Jọn 3:1-36
3 O vwo ọshare ọvo rọ dia ohwo ri Farisi re se Nikodimọs, osun rẹ ihwo ri Ju.
2 Ohwo nana de bro rhe vwẹ ason, ọ da ta kẹ nẹ: “Rabbi, avwanre riẹnre nẹ wẹwẹ oyono ro nẹ obọ rẹ Ọghẹnẹ rhe, kidie o vwo ohwo vuọvo ro se ru eka nana ru wo ruẹ na-a, jokpanẹ Ọghẹnẹ vẹ ọyen herọ.”
3 Jesu da kpahen kẹ nẹ: “Uyota, uyota me ta kẹ wẹ nẹ, jokpanẹ kẹ a rhoma vwiẹ ohwo,* ọ cha sa mrẹ Uvie rẹ Ọghẹnẹ-ẹ.”
4 Nikodimọs da ta kẹ nẹ: “Mavọ yen e se vwo vwiẹ ohwo jẹ ohwo na ghwore? Ọ cha sa ro evun rẹ oni rọyen vwẹ obọ rivẹ rere e vwiẹ-ẹ, gbanẹ o se ru ọtiọyen?”
5 Jesu da kpahen nẹ: “Uyota, uyota me ta kẹ wẹ nẹ, jokpanẹ ke vwiẹ ohwo nẹ ame kugbe ẹwẹn, ọ cha sa ro Uvie rẹ Ọghẹnẹ na-a.
6 Obo re vwiẹ nẹ uvwo na rhe uvwo, obo re vwiẹ nẹ ẹwẹn na rhe ẹwẹn.
7 Wo jẹ o gbe we unu kidie nẹ me ta kẹ wẹ nẹ: A cha rhoma vwiẹ ovwa-an.
8 Odju djuẹ kpo asan rọ guọnọre, wo nyo edo rọyen, ẹkẹvuọvo wọ riẹn asan ro nẹcha kugbe asan rọ ra-a. Ọtiọyen ọ je hepha vwọ kẹ kohwo kohwo re vwiẹ nẹ ẹwẹn na rhe.”
9 Nikodimọs da kpahen kẹ nẹ: “Mavọ yen erọnvwọn nana sa vwọ phia?”
10 Jesu da kpahen nẹ: “Wẹwẹ oyono vwẹ Izrẹl, jẹ wọ riẹn erọnvwọn nana-a?
11 Uyota, uyota me ta kẹ wẹ nẹ, oborẹ avwanre riẹnre yen avwanre ta, oborẹ avwanre mrẹre yen avwanre soseri kpahan, ẹkẹvuọvo ovwan rhiabọreyọ oseri rẹ avwanre se-e.
12 Ọ da dianẹ me vuẹ ovwan erọnvwọn rẹ akpọ na jẹ ovwan segbuyota-a, kẹ mavọ yen ovwan se vwo segbuyota ọ da dianẹ me vuẹ ovwan erọnvwọn rẹ odjuvwu?
13 Vwọba, ohwo vuọvo ji rhi kpo odjuvwu-u jokparẹ ohwo ro nẹ obodjuvwu rhe, Ọmọ rẹ ohwo na.
14 Kirobo ri Mosis kpare ọrọdekọ kpenu vwevunrẹ aton na, ọtiọyen a je cha kpare Ọmọ rẹ ohwo na kpenu,
15 rere kohwo kohwo ro sere gbuyota se vwo vwo arhọ ri bẹdẹ.
16 “Kidie Ọghẹnẹ vwo ẹguọnọ rẹ akpọ na mamọ te ẹdia ro de siobọnẹ Ọmọ rọyen ọvuọvo, rere kohwo kohwo ro vwo esegbuyota kpahọn vwo jẹ ẹghwọrọ, ẹkẹvuọvo ko vwo arhọ ri bẹdẹ.
17 Kidie ọ dia Ọghẹnẹ ji Ọmọ rọyen rhe akpọ na rere ọ rhe vwẹ akpọ na guẹdjọ-ọ, ẹkẹvuọvo rere akpọ na vwo sivwin rhọ wan oma rọyen.
18 Kohwo kohwo ro vwo esegbuyota kpahọn, e che vwo guẹdjọ-ọ. Kohwo kohwo ro vwo esegbuyota kpahọ-ọn, e vwiro guẹdjọ nure, kidie o vwo esegbuyota kpahen odẹ rẹ Ọmọ rẹ Ọghẹnẹ ọvuọvo na-a.
19 Asaọkiephana ọnana yen obo re mu ẹdjọeguo na kpahen: nẹ urhukpẹ na rhe akpọ na re, ẹkẹvuọvo ihworakpọ vwo ẹguọnọ rẹ ebri ukperẹ urhukpẹ na, kidie iruo rayen pha brabra.
20 Kidie kohwo kohwo ro ruẹ erọnvwọn ebrabra vwo utuoma kpahen urhukpẹ na, o ji brẹ urhukpẹ na cha-a, rere e vwo jẹ iruo rọyen ẹghwọkuo.*
21 Ẹkẹvuọvo kohwo kohwo ro ruẹ obo re dia uyota brẹ urhukpẹ na cha, rere e se vwo dje iruo rọyen phia kerẹ obo re ruru vwo nene ọhọre rẹ Ọghẹnẹ.”
22 Ọnana vwọ wan nu, Jesu vẹ idibo rọyen de kpo evunrẹ eko ri Judia, o de nene ihwo na ghwọrọ ọke kugbe, jẹ o brẹ ihwo phiyame.
23 Jọn ji brẹ ihwo phiyame vwẹ Anọn rọ kẹrẹ Salim, kidie ame buebun hẹ etiyin, ihwo na ke cha, jẹ o brẹ ayen phiyame;
24 kidie e ji rhi do Jọn phiyọ uwodi vwẹ ọke yena-a.
25 Asaọkiephana idibo ri Jọn ki nene ohwo ri Ju ọvo phraphro kpahan orufon.
26 Ọtiọyena ayen de bru Jọn rhe, ayen da ta kẹ nẹ: “Rabbi, ọshare rọ vẹ owẹ gba herọ vwẹ obovrẹ ri Jọdan na, ohwo ru wo soseri kpahen na, nighere, o brẹ ihwo phiyame, ihwo ejobi bro ra.”
27 Jọn da kpahen nẹ: “Ohwo che se vwo orọnvwọn vuọvo-o jokpanẹ a vwerọ kẹ nẹ obodjuvwu rhe.
28 Ovwan komobọ soseri rọyen nẹ me tare nẹ, ‘Me dia Kristi na-a, ẹkẹvuọvo e ji vwe kobaro vwọ kẹ ohwo yena.’
29 Kohwo kohwo ro vwo ọpha na yen ọshare ọpha na. Ẹkẹvuọvo ugbeyan rẹ ọshare ọpha na, ọke ro de mudia, ro de nyo ota rọyen, vwo aghọghọ rode fikirẹ urhuru rẹ ọshare ọpha na. Ọtiọyena e ru aghọghọ mẹ gba re.
30 Ohwo yena che rhe buẹnphiyọ, ẹkẹvuọvo me cha rha hanvwaphiyọ.”
31 Ohwo ro nẹ obenu rhe na rho vrẹ ihwo ri chekọ na eje. Ohwo ro nẹ akpọ na rhe, nẹ akpọ na rhe, ọ je ta erọnvwọn rẹ akpọ na. Ohwo ro nẹ obodjuvwu rhe na rho vrẹ ihwo ri chekọ na eje.
32 O soseri kpahan obo rọ mrẹre ro ji nyo, ẹkẹvuọvo ohwo vuọvo rhiabọreyọ oseri rọye-en.
33 Kohwo kohwo ro rhiabọreyọ oseri rọyen, vwẹ utẹ rọyen vwo te nure* nẹ Ọghẹnẹ ohwo rẹ uyota.
34 Ohwo rẹ Ọghẹnẹ jiri ta eta rẹ Ọghẹnẹ, kidie Ọ kẹkẹ obọ ọke rọ da vwẹ ẹwẹn na kẹ ohwo-o.*
35 Ọsẹ na vwo ẹguọnọ rẹ Ọmọ na, o phi erọnvwọn ejobi phiyọ obọ rọyen re.
36 Ohwo ro vwo esegbuyota kpahen Ọmọ na vwo arhọ ri bẹdẹ; ohwo ro nyẹme rẹ Ọmọ na-a cha mrẹ arhọ-ọ, ẹkẹvuọvo ophu rẹ Ọghẹnẹ hẹ uyovwin rọyen.
Eta rehẹ obotọ na
^ Yẹrẹ ọ sa dia, “jokpanẹ kẹ e vwiẹ ohwo nẹ obenu rhe.”
^ Yẹrẹ “ẹvwọphia.”
^ Yẹrẹ “rhiabọreyọ oseri rọyen rhọnvwephiyọ nure.”
^ Yẹrẹ “kidie Ọ vwanvwa ẹwẹn na kẹ ohwo-o.”