Iruo rẹ Iyinkọn Na 28:1-31
28 Avwanre vwọ rhẹrhẹ wontọ gbẹrhẹnẹdẹ nu, avwanre da rhe riẹn nẹ Mọlta yen e se otọ yena rẹ ame riariẹ phiyọ na.
2 Ihwo re jẹ ejajẹ ọrhorha na* de dje uruemu esiri rẹ oghẹresan kẹ avwanre. Fikirẹ osio rọ rhọ kugbe ekpahen na, ayen de koko erhanre phiyọ ji dede avwanre vwọrẹ ẹguọnọ.
3 Ẹkẹvuọvo ọke ri Pọl vwọ ghwẹ irhe phiyọ erhanre na, ọrọdekọ* ọvo de nẹ evun rọyen rhe fikirẹ ogidi erhanre na, ọ da sa akon mu obọ rọyen.
4 Ọke rẹ ihwo re jẹ ejajẹ ọrhorha na vwọ mrẹ ọrọdekọ na ro phieghe vwẹ obọ rọyen, kẹ ayen ta kẹ ohwohwo nẹ: “Vwọrẹ uyota ọshare nana ozighẹ, dede nẹ o nẹ abadi na totọ gbẹrhẹnẹdẹ, jẹ Orhiẹn rẹ Abavo* rhọnvwe kẹ nẹ ọ je dia akpọ-ọ.”
5 Ẹkẹvuọvo o de kpogho ọrọdekọ na phiyọ erhanre na, jẹ emu vuọvo ruro-o.
6 Ẹkẹvuọvo kẹ ayen rhẹro rọyen nẹ ọ cha vwọ yẹrẹ o che she teyen otọ siẹvuọvo, o mi ghwu. Ọke rẹ ayen vwọ hẹrhẹ ọke grongron nu, rẹ ayen je vwọ mrẹ nẹ emu vuọvo phia kẹ-ẹ, ayen de wene ẹwẹn, kẹ ayen tanẹ ọghẹnẹ yen o ruẹ.
7 Asaọkiephana ọshare ọvo re se Pọbliọs rọ dia osun rẹ otọ yena rẹ ame riariẹ phiyọ na vwo etọ vwẹ ekogho yena, o de dede avwanre je nabọ ghọ avwanre ẹdẹ erha.
8 Ọke yena jẹ ọsẹ ri Pọbliọs hẹ ehwa rẹ ọga, odo kugbe evun etue* kpokpo, Pọl da ro uwevwin bro ra, ọ da nẹrhovwo, ọ da ghwabọ kpahọn, o de sivwon.
9 Ọnana vwọ wan nu, ihwo ri chekọ re muọga vwẹ otọ yena rẹ ame riariẹ phiyọ na ki bro cha, o mi sivwin ayen.
10 Ayen ji brọghọ phiyọ avwanre oma rẹ ayen vwọ kẹ avwanre okẹ buebun, ọke rẹ avwanre vwọ ro okọ rẹ avwanre cha vwọ yanran, ayen da ghwẹ kemu kemu rẹ avwanre guọnọre vwọ kẹ avwanre.
11 Emeranvwe erha vwọ wan nu, avwanre da ro okọ ọvo ro vwo ema rẹ “Emọ ri Zus.” Okọ na nẹ Alẹzandria rhe, ọ da daji otọ yena rẹ ame riariẹ phiyọ na vwẹ ọke ekpahen na.
12 Avwanre vwo bi te unuerhuru ri Sirakọs, avwanre da dia etiyin ẹdẹ erha;
13 vwo nẹ etiyin avwanre de bi yanran, avwanre de rhi te Rhegiọm. Ẹdẹ ọvo vwọ wan nu, odju ọvo de dju nẹ obọrhen ọnre na rhe, avwanre de bi re te Puteoli vwẹ ẹdẹ rivẹ.
14 Avwanre da mrẹ iniọvo vwẹ etiyin, ayen da rẹ avwanre nẹ avwanre nene ayen dia ẹdẹ ighwrẹn, ọtiọyena avwanre de kpo Rom.
15 Iniọvo rehẹ Rom vwo nyo kpahen avwanre, ayen da rhe vwa avwanre vwẹ Asan Eki rẹ Apiọs kugbe asan re se Iwevwin Erha.* Ọke rẹ avwanre vwọ mrẹ ayen, Pọl da kpẹvwẹ Ọghẹnẹ, o de fiudugberi.
16 Avwanre rhi vwo te Rom, a da vwẹ uphẹn kẹ Pọl nẹ ọyen ọvo dia vẹ isodje rọ rhẹrẹ.
17 Ẹkẹvuọvo ẹdẹ erha vwọ wan nu, o de se eshare ri Ju ri titiri koko. Ayen vwo siomakoko, ọ da ta kẹ ayen nẹ: “Iniọvo, dede nẹ mi ru emu vuọvo rọ vwọso ihwo na yẹrẹ ẹkuruemu rẹ esẹ rẹ avwanre ride-e, jẹ e mu vwe phiyọ uwodi vwẹ Jerusalẹm, a da vwẹ ovwẹ kẹ ihwo ri Rom.
18 Ọke rẹ ayen vwọ fuẹrẹn ovwẹ nu, kẹ ayen guọnọ siobọnu uvwe kidie ayen mrẹ orọnvwọn ọvuọvo rọ cha nẹrhẹ e hwe vwe-e.
19 Jẹ ọke rẹ ihwo ri Ju na vwọ sen, mi de mu apili rhe Siza,* ẹkẹvuọvo ọ dia kidie nẹ mi vwo obo ri mi che gun vwọso ẹgborho mẹ-ẹ.
20 Ọtiọyena fikirẹ ọnana yen me vwọ tanẹ me guọnọ mrẹ ovwan je ta ota kẹ ovwan, kidie fikirẹ iphiẹrophiyọ rẹ Izrẹl vwori na ọyen a vwọ vwẹ ọjọnrọn kanre ovwẹ na.”
21 Ayen da ta kẹ nẹ: “Avwanre je rhe mrẹ ọbe vuọvo ro nẹ Judia rhe kpahen owẹ-ẹ, yẹrẹ kẹ oniọvo ọvo vwẹ usun rẹ iniọvo ri nẹ oboyin rhe na niyẹnrẹn yẹrẹ ta ota ọbrabra kpahen owẹ-ẹ.
22 Ẹkẹvuọvo avwanre niro nẹ ofori rẹ avwanre vwọ riẹn oborẹ wo rorori, kidie vwọrẹ uyota, ihwo ta ota vwọsua ẹko nana vwẹ kasan kasan.”
23 Asaọkiephana ayen da rhuẹrẹ ẹdẹ rẹ ayen vẹ ọyen cha vwọ vwoma, ihwo ri bun nọ erẹsosuọ na de bro rhe asan rọ dia. O de dje ota na fiotọ kẹ ayen nẹ urhiọke re te ovwọnvwọn, ro vwo soseri ro fiotọ kpahen Uvie rẹ Ọghẹnẹ, rere ọ sa vwọ reyọ Urhi ri Mosis kugbe Ẹbe rẹ Emraro na vwo wene iroro rayen kpahen Jesu.
24 Evo ki se obo rọ ta na gbuyota; ẹkẹvuọvo efa rhọnvwe segbuyota-a.
25 Kidie nẹ jẹ ohwohwo enyo vwomaphia vwẹ ohri rayen, kẹ ayen vrẹn nẹ etiyin, Pọl da ta ota nana:
“Ẹwẹn ọfuanfon na ghene womarẹ ọmraro Aizaya ta kẹ esẹ rẹ ovwan ride
26 nẹ, ‘Bru ihwo nana ra wọ ta kẹ ayen nẹ: “Vwọrẹ uyota ovwan che nyo ẹkẹvuọvo o vwo ọke vuọvo rẹ ovwan che vwo vwo ẹruọ-ọ, vwọrẹ uyota ovwan che ni ẹkẹvuọvo o vwo ọke vuọvo rẹ ovwan cha vwọ mrẹ-ẹ.
27 Kidie ubiudu rẹ ihwo nana rhe dia gangan re, ayen vwẹ erhọ rayen nyo ẹkẹvuọvo ayen kpahenre-e, ayen rhurhu ẹro rayen rere ayen vwo jẹ orẹ ẹmrẹ, ayen vwo jẹ erhọ rayen evwo nyẹme, ayen vwo jẹ ubiudu rayen evwo vwo ẹruọ, rẹ ayen de kurhẹriẹ rere mi sivwin ayen.”’
28 Ọtiọyena ovwan gba riẹn nẹ a reyọ usivwin nana ro nẹ obọ rẹ Ọghẹnẹ rhe na vwo rhe ẹgborho na re; vwọrẹ uyota, ayen cha kerhọ rọyen.”
29 *——
30 Ọtiọyena ọ da dia etiyin ọsoso ẹgbukpe ivẹ vwẹ uwevwin rọ reyọre komobọ, jẹ ọ nabọ dede ihwo ri bruro rhe eje vwọrẹ ẹguọnọ,
31 ghwoghwo Uvie rẹ Ọghẹnẹ na kẹ ayen, ji yono ayen kpahen Ọrovwori na Jesu Kristi vẹ ugbomọphẹ rẹ ota rode,* emu vuọvo dobọ rọyen ji-i.
Eta rehẹ obotọ na
^ Yẹrẹ “Ihwo re dia asan na.”
^ Yẹrẹ “asiweri.”
^ Vwẹ Grik, “Di′ke, ọ sa dianẹ ota nana shekpahen ọghẹnẹ rẹ aye rọ reihri.”
^ Yẹrẹ “evun ọghwia.”
^ Ọnana asan ra da riemu ji rovwoma.
^ Yẹrẹ “mi de mu ẹdjọ mẹ rhe Siza.”
^ Owọrota nana hẹ imanuskripti rẹ awanre evo-o, imuẹro je herọ nẹ ọ dia ẹbẹre ọvo rẹ Isiesi Ọfuanfon na-a.
^ Yẹrẹ “vẹ uduoyivwin.”