Jọn 18:1-40
18 Ọke rọ vwọ ta eta nana nu, Jesu vẹ idibo rọyen de kpo ẹbẹre ochekọ rẹ Iyara ri Kidrọn, vwo kpo asan rẹ ogba ọvo hepha, ọ vẹ idibo rọyen da ro evun rọyen.
2 Asaọkiephana, Judas, ọ rọ shẹrẹ na je riẹn asan na, kidie Jesu vẹ idibo rọyen vwoma vwẹ etiyin abọ buebun re.
3 Ọtiọyena Judas da reyọ ẹko rẹ isodje kugbe elọkpa rẹ irherẹn ride na kugbe e rẹ ihwo ri Farisi na rhe asan na vẹ itọshi kugbe irhukpẹ kugbe ekuakua ofovwin.
4 Ọtiọyena Jesu rọ riẹn erọnvwọn eje re cha phia kẹ na da yan phia, ọ da ta kẹ ayen nẹ: “Ono yen ovwan guọnọ?”
5 Ayen da kpahen kẹ nẹ: “Jesu, ohwo ri Nazarẹt na.” Ọ da ta kẹ ayen nẹ: “Mẹvwẹ yen ohwo na.” Asaọkiephana Judas rọ shẹrẹ na vẹ ihwo na yen gbe mudia etiyin.
6 Ẹkẹvuọvo ọke ri Jesu vwọ vuẹ ayen nẹ, “Mẹvwẹ yen ohwo na,” ayen de si kpuko, ayen de she teyen otọ.
7 Ọtiọyena ọ da rhoma nọ ayen nẹ: “Ono yen ovwan guọnọ?” Ayen da tanẹ: “Jesu, ohwo ri Nazarẹt na.”
8 Jesu da kpahen nẹ: “Me vuẹ ovwan nẹ mẹvwẹ yen ohwo na. Ọtiọyena ọ da dianẹ omẹvwẹ yen ovwan guọnọ, ovwan jẹ enana yanran.”
9 Ọnana phiare rere obo rọ tare jovwo se vwo rugba nẹ: “Usun rẹ ihwo ru wọ vwọ kẹ vwẹ, o vwo ọvuọvo ro ghwru va vwẹ abọ-ọ.”
10 Ọtiọyena Saimọn Pita ro vwo ọlọkọ de yoro phia, ọ da nyavwe orhọ rẹ obọrhen rẹ odibo rẹ orherẹn rode na no. Odẹ rẹ odibo na Makọs.
11 Ẹkẹvuọvo Jesu da ta kẹ Pita nẹ: “Phi ọlọkọ na phiyọ ako rọyen. O rhe fo nẹ me da uko rẹ Ọsẹ na vwọ kẹ vwẹ?”
12 Ọtiọyena isodje na kugbe onotu rẹ isodje na kugbe elọkpa rẹ ihwo ri Ju na de shabọ phiyọ* Jesu, ayen da gba.
13 Ẹsosuọ, ayen de suon bru Anas ra, kidie ọyen ọgọ* ri Kaifas, ohwo rọ dia orherẹn rode vwẹ ukpe yena.
14 Vwọrẹ uyota, Kaifas yen ohwo rọ vwẹ uchebro kẹ ihwo ri Ju na nẹ o che fierere kẹ ayen rẹ ohwo ọvo vwo ghwu vwọ kẹ ihwo na.
15 Asaọkiephana Saimọn Pita kugbe odibo ọfa ki nene Jesu. Orherẹn rode na vughe odibo yena, o de nene Jesu ro egodo rẹ orherẹn rode na,
16 ẹkẹvuọvo Pita mudia otafe vwẹ asan ẹchẹ na.* Ọtiọyena odibo ochekọ na rẹ orherẹn rode na vugheri na da ro otafe rhe, ọ da ta ota kẹ ohwo rọ rhẹrẹ ẹchẹ na, ọ da reyọ Pita ruọ.
17 Odibo ọmọtẹ rọ rhẹrẹ ẹchẹ na da ta kẹ Pita nẹ: “Wẹwẹ dia ọvo vwẹ usun rẹ idibo rẹ ọshare nana rẹ, gbanẹ wẹwẹ ọvo vwẹ usun rayen?” Ọ da tanẹ: “Ẹjo.”
18 Asaọkiephana idibo na vẹ elọkpa na mudia riariẹ erhanre rẹ ayen vwẹ ibi koko phiyọ, kidie ekpahen herọ, kẹ ayen dia erhanre na. Pita ji nene ayen mudia etiyin, ọ dia erhanre.
19 Ọtiọyena orherẹn rode na da nọ Jesu enọ kpahen idibo rọyen kugbe uyono rọyen.
20 Jesu da kpahen kẹ nẹ: “Me ta ota kẹ akpọ na vwẹ azagba. Ọkieje yen mi vwo yono vwẹ sinagọg kugbe uwevwin rẹ ẹga na, asan rẹ ihwo ri Ju eje de koko, me ta ota vuọvo vwẹ odjahọ-ọn.
21 Diesorọ wọ vwọ nọ vwẹ enọ? Nọ ihwo ri nyo oborẹ me vuẹ ayen. Nighere! Enana riẹn oborẹ me tare.”
22 Rọ vwọ ta enana nu, ọvo vwẹ usun rẹ elọkpa ri mudia etiyin da ghwiẹ Jesu opharo, ọ da tanẹ: “Ọtiọyen wọ kpahan ota kẹ orherẹn rode na?”
23 Jesu da kpahen kẹ nẹ: “Ọ da dianẹ me ta ota ọvo chọ, soseri kpahen oborẹ me ta chọ na; ẹkẹvuọvo ọ da dianẹ oborẹ me tare na gbare, diesorọ wọ vwọ ghwiẹ vwẹ?”
24 Ọtiọyena Anas da gba, ọ da tanẹ a reyọ bru Kaifas orherẹn rode na ra.
25 Asaọkiephana Saimọn Pita mudia etiyin jẹ ọ dia erhanre. Ọtiọyena ayen da ta kẹ nẹ: “Wọ je dia ọvo vwẹ usun rẹ idibo rọyen rẹ, gbanẹ wẹwẹ ọvo vwẹ usun rayen?” Ọ da siọn, ọ da tanẹ: “Mẹvwẹ dia ọvo vwẹ usun raye-en.”
26 Ọvo vwẹ usun rẹ idibo rẹ orherẹn rode na, ohwo rẹ orua rẹ ọshare ri Pita nyavwe orhọ rọyen no na da tanẹ: “Me mrẹ wẹ vẹ ọyen vwevunrẹ ogba na, gbanẹ me mrẹ wẹ-ẹ?”
27 Ẹkẹvuọvo Pita da rhoma siọn, ugege yena ọhọ* de bo.
28 Ọtiọyena ayen de sun Jesu nẹ asan ri Kaifas kpo uwevwin rẹ osun na. Ayen ru ọnana vwẹ edegburhiọke. Ẹkẹvuọvo ayen komobọ ro evunrẹ uwevwin rẹ osun na-a, rere ayen vwo jẹ oma rayen egbe ẹgua, ayen sa vwọ re Orẹ rẹ Ọwanvrẹ na.
29 Ọtiọyena Pailet da ro otafe bru ayen rhe, ọ da tanẹ: “Emu ọbrabra vọ yen ovwan tare nẹ ọshare nana ruru?”
30 Ayen da kpahen kẹ nẹ: “Ọ da dianẹ ọshare nana ru obo re chọre-e,* avwanre rha vwọ kpahotọ kẹ wẹ-ẹ.”
31 Ọtiọyena Pailet da ta kẹ ayen nẹ: “Ovwan komobọ reyọ rere ovwan vwo guẹdjọ vwo nene urhi rẹ ovwan.” Ihwo ri Ju na da ta kẹ nẹ: “Urhi rhọnvwere nẹ avwanre hwe ohwo vuọvo-o.”
32 Ọnana phiare rere o vwo ru orugba rẹ ota ri Jesu tare vwo dje oka rẹ ughwu ro che ghwu kẹrẹkpẹ na.
33 Ọtiọyena Pailet da rhoma ro uwevwin rẹ osun na, o de se Jesu, ọ da ta kẹ nẹ: “Wẹwẹ yen Ovie rẹ ihwo ri Ju na?”
34 Jesu da kpahen nẹ: “Ọhọ robọ wẹn yen wọ vwọ nọ onọ nana, gbanẹ ihwo efa vuẹ wẹ kpahen ovwẹ?”
35 Pailet da kpahen nẹ: “Me dia ohwo ri Ju-u, gbanẹ mẹvwẹ ohwo ri Ju? Ẹgborho robọ wẹn kugbe irherẹn ride na yen vwẹ owẹ kpahotọ kẹ vwẹ. Die yen wo ruru?”
36 Jesu da kpahen nẹ: “Uvie mẹ dia ẹbẹre ọvo rẹ akpọ nana-a. Ọ da dianẹ Uvie mẹ ẹbẹre ọvo rẹ akpọ na jovwo, idibo mẹ rha họnre nẹ a vwẹ ovwẹ kpahotọ kẹ ihwo ri Ju-u. Ẹkẹvuọvo obo rọ hepha, Uvie mẹ nẹ akpọ nana rhe-e.”
37 Ọtiọyena Pailet da ta kẹ nẹ: “Oyoma, wẹwẹ ovie?” Jesu da kpahen nẹ: “Wẹwẹ komobọ yen tanẹ mẹvwẹ ovie. Fikirẹ ọnana yen e vwo vwiẹ vwẹ, fikirẹ ọnana me je vwọ rhe akpọ na, rere mi vwo soseri kpahen uyota na. Kohwo kohwo rọhẹ ẹbẹre rẹ uyota na kerhọ rẹ urhuru mẹ.”
38 Pailet da ta kẹ nẹ: “Die yen uyota?”
Rọ vwọ ta ọnana nu, ọ da rhoma ro otafe bru ihwo ri Ju na ra, ọ da ta kẹ ayen nẹ: “Me mrẹ orọnvwọn vuọvo ro ru chọ-ọ.
39 Vwọba, ovwan vwo ẹkuruemu rẹ ovwan vwọ tanẹ mi siobọnu ohwo ọvo kẹ ovwan vwẹ Orẹ rẹ Ọwanvrẹ na. Ọtiọyena, ovwan guọnọre nẹ mi siobọnu Ovie rẹ ihwo ri Ju na kẹ ovwan?”
40 Ayen da rhoma kperi phia nẹ: “Ọ dia ọshare nana-a, ẹkẹvuọvo Barabas!” Asaọkiephana Barabas oji.
Eta rehẹ obotọ na
^ Yẹrẹ “de mu.”
^ Yẹrẹ “ọyen ọsẹ rẹ aye.”
^ Yẹrẹ “vwẹ asan anurhoro na.”
^ Vwẹ Grik, “ogborhuane.”
^ Yẹrẹ “Ọ da dianẹ ọshare nana dia ohwo ro churhi-i.”