Jọn 21:1-25
21 Ọnana vwọ wan nu, Jesu da rhoma vwomaphia kẹ idibo na vwẹ abadi ri Taiberias. Ọ vwomaphia vwẹ idjerhe nana.
2 Ihwo ri siomakoko yen Saimọn Pita, Tọmọs (ohwo re se Ejimẹ na), Nataniẹl ro nẹ Kena ri Galili rhe, emọ ri Zẹbẹdi kugbe idibo rọyen ivẹ efa.
3 Saimọn Pita da ta kẹ ayen nẹ: “Mi kpo iyerin ehwe.” Ayen da ta kẹ nẹ: “Avwanre che nene uwe.” Ayen da yanran, ayen da ro okọ, ẹkẹvuọvo vwẹ ason yena ayen hwe erin vuọvo-o.
4 Rẹ ọke vwo rhie cha re, Jesu de mudia orhoma rẹ abadi na, ẹkẹvuọvo idibo na riẹnre nẹ ọyen Jesu-u.
5 Ọtiọyena Jesu da ta kẹ ayen nẹ: “Emọ, ovwan vwo emu vuọvo rẹ ovwan cha re-e, gbanẹ ovwan vwori?” Ayen da kpahen nẹ: “Ẹjo!”
6 Ọ da ta kẹ ayen nẹ: “Ovwan do ariri na phiyọ ẹbẹre rẹ obọrhen rẹ okọ na, ovwan cha mrẹ evo.” Ọtiọyena ayen de do, ẹkẹvuọvo ayen rhe se sio ro evunrẹ okọ na-a, kidie erin na pha buebun.
7 Ọtiọyena odibo ri Jesu vwo ẹguọnọ rọyen na da ta kẹ Pita nẹ: “Ọyen Ọrovwori na!” Rẹ Pita vwo nyo nẹ ọyen Ọrovwori na, o de ku ewun rẹ obotafe rọyen phiyọ, kidie ọ banphiyọ jovwo,* o de pho ro abadi na.
8 Ẹkẹvuọvo idibo ri chekọ na de bi okọ otete rhe, jẹ ayen siẹ ariri rọ vọnre vẹ erin na, kidie ayen sheri kẹ otọ-ọ, omarẹ ichiyin 300* ọvo.
9 Ọke rẹ ayen vwo te otọ, ayen da mrẹ erhanre ra vwẹ ibi koko phiyọ vẹ erin rọhẹ enu rọyen kugbe ibrẹdi.
10 Jesu da ta kẹ ayen nẹ: “Ovwan reyọ evo vwẹ usun rẹ erin rẹ ovwan ghwe hwe na rhe.”
11 Ọtiọyena Saimọn Pita da ro okọ, o de si ariri rọ vọnre vẹ erin ride na rhe otọ, ayen te 153. Dede nẹ i bunru mamọ, jẹ ariri na bẹre-e.
12 Jesu da ta kẹ ayen nẹ: “Ovwan yanrhe rhe riemu rẹ urhiọke.” O vwo ọvuọvo vwẹ usun rẹ idibo na ro se fiudugberi nọ nẹ: “Wẹwẹ ono-o?” kidie ayen riẹnre nẹ ọyen Ọrovwori na.
13 Jesu da rhe, ọ da reyọ ibrẹdi na, ọ da vwọ kẹ ayen, ọtiọyen yen o ji ru erin na.
14 Asaọkiephana ọnana yen obọ rerha ri Jesu vwomaphia kẹ idibo na ra vwọ kparọ vrẹn nẹ ughwu nu.
15 Ọke rẹ ayen vwọ riemu rẹ urhiọke na nu, Jesu da ta kẹ Saimọn Pita nẹ: “Saimọn ọmọ ri Jọn, wo vwo ẹguọnọ mẹ vwọ vrẹ enana?” Ọ da kpahen kẹ nẹ: “E, Ọrovwori, wọ riẹnre nẹ mi vwo ẹguọnọ wẹ.” Ọ da ta kẹ nẹ: “Ghẹrẹ imigodẹ mẹ na.”
16 Ọ da rhoma ta kẹ obọ rivẹ nẹ: “Saimọn ọmọ ri Jọn, wo vwo ẹguọnọ mẹ?” Ọ da kpahen nẹ: “E, Ọrovwori, wọ riẹnre nẹ mi vwo ẹguọnọ wẹ.” Ọ da ta kẹ nẹ: “Vwẹrote igodẹ itete mẹ na.”
17 Ọ da ta kẹ obọ rerha nẹ: “Saimọn ọmọ ri Jọn, wo vwo ẹguọnọ mẹ?” Pita de muomaphiyọ kidie ọ nọ rọ obọ rerha nẹ: “Wo vwo ẹguọnọ mẹ?” Ọtiọyena ọ da ta kẹ nẹ: “Ọrovwori, wọ riẹn erọnvwọn eje; wọ riẹnre nẹ mi vwo ẹguọnọ wẹ.” Jesu da ta kẹ nẹ: “Ghẹrẹ igodẹ itete mẹ na.”
18 Uyota, uyota me ta kẹ wẹ nẹ, ọke ru wọ vwọ hẹ eghene, wẹ ọvo yen kuẹ ewun phiyọ wọ me yan kpo kasan kasan ru wọ guọnọre. Ẹkẹvuọvo ọke wọ da ghwore, wọ cha rionbọ wẹn phia, ohwo ọfa ko che ku ewun phiyọ owẹ, o mi mu we kpo asan ru wọ guọnọre-e.”
19 Ọ ta ọnana vwo dje oka rẹ ughwu ri Pita che ghwu vwọ vwẹ urinrin kẹ Ọghẹnẹ. Ọke rọ vwọ ta ọnana nu, ọ da ta kẹ Pita nẹ: “Rhe nene uvwe.”
20 Pita de kuomarhẹriẹ, ọ da mrẹ odibo ri Jesu vwo ẹguọnọ rọyen na ro nene ayen, ọ rọ vwẹ oma rẹrẹ udu ri Jesu vwẹ emu ovwọnvwọn na, rọ da tanẹ: “Ọrovwori, ono yen cha shẹ wẹ na?”
21 Ọtiọyena ọke rọ vwọ mrẹ, Pita da ta kẹ Jesu nẹ: “Ọrovwori, kẹ ọshare nana vwo?”
22 Jesu da ta kẹ nẹ: “Ọ da dia ọhọre mẹ rọ vwọ dia bẹsiẹ me vwọ rhe, die yen te we vwẹ ọyena? Wo mi rhe nene uvwe.”
23 Ọtiọyena ota na da hrabọ vwẹ ohri rẹ iniọvo na nẹ odibo nana che ghwu-u. Ẹkẹvuọvo, ọ dianẹ Jesu ta kẹ nẹ o che je ghwo-o, ukperẹ ọtiọyen, ọ tare nẹ: “Ọ da dia ọhọre mẹ rọ vwọ dia bẹsiẹ me vwọ rhe, die yen te we vwẹ ọyena?”
24 Ọnana yen odibo ro soseri nana kpahen erọnvwọn nana, ohwo ro si erọnvwọn nana, avwanre riẹnre nẹ oseri rọyen uyota.
25 Vwọrẹ uyota, o ji vwo erọnvwọn efa buebun ri Jesu ruru, rẹ ọ da dianẹ e si ayen eje phiyotọ jovwo, mi rorori nẹ akpọ na dede cha sa gba ukpirhin ọbe re si ayen phiyọ-ọ.
Eta rehẹ obotọ na
^ Yẹrẹ “kidie o ku ugogo ewun phiyọ jovwo-o.”
^ Omarẹ imita 90. Vwẹ Grik, “omarẹ kubit 200.” Ni Eta re Vwomaphia.