Jọn 16:1-33
16 “Me ta eta nana kẹ ovwan rere ovwan vwo jẹ owọ ẹkprọ.
2 Ihwo cha djẹ ovwan nẹ sinagọg na. Vwọrẹ uyota, unọke na cha rẹ kohwo kohwo ro hwe ovwan che vwo roro nẹ ọyen vwẹ ẹga ọfuanfon vwọ kẹ Ọghẹnẹ.
3 Ẹkẹvuọvo ayen che ru erọnvwọn nana kidie ayen je rhe riẹn Ọsẹ na yẹrẹ omẹvwẹ-ẹ.
4 Dedena me vuẹ ovwan erọnvwọn nana rere ọke rẹ ayen cha vwọ phia de te, ovwan vwọ karophiyọ nẹ me vuẹ ovwan kpahen ayen jovwo.
“Me vuẹ ovwan erọnvwọn nana ẹsosuọ-ọ, kidie mẹ vẹ ovwan herọ.
5 Ẹkẹvuọvo asaọkiephana mi brẹ Ohwo ro ji vwe rhe na ra; dedena o vwo ọvuọvo vwẹ usun rẹ ovwan na rọ nọ vwẹ nẹ, ‘Tivọ yen wọ ra-a?’
6 Ẹkẹvuọvo kidie nẹ me vuẹ ovwan erọnvwọn nana, ọyen uvweri vwọ vọn ubiudu rẹ ovwan na.
7 Dedena uyota na yen me vuẹ ovwan na, fikirẹ erere rẹ ovwan yen me vwọ yanran na. Kidie me rha yanra-an, ọchuko na che bru ovwan rhe-e; ẹkẹvuọvo me da yanran, ki mi jo bru ovwan rhe.
8 Ọke rẹ ọyena da rhe, ọ cha vwẹ imuẹro kokoroko vwọ kẹ akpọ na, vwọ kpahen umwemwu, vwọ kpahen ọsoso, kugbe vwọ kpahen ẹdjọeguo:
9 ẹsosuọ vwọ kpahen umwemwu, kidie ayen vwo esegbuyota kpahen ovwẹ-ẹ;
10 ọyena da wan nu, kẹ vwọ kpahen ọsoso, kidie mi brẹ Ọsẹ na ra, ovwan rha cha mrẹ vwẹ ọfa-a;
11 Ọyena da wan nu, kẹ vwọ kpahen ẹdjọeguo, kidie a vwẹ osun rẹ akpọ nana vwo guẹdjọ nure.
12 Mi ji vwo erọnvwọn buebun re me cha vuẹ ovwan, ẹkẹvuọvo ovwan che se vwo ẹruọ rayen asaọkiephana-a.
13 Ẹkẹvuọvo ọke rẹ ọyena* da rhe, ẹwẹn rẹ uyota na, o che sun ovwan ro uyota na ejobi, kidie ọ dia ọhọ robọ rọyen yen ọ cha vwọ ta ota-a, ẹkẹvuọvo obo ro nyori yen ọ cha ta, ko che ghwoghwo erọnvwọn re cha na kẹ ovwan.
14 Ọyena cha vwẹ urinrin kẹ vwẹ, kidie ọ cha reyọ vwo nẹ obo re dia ọmẹ, ko che ghwoghwo kẹ ovwan.
15 Erọnvwọn eje rẹ Ọsẹ na vwori, emẹ. Ọyensorọ me vwọ tanẹ ọ cha reyọ vwo nẹ obo re dia ọmẹ, ko che ghwoghwo kẹ ovwan.
16 Vwẹ ọmọke krẹn ovwan rha cha mrẹ vwẹ-ẹ, vwẹ obọfa, vwẹ ọmọke krẹn kẹ ovwan cha mrẹ vwẹ.”
17 Ọtiọyena, evo vwẹ usun rẹ idibo rọyen da ta kẹ ohwohwo nẹ: “Die yen o mudiaphiyọ rọ vwọ ta kẹ avwanre nẹ, ‘Vwẹ ọmọke krẹn ovwan rha cha mrẹ vwẹ-ẹ, vwẹ obọfa, vwẹ ọmọke krẹn kẹ ovwan cha mrẹ vwẹ,’ kugbe nẹ, ‘kidie mi brẹ Ọsẹ na ra’?”
18 Ọtiọyena kẹ ayen tanẹ: “Die yen o mudiaphiyọ rọ vwọ tanẹ, ‘vwẹ ọmọke krẹn’? Avwanre riẹn obo rọ ta ota kpahan na-a.”
19 Jesu riẹnre nẹ ayen guọnọ nọ ọyen onọ, ọtiọyena ọ da ta kẹ ayen nẹ: “Ovwan nọ ohwohwo onọ nana kidie nẹ me tare nẹ: ‘Vwẹ ọmọke krẹn ovwan rha cha mrẹ vwẹ-ẹ, vwẹ obọfa, vwẹ ọmọke krẹn kẹ ovwan cha mrẹ vwẹ’?
20 Uyota, uyota me ta kẹ ovwan nẹ, ovwan cha viẹ ji vwerhe oma, ẹkẹvuọvo akpọ na cha ghọghọ; ovwan che vwere uvweri, ẹkẹvuọvo a cha rhẹriẹ uvweri rẹ ovwan kpo aghọghọ.
21 Ọke rẹ aye da chuvwiẹ, ọ mrẹ odjadja kidie unọke rọyen te re, ẹkẹvuọvo ọke ro de vwiẹ ọmọ na nu, ọ rha karophiyọ ukpokpogho na ọfa-a, fikirẹ aghọghọ nẹ e vwiẹ ohwo phiyọ akpọ na re.
22 Ọtiọyen ọ je hepha kẹ ovwan, ovwan vwere uvweri asaọkiephana; ẹkẹvuọvo me cha rhoma mrẹ ovwan, ubiudu rẹ ovwan kọ cha ghọghọ, o vwo ohwo vuọvo rọ cha reyọ aghọghọ rẹ ovwan mie ovwa-an.
23 Vwẹ ẹdẹ yena, ovwan cha nọ vwẹ onọ vuọvo kakaka-a. Uyota, uyota me ta kẹ ovwan nẹ, kemu kemu rẹ ovwan nokpẹn rọyen mie Ọsẹ na, ọ cha vwọ kẹ ovwan vwẹ odẹ mẹ.
24 Rhi te ọke nana ovwan je rhe nokpẹn rẹ orọnvwọn vuọvo vwẹ odẹ mẹ-ẹ. Ovwan nọ ka vwọ kẹ ovwan, rere aghọghọ rẹ ovwan sa vwọ dia vọnvọn.
25 “Me ta erọnvwọn nana kẹ ovwan womarẹ idje. Unọke na cha, re me rha cha ta ota kẹ ovwan womarẹ idje-e, ẹkẹvuọvo me cha ta ota kẹ ovwan phephẹn kpahen Ọsẹ na.
26 Vwẹ ẹdẹ yena, ovwan cha nọ mie Ọsẹ na vwẹ odẹ mẹ; ọnana me ta na, ọ dia mi vwiro mudiaphiyọ nẹ me cha nọ mie kẹ ovwa-an.
27 Kidie Ọsẹ na komobọ vwo ẹguọnọ rẹ ovwan, kidie ovwan vwo ẹguọnọ mẹ, ovwan ji segbuyota re nẹ me rhere kerẹ ohwo ro mudia kẹ Ọghẹnẹ.
28 Me rhere kerẹ ohwo ro mudia kẹ Ọsẹ na, me rhe akpọ na re. Asaọkiephana mi vrẹn nẹ akpọ na, mi brẹ Ọsẹ na ra.”
29 Idibo rọyen da tanẹ: “Nighere! Asaọkiephana wọ ta ota phephẹn re, wọ rha reyọ idje vwọ ta ota-a.
30 Asaọkiephana avwanre riẹnre nẹ wọ riẹn erọnvwọn eje, wọ rha guọnọ ohwo vuọvo rọ cha nọ wẹ onọ-ọ. Womarẹ ọnana avwanre segbuyota nẹ obọ rẹ Ọghẹnẹ yen wo nurhe.”
31 Jesu da kpahen kẹ ayen nẹ: “Ovwan segbuyota asaọkiephana re?
32 Nighere! Unọke na cha, vwọrẹ uyota, ọ rhire, rẹ ohwo ọvuọvo vwẹ usun rẹ ovwan na cha vwọ hra kpo uwevwin robọ rọyen, kẹ ovwan cha yanjẹ ovwẹ ọvo vwo. Ẹkẹvuọvo ọ dia omẹvwẹ ọvo yen herọ-ọ, kidie Ọsẹ na vẹ ovwẹ herọ.
33 Me ta erọnvwọn nana kẹ ovwan rere ovwan se vwo vwo ufuoma wan oma mẹ. Vwevunrẹ akpọ na, ovwan che vwo ukpokpogho, ẹkẹvuọvo ovwan fiudugberi! Mi phi akpọ na kparobọ re.”
Eta rehẹ obotọ na
^ Te “ọyena” vẹ “o” re vwo ruiruo vwẹ owọ 13 vẹ 14 na rionbọ kpo “ọchuko na” re vwo ruiruo vwẹ owọ 7. Jesu reyọ “ọchuko na” (ra vwọ ta ota kpahan ọshare vwẹ Grik) vwọ ta ota kpahen ẹwẹn ọfuanfon na rọ dia ohworakpọ-ọ na, kerẹsiẹ ra da mrẹ nẹ ohworakpọ.