Jọn 2:1-25
2 Vwẹ ẹdẹ rerha, e de ru irueru orọnvwe ọvo vwẹ Kena ri Galili, oni ri Jesu hẹ etiyin.
2 E ji durhie Jesu vẹ idibo rọyen kpo irueru orọnvwe na.
3 Ọke rẹ iwaini na vwọ joma re re, oni ri Jesu da ta kẹ nẹ: “Ayen vwo iwaini-i.”
4 Ẹkẹvuọvo Jesu da ta kẹ nẹ: “Aye, mavọ ọyena vwo te vwe vẹ owẹ?* Unọke mẹ ji rhi te-e.”
5 Oni rọyen da ta kẹ ihwo ri gbodibo na nẹ: “Ovwan ru kemu kemu rọ vuẹ ovwan.”
6 Asaọkiephana echẹ rẹ ame esan ra vwẹ ukuta ru hẹ etiyin kirobo rẹ urhi rẹ orufon rẹ ihwo ri Ju tare, ọvuọvo rayen sa gba ovwanvwọ rẹ ame* ivẹ yẹrẹ erha.
7 Jesu da ta kẹ ayen nẹ: “Ovwan vo ame vọn echẹ na.” Ọtiọyena ayen de vo ame vọn ayen te unu.
8 Ọ da ta kẹ ayen nẹ: “Ovwan gba jẹ no rere ovwan muo rhe ọrọvwẹrote irueru na.” Ọtiọyena ayen de muo yanran.
9 Ọke rẹ ọrọvwẹrote irueru na vwọ davwen ame re hirhephiyọ iwaini re na, kidie nẹ ọ riẹn asan ro nurhe-e (dede nẹ idibo re jẹ ame na riẹnrẹ), ọrọvwẹrote irueru na de se ọshare ọpha na
10 ọ da ta kẹ nẹ: “Kohwo kohwo ke muẹ omamọ rẹ iwaini na cha, ọke rẹ udi de muẹ ihwo re, o ki muẹ ọ rọ dia omamọ-ọ na cha. Wọ sẹro rẹ omamọ rẹ iwaini na rhi te ọke nana.”
11 Jesu ru ọnana vwẹ Kena ri Galili kerẹ ọtonphiyọ rẹ eka rọyen, o de dje urinrin rọyen phia, idibo rọyen de vwo esegbuyota kpahọn.
12 Ọnana vwọ wan nu, ọ vẹ oni rọyen kugbe iniọvo rọyen kugbe idibo rọyen de kpo Kepanọm, ẹkẹvuọvo ayen ghwọrọ ẹdẹ buebun vwẹ etiyi-in.
13 Asaọkiephana Orẹ rẹ Ọwanvrẹ rẹ ihwo ri Ju na sikẹre re, Jesu de kpo Jerusalẹm.
14 Ọ da mrẹ ihwo re shẹ erhuẹn kugbe igodẹ kugbe ilekuku vwẹ uwevwin rẹ ẹga na, ọtiọyen ji te ihwo ri wene igho ri chidia.
15 Ọtiọyena rọ vwọ reyọ ifi vwo ru uphiaphia nu, ọ da djẹ ihwo eje ri vwo igodẹ kugbe erhuẹn na ro otafe rẹ uwevwin rẹ ẹga na, o de ku igho rẹ ihwo ri wene igho na kuotọ je bọvwọn imẹjẹ rayen rhu.
16 Ọ da ta kẹ ihwo re shẹ ilekuku na nẹ: “Ovwan mu erọnvwọn nana nẹ etinẹ! Ovwan rha vwẹ uwevwin rẹ Ọsẹ mẹ vwo ruẹ uwevwin rẹ ekiẹchuọ-ọ!”*
17 Idibo rọyen da karophiyọ nẹ e siro nẹ: “Oruru rẹ uwevwin wẹn che mu vwe rọ.”
18 Ọtiọyena ihwo ri Ju na da kpahen kẹ nẹ: “Oka vọ yen wo se dje kẹ avwanre, rọ vwọ dianẹ wo ruẹ erọnvwọn nana?”
19 Jesu da kpahen kẹ ayen nẹ: “Ovwan guọghọ uwevwin rẹ ẹga nana, ke me cha vwẹ ẹdẹ erha vwọ bọn.”
20 Ihwo ri Ju na da tanẹ: “Ikpe 46 yen a vwọ bọn uwevwin rẹ ẹga nana, wọ cha bọn vwẹ ẹdẹ erha?”
21 Ẹkẹvuọvo ọ ta ota kpahan uwevwin rẹ ẹga rẹ ugboma rọyen.
22 Ọke ra vwọ kparọ vrẹn nẹ ughwu, idibo rọyen da karophiyọ nẹ ọkieje yen ọ vwọ ta ọnana, ayen de vwo esegbuyota kpahen isiesi ọfuanfon na kugbe oborẹ Jesu tare.
23 Ẹkẹvuọvo ọke rọ vwọ hẹ Jerusalẹm vwẹ Orẹ rẹ Ọwanvrẹ na, ihwo buebun de vwo esegbuyota kpahen odẹ rọyen ọke rẹ ayen vwọ mrẹ eka ro ruẹ.
24 Ẹkẹvuọvo Jesu phi oma rọyen phiyọ obọ raye-en kidie ọ riẹn ayen eje
25 ọ je guọnọ ohwo vuọvo ro che soseri kpahen ohworakpọ-ọ, kidie ọ riẹn obo rehẹ evun rẹ ohworakpọ.
Eta rehẹ obotọ na
^ Vwẹ Grik, “Die yen te vwe vẹ owẹ, aye?” Ọnana ota ro djerephia nẹ ọ senre. “Aye” ro sere na dia oka ri jẹ ọghọ emuo-o.
^ Ọ sa dianẹ ovwanvwọ rẹ ame na ovwanvwọ rẹ ibati rọ vẹ Ilita 22 (igalọni 5.81) gba dia abavo.
^ Yẹrẹ “vwo ruẹ afieki-i.”