Jọn 10:1-42
10 “Uyota, uyota me ta kẹ ovwan nẹ, ohwo rọ wan ẹchẹ ro evunrẹ ogba rẹ igodẹ na-a, ẹkẹvuọvo rọ wan asan ọfa yerin ruọ, ohwo yena oji kugbe ogborhugborho.
2 Ẹkẹvuọvo ohwo rọ wan ẹchẹ ruọ yen osuigodẹ na.
3 Ohwo rọ rhẹrẹ ẹchẹ na rhie kẹ ohwo nana, igodẹ na nyo urhuru rọyen. Ọ vwẹ odẹ rẹ igodẹ robọ rọyen na vwo se ayen, o mi sun ayen phia.
4 Ọke rọ da reyọ igodẹ rọyen eje phia nu, kọ kobaro kẹ ayen, igodẹ na mi nene kidie ayen riẹn urhuru rọyen.
5 O vwo ọke vuọvo rẹ ayen che vwo nene ọrhorha-a, ẹkẹvuọvo ayen cha djẹ kẹ, kidie ayen riẹn urhuru rẹ erhorha-a.”
6 Jesu ru udje nana kẹ ayen, ẹkẹvuọvo ayen vwo ẹruọ rẹ obo rọ ta kẹ aye-en.
7 Ọtiọyena Jesu da rhoma tanẹ: “Uyota, uyota me ta kẹ ovwan nẹ, mẹvwẹ yen ẹchẹ rẹ igodẹ na.
8 Ihwo eje re rhere rhe tanẹ ayen omẹvwẹ, ayen iji kugbe igborhugborho; ẹkẹvuọvo igodẹ na kerhọ raye-en.
9 Mẹvwẹ yen ẹchẹ na; kohwo kohwo rọ wan oma mẹ ruọ che vwo usivwin, ohwo yena cha ro evun rọyen, ro otafe, je mrẹ odi re.
10 Oji cha-a jokpanẹ o rhi cho, hwe, je ghwọrọ. Me rhere rere ayen se vwo vwo arhọ, ji vwo gbidiki.
11 Mẹvwẹ yen omamọ osuigodẹ na; omamọ osuigodẹ na vwẹ arhọ* rọyen kpahotọ fikirẹ igodẹ na.
12 Ohwo ra reyọ phiyọ iruo na, rọ dia osuigodẹ-ẹ, rọ dia ọyen ji vwo igodẹ na-a, djẹ jẹ igodẹ na vwo siẹrẹ ọ da mrẹ iwofu* rọ cha—iwofu* na mi fru ayen reyọ je hra ayen—
13 kidie ọyen ohwo ra reyọ phiyọ iruo, ọ davwerhọ rẹ igodẹ na-a.
14 Mẹvwẹ yen omamọ osuigodẹ na. Me riẹn igodẹ mẹ, igodẹ mẹ je riẹn vwẹ,
15 kirobo rẹ Ọsẹ na riẹn vwẹ, re me je riẹn Ọsẹ na; me vwẹ arhọ* mẹ vwọ kpahotọ fikirẹ igodẹ na.
16 “Mi vwo igodẹ efa rehẹ evunrẹ ogba nana-a; me je cha vwẹ eyena rhe, kẹ ayen che nyo urhuru mẹ, kẹ ayen cha dia ẹko rẹ igodẹ ọvuọvo, osuigodẹ ọvuọvo.
17 Ọnana yen sorọ Ọsẹ na vwo vwo ẹguọnọ mẹ, kidie me vwẹ arhọ* mẹ vwọ kpahotọ rere me sa vwọ rhoma vwo.
18 O vwo ohwo vuọvo rọ reyerọ mie vwe-e, ẹkẹvuọvo ẹwẹn robọ mẹ yen me vwọ reyọ vwọ kpahotọ. Mi vwo ogangan me vwọ reyọ vwọ kpahotọ, mi ji vwo ogangan me vwọ reyọ rhivwin. Ọsẹ mẹ yen vwẹ iji nana kẹ vwẹ.”
19 Ohẹriẹ da rhoma dia ohri rẹ ihwo ri Ju na fikirẹ eta nana.
20 Buebun rayen ke tanẹ: “O vwo ẹwẹn rẹ Idẹbono, uyovwin rọyen gbare-e. Diesorọ ovwan vwọ kerhọ rọyen?”
21 Efa da tanẹ: “Enana dia eta rẹ ohwo ro vwo ẹwẹn rẹ Idẹbono-o. Ẹwẹn rẹ Idẹbono che se rhiẹro rẹ ihwo ri rhuẹro-o, gbanẹ o se ruo?”
22 Vwẹ ọke yena, a ria Orẹ rẹ Ẹvwọkpahotọ vwẹ Jerusalẹm. Ọyen ọke ekpahen,
23 jẹ Jesu yan vwevunrẹ uwevwin rẹ ẹga na vwẹ ugana ri Solomọn.
24 Ihwo ri Ju na da riariẹ phiyọ, kẹ ayen ta kẹ nẹ: “Bro ọke yen wọ cha nẹrhẹ avwanre* dia ẹdia rẹ otighi nana kri te? Ọ da dianẹ wẹwẹ yen Kristi na, vuẹ avwanre phephẹn.”
25 Jesu da kpahen kẹ ayen nẹ: “Me vuẹ ovwan, ẹkẹvuọvo ovwan segbuyota-a. Iruo ri mi ruẹ vwẹ odẹ rẹ Ọsẹ mẹ na, enana soseri kpahan ovwẹ.
26 Ẹkẹvuọvo ovwan segbuyota-a, kidie ovwan dia igodẹ mẹ-ẹ.
27 Igodẹ mẹ nyo urhuru mẹ, me riẹn ayen, ayen nene uvwe.
28 Me kẹ ayen arhọ ri bẹdi bẹdẹ, o vwo ọke vuọvo rẹ ayen cha vwọ ghwọrọ-ọ, o vwo ohwo vuọvo ro ji che fru ayen nẹ obọ mẹ-ẹ.
29 Oborẹ Ọsẹ mẹ vwọ kẹ vwẹ, ọyen emu rọ rho vrẹ erọnvwọn ri chekọ eje, o vwo ohwo vuọvo ro se fru ayen nẹ obọ rẹ Ọsẹ na-a.
30 Mẹ vẹ Ọsẹ na ọvo.”*
31 Obọfa, ihwo ri Ju na da tọrọ ikuta rẹ ayen vwo phio.
32 Jesu da kpahen kẹ ayen nẹ: “Mi dje iruo esiri buebun kẹ ovwan nẹ obọ rẹ Ọsẹ na rhe. Ọvọ vwẹ usun rẹ iruo yena yen ovwan guọnọ vwẹ fiki rọyen vwo phi vwe na?”
33 Ihwo ri Ju na da kpahen kẹ nẹ: “Avwanre guọnọ phi we, ọ dia fikirẹ iruo esiri-i, ẹkẹvuọvo fikirẹ ota rẹ ẹgua; kidie dede nẹ wẹwẹ ohworakpọ, wọ vwẹ oma wẹn vwo ru ọghẹnẹ.”
34 Jesu da kpahen kẹ ayen nẹ: “E rhe sio phiyọ evunrẹ Urhi rẹ ovwan nẹ, ‘Me tare nẹ: “Ovwan eghẹnẹ”’?*
35 Ọ da dianẹ o se ihwo rẹ ota rẹ Ọghẹnẹ vwọso ‘eghẹnẹ’—dede nẹ e che se wene eta rẹ isiesi ọfuanfon na-a—
36 kẹ ovwan ta kẹ vwẹ rẹ Ọsẹ na ru fon ro ji ji rhe akpọ na nẹ, ‘Wọ ta ota rẹ ẹgua,’ kidie nẹ me tare nẹ, ‘Mẹvwẹ Ọmọ rẹ Ọghẹnẹ’?
37 Ọ rha dia iruo rẹ Ọsẹ mẹ yen mi ruẹ-ẹ, ovwan se vwe gbuyota-a.
38 Ẹkẹvuọvo ọ da dianẹ mi ruẹ ayen, ovwan rha tobọ se vwe gbuyota dede-e, ovwan se iruo na gbuyota, rere ovwan sa rhe vwọ riẹn, ovwan me je rha riẹn nẹ Ọsẹ na vẹ ovwẹ vwo oyerinkugbe, me vẹ Ọsẹ na ji vwo oyerinkugbe.”
39 Ọtiọyena ayen da davwẹngba rẹ ayen vwọ rhoma shabọ phiyọ, ẹkẹvuọvo ọ da va ayen abọ.
40 Ọ da rhoma kpo obovrẹ ri Jọdan na kpo asan ri Jọn de bru ihwo phiyame ẹsosuọ, ọ da dia etiyin.
41 Ihwo buebun de bro rhe, kẹ ayen tanẹ: “Jọn ru oka vuọvo-o, ẹkẹvuọvo erọnvwọn eje ri Jọn ta kpahen ọshare nana uyota.”
42 Ihwo buebun vwẹ etiyin de vwo esegbuyota kpahọn.
Eta rehẹ obotọ na
^ Yẹrẹ “erhi.” Ni Eta re Vwomaphia.
^ Eranvwe rọ djoma rọ họhọ eranko.
^ Eranvwe rọ djoma rọ họhọ eranko.
^ Yẹrẹ “erhi.” Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “nẹrhẹ erhi rẹ avwanre.” Ni Eta re Vwomaphia.
^ Yẹrẹ “Mẹ vẹ Ọsẹ na yerẹn kuẹgbe.”
^ Yẹrẹ “Ovwan ihwo re họhọ eghẹnẹ.”