Jọn 19:1-42
19 Pailet da reyọ Jesu, ọ da fa.
2 Isodje na da vwẹ idjigbẹn vwo ru erhu rẹ ovie, ayen de kuo phiyọ uyovwin rọyen, ayen de ku ewun ro vwo ikọlọ rẹ ipọpo phiyọ,
3 kẹ ayen bro cha, jẹ ayen ta kẹ nẹ: “Avwanre yeren uwe, Ovie rẹ ihwo ri Ju!” Jẹ ayen dje opharo rọyen ẹghwiẹghwiẹ.
4 Pailet da rhoma ro otafe, ọ da ta kẹ ayen nẹ: “Nighere! me reyerọ ro otafe rere ovwan vwọ riẹn nẹ me mrẹ orọnvwọn vuọvo ro ru chọ-ọ.”
5 Ọtiọyena Jesu da ro otafe vẹ erhu rẹ ovie ra vwẹ idjigbẹn ru kugbe ewun ro vwo ikọlọ rẹ ipọpo re ku phiyọ na. Pailet da ta kẹ ayen nẹ: “Nighere! Ọshare na!”
6 Ẹkẹvuọvo, ọke rẹ irherẹn ride na kugbe elọkpa na vwọ mrẹ, ayen de kperi nẹ: “Kanrọ mu urhe! Kanrọ mu urhe!”* Pailet da ta kẹ ayen nẹ: “Ovwan komobọ reyọ rere ovwan re hwe,* kidie me mrẹ orọnvwọn vuọvo ro ru chọ-ọ.”
7 Ihwo ri Ju na da kpahen kẹ nẹ: “Avwanre vwo urhi, vwo nene urhi na ofori nẹ o ghwu, kidie ọ vwẹ oma rọyen vwo ru ọmọ rẹ Ọghẹnẹ.”
8 Ọke ri Pailet vwo nyo oborẹ ayen ta na, oshọ da rhoma muo ganphiyọ,
9 ọ da rhoma ro uwevwin rẹ osun na, ọ da ta kẹ Jesu nẹ: “Tivọ yen wo nurhe?” Ẹkẹvuọvo Jesu kpahen ota vuọvo kẹ-ẹ.
10 Ọtiọyena Pailet da ta kẹ nẹ: “Wọ kpahen ota vuọvo kẹ vwẹ? Wọ rha riẹn nẹ mi vwo ogangan mi vwo siobọnẹ uwe, mi ji vwo ogangan mi vwo hwe we?”*
11 Jesu da kpahen kẹ nẹ: “Wo che vwo ogangan vuọvo vwẹ enu mẹ kakaka-a jokpanẹ kẹ a rhọnvwe kẹ wẹ nẹ obenu rhe. Ọnana yen sorọ rẹ umwemwu rẹ ohwo rọ vwẹ ovwẹ kpahotọ kẹ wẹ na vwọ ma rho.”
12 Fikirẹ ọnana Pailet kọ guọnọ idjerhe ro vwo siobọno, ẹkẹvuọvo ihwo ri Ju na de kperi phia nẹ: “Wo de siobọnu ọshare nana, jẹ wọ dia ugbeyan ri Siza-a. Kohwo kohwo rọ vwẹ oma rọyen vwo ru ovie ta ota vwọsua Siza.”*
13 Ọtiọyena Pailet vwo nyo eta nana nu, ọ da reyọ Jesu ro otafe, o de chidia agbara rẹ ẹdjọeguo vwẹ asan ọvo re se nẹ Asan ra Vwẹ Ukuta Ru, ẹkẹvuọvo vwẹ Hibru, Gabata.
14 Asaọkiephana ọyen ẹdẹ rẹ Egbemuo rẹ Orẹ rẹ Ọwanvrẹ na; ọke hẹ omarẹ unọke resan na.* Ọ da ta kẹ ihwo ri Ju na nẹ: “Nighere! Ovie rẹ ovwan!”
15 Ẹkẹvuọvo ayen de kperi nẹ: “Reyọ yanran! Reyọ yanran! Kanrọ mu urhe!”* Pailet da ta kẹ ayen nẹ: “Mi hwe ovie rẹ ovwan?” Irherẹn ride na da kpahen nẹ: “Avwanre vwo ovie vuọvo-o jokparẹ Siza.”
16 Ọtiọyena ọ da vwọ kpahotọ kẹ ayen nẹ ayen re hwe mu urhe.
Ọtiọyena ayen da reyọ Jesu yanran.
17 Ọyen ọvo de mu urhe rẹ oja* na, ọ da yanran kpo asan re se Asan Ekpehruyovwin, e se Gọlgọta vwẹ Hibru.
18 Ayen da kanrọ mu urhe vwẹ etiyin kẹrẹ eshare ivẹ efa, ọvo hẹ ẹbẹre ọvo, ọvo hẹ ẹbẹre ochekọ, Jesu hẹ uherevie.
19 Pailet de ji si isiesi ọvo, o de phio phiyọ urhe rẹ oja na. O siro nẹ: “Jesu ohwo ri Nazarẹt, Ovie rẹ ihwo ri Ju na.”
20 Ihwo ri Ju buebun se isiesi nana, kidie asan ra da kanre Jesu mu urhe na kẹrẹ orere na, e siro vwẹ Hibru, Latin, kugbe Grik.
21 Ẹkẹvuọvo irherẹn ride rẹ ihwo ri Ju na da ta kẹ Pailet nẹ: “Wo sio nẹ, ‘Ovie rẹ ihwo ri Ju-u,’ ẹkẹvuọvo nẹ ọ tare nẹ, ‘Mẹvwẹ Ovie rẹ ihwo ri Ju.’”
22 Pailet da kpahen nẹ: “Oborẹ mi siri, mi siro nure.”
23 Asaọkiephana isodje na vwọ kanre Jesu mu urhe nu, ayen da reyọ iwun rẹ obotafe rọyen, ayen da ghare ayen kpo ẹkẹn ẹne, ọvo vwọ kẹ isodje ọvuọvo, ayen da je reyọ ewun rẹ obevun na. Ẹkẹvuọvo ewun rẹ obevun na vwo asan re de ko-o, e rhuonro nẹ obenu re te obotọ.
24 Ọtiọyena ayen da ta kẹ ohwohwo nẹ: “E jẹ avwanre bẹrẹ-ẹ, ẹkẹvuọvo e jẹ avwanre duvwun itẹ re vwo brorhiẹn rẹ ohwo rọ cha reyọ.” Ọnana phiare rere isiesi ọfuanfon na vwo rugba nẹ: “Ayen ghare iwun mẹ vwẹ ohri rayen, ayen de duvwun itẹ fikirẹ ewun mẹ.” Ọtiọyena isodje na ghini ru erọnvwọn nana.
25 Ẹkẹvuọvo ihwo nana mudia kẹrẹ urhe rẹ oja* ri Jesu na, oni rọyen kugbe oniọvo rẹ oni rọyen ọmọtẹ; Meri aye ri Klopas kugbe Meri Magdalini.
26 Ọtiọyena ọke ri Jesu vwọ mrẹ oni rọyen kugbe odibo ro vwo ẹguọnọ rọyen na ri mudia etiyin, ọ da ta kẹ oni rọyen nẹ: “Aye! Ni ọmọ wẹn!”
27 Ọ da rha ta kẹ odibo na nẹ: “Ni! Oni wẹn!” Vwo nẹ unọke yena yanran, odibo na da reyọ kpo uwevwin robọ rọyen.*
28 Ọnana vwọ wan nu, ọke ri Jesu vwọ riẹn nẹ asaọkiephana erọnvwọn ejobi rugba re, rere isiesi ọfuanfon na vwo rugba, ọ da tanẹ: “Urhuru rẹ ame si vwe.”
29 Ochẹ ọvo hẹ etiyin rọ vọnre vẹ iwaini rọ fiunu. Ọtiọyena ayen de phi ahworhẹ rọ vọnre vẹ iwaini rọ fiunu na phiyọ ugbẹn rẹ okankọn re se hisọp,* ayen da riẹn te unu rọyen.
30 Ọke rọ vwọ davwen iwaini rọ fiunu na nu, Jesu da tanẹ: “O re re!” rọ vwọ nuẹ uyovwin kpotọ, o de phi ẹwẹn phiyọ.*
31 Rọ vwọ dianẹ ọyen ẹdẹ rẹ Egbemuo na, rere ugboma rayen vwo jẹ urhe rẹ oja na ẹdia vwẹ Ẹdẹ Urovwoma na (kidie Ẹdẹ Urovwoma yena ọrode), ihwo ri Ju na da vuẹ Pailet nẹ e vwirhin awọ rayen rere e mu ugboma rayen yanran.
32 Ọtiọyena isodje na da rhe, ayen de vwirhin awọ rẹ ọshare rẹsosuọ na kugbe e rẹ ọshare ochekọ rọhẹ enu rẹ urhe kẹrẹ na.
33 Ẹkẹvuọvo ayen vwo te asan ri Jesu hepha, ayen da mrẹ nẹ o ghwure, ọtiọyena ayen rhe vwirhin awọ rọye-en.
34 Ẹkẹvuọvo ọvo vwẹ usun rẹ isodje na da vwẹ oshuẹ vwo duvwun ẹfẹn rọyen, ugege yena ọbara vẹ ame de hwẹ norhe.
35 Ọ rọ mrẹrẹ na yen soseri nana, oseri rọyen uyota, ọ riẹnre nẹ oborẹ ọyen ta uyota, rere ovwan ji se vwo segbuyota.
36 Vwọrẹ uyota, erọnvwọn nana phiare rere isiesi ọfuanfon na se vwo rugba nẹ: “E che vwirhin ubeku rọyen vuọvo-o.”*
37 Obọfa, asan ọfa vwẹ isiesi ọfuanfon na tare nẹ: “Ayen che ni ọ rẹ ayen duvwunru na.”
38 Asaọkiephana rẹ enana vwọ wan nu, Josẹf rẹ Arimatia, odibo ri Jesu ẹkẹvuọvo ọ rẹ odjahọn fikirẹ oshọ rẹ ihwo ri Ju na, da nọ Pailet sẹ ọyen se mu ugboma ri Jesu yanran. Pailet da rhọnvwe kẹ, ọtiọyena ọ da rhe, o de mu ugboma na yanran.
39 Nikodimọs, ọshare ro bruro rhe vwẹ ason vwẹ obọ rẹsosuọ na da je rhe, o mu imai kugbe alo re ku kugbe ro vwo onyẹ ro te omarẹ ipandi ujorin* rhe.
40 Ọtiọyena ayen de mu ugboma ri Jesu, ayen de phi erọnvwọn ri gbon phanphanphan na phiyọ emwa iyoyovwin vwọ pharọ vwo nene ẹkuruemu rẹ orivwin esho rẹ ihwo ri Ju.
41 Asaọkiephana ogba ọvo hẹ asan re de hwe na,* ushi* kpokpọ ọvo re ji rhi shi ohwo phiyọ dẹvo-o hẹ evunrẹ ogba na.
42 Kidie nẹ ọyen ẹdẹ rẹ Egbemuo rẹ ihwo ri Ju na, ushi na je kẹrẹ etiyin, ayen de mu Jesu phiyọ etiyin.
Eta rehẹ obotọ na
^ Yẹrẹ “Hwe mu urhe! Hwe mu urhe!”
^ Yẹrẹ “rere ovwan re hwe mu urhe.”
^ Yẹrẹ “hwe we mu urhe?”
^ Yẹrẹ “Kohwo kohwo rọ vwẹ oma rọyen vwo ru ovie vwọsua Siza.”
^ Kọyen, omarẹ ughọjọ 12 rẹ oghẹruvo.
^ Yẹrẹ “Hwe mu urhe!”
^ Ni Eta re Vwomaphia.
^ Ni Eta re Vwomaphia.
^ Kọyen, uwevwin rẹ odibo na.
^ Ni Eta re Vwomaphia.
^ Yẹrẹ “o de ghwu.”
^ Yẹrẹ “A cha guọghọ ubeku rọyen vuọvo-o.”
^ Kọyen, ipandi rẹ ihwo ri Rom. Ipandi ọvo rẹ ihwo ri Rom, omarẹ igramu 327.
^ Yẹrẹ “asan re de hwe mu urhe na.”
^ Yẹrẹ “ushi rẹ ẹkarophiyọ.”