che ghwoghwo orẹmrẹ vwọ kẹ ihwo nana kugbe ẹgborho na.”
24 Asaọkiephana ri Pọl vwọ ta eta nana vwọ chochọn rẹ oma rọyen, Fẹstọs de kperi vẹ upho ọgangan nẹ: “Uyovwin wẹn gbare-e, Pọl! Ẹbe buebun ru vwo yonori na fovwo uwe phiyọ orhuẹ!”
25 Ẹkẹvuọvo Pọl da tanẹ: “Me mwa orhuẹ-ẹ, Ohwo Rode Fẹstọs, ẹkẹvuọvo me ta eta rẹ uyota kugbe e rẹ iroro ro fiotọ.
26 Vwọrẹ uyota, ovie re me ta ota kẹ odedede na nabọ riẹn kpahen erọnvwọn nana; mi ji vwo imuẹro dẹn nẹ o vwo ọvuọvo vwẹ usun rẹ erọnvwọn nana re chọrerọ ẹro-o, kidie o vwo ọvuọvo vwẹ usun rayen re ruru vwẹ odjahọ-ọn.
27 Ovie Agripa, wo se Emraro na gbuyota? Me riẹnre nẹ wo se ayen gbuyota.”
28 Ẹkẹvuọvo Agripa da ta kẹ Pọl nẹ: “O rhe che kri-i wo che ku vwe rhẹriẹ vwọ dia Onenikristi.”
29 Ọtiọyena Pọl da tanẹ: “Me rẹ Ọghẹnẹ nẹ, owenẹ ọ dia ọmọke krẹn yẹrẹ ọke ogronron, nẹ e jẹ ọ dia owẹ ọvo-o, ẹkẹvuọvo ji te ihwo eje ri nyo vwe nonẹna, nẹ ayen rhe dia kirobo re me hepha na, ababọ rẹ ejọnrọn nana.”
30 Ọyena vwọ wan nu ovie na de vrẹn, ọtiọyen ji te osun na kugbe Bẹnaesi kugbe eshare re vẹ ayen gbe chidia na.
31 Ẹkẹvuọvo rẹ ayen vwọ yanran na, kẹ ayen ta kẹ ohwohwo nẹ: “Ọshare nana ru emu vuọvo ro fo ughwu yẹrẹ ekanrọ-ọ.”
32 Agripa da ta kẹ Fẹstọs nẹ: “Ọ dianẹ kẹ ọshare nana mu apili rhe Siza-a* mane jẹ e siobọno.”
Eta rehẹ obotọ na
^ Yẹrẹ “ẹgborho.”
^ Vwẹ Grik, “brorhiẹn.”
^ Vwẹ Grik, “Womarẹ wọ vwọ vwẹ owọ dje ọkpọ rẹ unu rọyen pha piọpiọpiọ.” Ọnana ọkpọ re vwo suẹn eranvwe.
^ Yẹrẹ “mu ẹdjọ rọyen rhe Siza-a.”