Jọn 6:1-71
6 Ọnana vwọ wan nu, Jesu ko kpo obovrẹ rẹ abadi ri Galili yẹrẹ Taiberias.
2 Otu buebun ki nene, kidie ayen mrẹ eka rẹ igbevwunu ro ruẹ ro vwo sivwẹn ihwo re muọga.
3 Ọtiọyena Jesu de kpo enu rẹ ugbenu ọvo, ọ vẹ idibo rọyen de chidia etiyin.
4 Asaọkiephana Ọwanvrẹ na, orẹ rẹ ihwo ri Ju na, sikẹre re.
5 Ọke ri Jesu vwọ kpare ẹro rọyen, rọ vwọ mrẹ otu buebun ri bro cha, ọ da ta kẹ Filip nẹ: “Tivọ yen avwanre da cha dẹ ibrẹdi vwọ kẹ ihwo nana re?”
6 Ẹkẹvuọvo ọ ta ọnana rọ vwọ davwọn ni, kidie ọ riẹn obo rọ guọnọ ruẹ.
7 Filip da kpahen kẹ nẹ: “Ibrẹdi rẹ idinari* ujorin ivẹ che te-e, ọ da tobọ dianẹ emerha yen a kẹ ohwo ọvuọvo.”
8 Ọvo vwẹ usun rẹ idibo rọyen, Andru, oniọvo ri Saimọn Pita, da ta kẹ nẹ:
9 “Ọmọshare ọvo hẹ etinẹ ro vwo ibrẹdi rẹ ibali iyorin kugbe erin itete ivẹ. Ẹkẹvuọvo die yen enana che te vwo ru vwẹ ohri rẹ ihwo buebun nana?”
10 Jesu da tanẹ: “Ovwan jẹ ihwo na chidia.” Rọ vwọ dianẹ odi buebun hẹ asan na, eshare na de chidia totọ vwẹ etiyin, ayen te omarẹ 5,000.
11 Jesu da reyọ ibrẹdi na, rọ vwọ kpẹvwẹ Ọghẹnẹ nu, ọ da gharọ kẹ ihwo ri chidia etiyin; o de ji ru ọtiọyen kpahen erin itete na, ayen da re uche rẹ ayen guọnọre.
12 Ẹkẹvuọvo ọke rẹ ayen vwọ re evun vọn nu, ọ da ta kẹ idibo rọyen nẹ: “Ovwan koko e ra re chekọ na rere e vwo jẹ ọvuọvo ẹghwọrọ kuẹfia.”
13 Ọtiọyena ayen de koko ayen, e rẹ ihwo re re ibrẹdi rẹ ibali iyorin na re chekọ vọn ibere 12.
14 Ọke rẹ ihwo na vwọ mrẹ oka ro ruru, kẹ ayen tanẹ: “Vwọrẹ uyota ọnana yen Ọmraro rọ cha rhe akpọ na.”
15 Jesu vwọ riẹn nẹ ayen guọnọ cha che rhi mu ọyen rere ayen reyọ ọyen vwo mu ovie, ọyen ọvo da rhoma siomareyọ kpo ugbenu na.
16 Ovwọnvwọn vwo te, idibo rọyen de kpo obo abadi na,
17 ayen vwọ ro okọ ọvo, kẹ ayen biẹ kpo obovrẹ rẹ abadi na rẹ ayen vwo kpo Kepanọm. Asaọkiephana asan ejobi muebri re, jẹ Jesu ji rhi bru ayen rhe-e.
18 Vwọba, abadi na kọ họnra kidie odju ọgangan djuẹ.
19 Ẹkẹvuọvo ọke rẹ ayen vwo bi omarẹ imaili erha yẹrẹ ẹne* nu, ayen da mrẹ Jesu rọ yan vwẹ enu rẹ abadi na, jẹ o siẹkẹrẹ okọ na, oshọ de mu ayen.
20 Ẹkẹvuọvo ọ da ta kẹ ayen nẹ: “Omẹvwẹ; ovwan djoshọ-ọ!”
21 Ayen de muo phiyọ okọ na vẹ omavwerhovwẹn, o kriri-i, okọ na de rhi te asan rẹ ayen ra.
22 Ẹdẹ rọ vwọ kpahọn otu na rọhẹ ẹbẹre ochekọ rẹ abadi na da mrẹ nẹ okọ hẹ etiyi-in. Okọ otete ọvo hẹ etiyin jovwo, ẹkẹvuọvo Jesu nene idibo rọyen ro okọ yena-a, kidie idibo rọyen ọvo yen yanran.
23 Ẹkẹvuọvo ekọ ri nẹ Taiberias rhe de te asan rọ kẹrẹ asan rẹ ayen da re ibrẹdi na ọke rẹ Ọrovwori na vwọ kpẹvwẹ Ọghẹnẹ nu.
24 Ọtiọyena ọke rẹ otu na vwọ mrẹ nẹ Jesu yẹrẹ idibo rọyen hẹ etiyi-in, ayen da ro ekọ rayen, ayen da rhe Kepanọm rhe guọnọ Jesu.
25 Ọke rẹ ayen vwọ mrẹ vwẹ obovrẹ rẹ abadi na, ayen da ta kẹ nẹ: “Rabbi, ọke vọ yen wo vwo te obonẹ?”
26 Jesu da ta kẹ ayen nẹ: “Uyota, uyota me ta kẹ ovwan nẹ, ovwan guọnọ ovwẹ, ọ dia kidie nẹ ovwan mrẹ eka-a, ẹkẹvuọvo kidie ovwan re vwẹ ibrẹdi na, evun da vọn ovwan.
27 Ovwan wian, ọ dia vwọ kẹ emuọre rọ ghwọrọ kuẹfia-a, ẹkẹvuọvo vwọ kẹ emuọre rọ dia rhirin vwọ kẹ arhọ ri bẹdi bẹdẹ, rẹ Ọmọ rẹ ohwo na cha vwọ kẹ ovwan; kidie ọnana yen Ọsẹ na, Ọghẹnẹ komobọ rọyen, vwẹ utẹ rẹ abọ erhiereyọ rọyen vwo te.”
28 Ọtiọyena ayen da ta kẹ nẹ: “Die yen avwanre ru, rẹ avwanre vwo ruiruo rẹ Ọghẹnẹ?”
29 Jesu da kpahen kẹ ayen nẹ: “Ọnana yen iruo rẹ Ọghẹnẹ, nẹ ovwan vwo esegbuyota kpahen ohwo ro ji rhe.”
30 Ọtiọyena ayen da ta kẹ nẹ: “Die yen wo che ru kerẹ oka rere avwanre sa vwọ mrẹ ji se we gbuyota? Iruo vọ yen wo ruẹ?
31 Esẹ rẹ avwanre ride re imana vwevunrẹ aton na kirobo re ghwe sio nẹ: ‘Ọ vwẹ ibrẹdi nẹ obodjuvwu rhe kẹ ayen re.’”
32 Jesu da ta kẹ ayen nẹ: “Uyota, uyota me ta kẹ ovwan nẹ, Mosis vwẹ ibrẹdi kẹ ovwan nẹ obodjuvwu rhe-e, ẹkẹvuọvo Ọsẹ mẹ yen kẹ ovwan ibrẹdi rẹ uyota na nẹ obodjuvwu rhe.
33 Kidie ibrẹdi rẹ Ọghẹnẹ na yen ohwo ro wontọ nẹ odjuvwu rhe, ọ da vwẹ arhọ kẹ akpọ na.”
34 Ọtiọyena ayen da ta kẹ nẹ: “Ọrovwori, rha kẹ avwanre ibrẹdi nana ọkieje.”
35 Jesu da ta kẹ ayen nẹ: “Mẹvwẹ yen ibrẹdi rẹ arhọ na. Kohwo kohwo ro bru vwe rhe, owẹnvwe che hwe kakaka-a, kohwo kohwo ro vwo esegbuyota kpahen ovwẹ, urhuru rẹ ame che sio bẹdẹ-ẹ.
36 Ẹkẹvuọvo kirobo me ta kẹ ovwan jovwo, ovwan tobọ mrẹ vwẹ re, dedena ovwan se vwe gbuyota-a.
37 Ihwo eje rẹ Ọsẹ na vwọ kẹ vwẹ che bru vwe rhe, o vwo ọke vuọvo me cha vwọ djẹ ohwo ro bru vwe rhe nẹ oma-a;
38 kidie mi nẹ obodjuvwu rhe rhi ru, ọ dia ọhọre romobọ mẹ-ẹ, ẹkẹvuọvo ọhọre rẹ ohwo ro ji vwe rhe.
39 Ọnana yen ọhọre rẹ ohwo ro ji vwe rhe, nẹ ọvuọvo vwẹ usun rẹ ihwo eje rọ vwọ kẹ vwẹ na ghwrẹ va vwẹ abọ-ọ, ẹkẹvuọvo nẹ me kpare ayen vrẹn vwẹ ẹdẹ rọ koba na.
40 Kidie ọnana yen ọhọre rẹ Ọsẹ mẹ, nẹ kohwo kohwo ro vughe Ọmọ na ro ji vwo esegbuyota kpahọn vwo arhọ ri bẹdi bẹdẹ, me cha kparọ vrẹn vwẹ ẹdẹ rọ koba na.”
41 Ihwo ri Ju na ki guon kidie ọ tare nẹ: “Mẹvwẹ yen ibrẹdi ro wontọ nẹ odjuvwu rhe na.”
42 Kẹ ayen tanẹ: “Ọnana dia Jesu ọmọ ri Josẹf rẹ avwanre vughe ọsẹ vẹ oni rọyen na? Kẹ mavọ yen ọ vwọ ta asaọkiephana nẹ, ‘Mi wontọ nẹ odjuvwu rhe’?”
43 Jesu da kpahen kẹ ayen nẹ: “Ovwan rhe guẹn hunhunhun vwẹ ohri rẹ ovwa-an.
44 O vwo ohwo vuọvo ro se bru vwe rhe-e jokpanẹ Ọsẹ na ro ji vwe rhe na siro te oma, ke me cha kparọ vrẹn vwẹ ẹdẹ rọ koba na.
45 E siro phiyọ ẹbe rẹ Emraro na nẹ: ‘Jihova* che yono ayen ejobi.’ Kohwo kohwo rọ kerhọ rẹ Ọsẹ na, ro ji yono mie, bru vwe cha.
46 Ọ dianẹ kẹ ohwo ọvo mrẹ Ọsẹ na re-e, jokparẹ ohwo ro nẹ obọ rẹ Ọghẹnẹ rhe; ohwo nana yen mrẹ Ọsẹ na re.
47 Uyota, uyota me ta kẹ ovwan nẹ, kohwo kohwo ro segbuyota vwo arhọ ri bẹdi bẹdẹ.
48 “Mẹvwẹ yen ibrẹdi rẹ arhọ na.
49 Esẹ rẹ ovwan ride re imana vwevunrẹ aton na, dedena ayen ghwuru.
50 Ọnana yen ibrẹdi ro wontọ nẹ odjuvwu rhe na, rere kohwo kohwo sa vwọ re vwọ, ro vwo jeghwo.
51 Mẹvwẹ yen ibrẹdi rẹ arhọ na ro wontọ nẹ odjuvwu rhe. Kohwo kohwo rọ re vwẹ ibrẹdi nana cha dia bẹdi bẹdẹ; vwọrẹ uyota, ibrẹdi me cha vwọ kẹ na yen uvwo mẹ re me cha vwọ kpahotọ fikirẹ arhọ rẹ akpọ na.”
52 Ọtiọyena ihwo ri Ju na ki nene ohwohwo phraphro rẹ ayen vwọ tanẹ: “Mavọ yen ọshare nana sa vwọ kẹ avwanre uvwo rọyen re?”
53 Ọtiọyena Jesu da ta kẹ ayen nẹ: “Uyota, uyota me ta kẹ ovwan nẹ, jokpanẹ kẹ ovwan re uvwo rẹ Ọmọ rẹ ohwo je da ọbara rọyen, ovwan che vwo arhọ vwẹ oma rẹ ovwa-an.
54 Kohwo kohwo rọ re uvwo mẹ je da ọbara mẹ vwo arhọ ri bẹdi bẹdẹ, me cha kparọ vrẹn vwẹ ẹdẹ rọ koba na;
55 kidie uvwo mẹ emu rẹ uyota, ọbara mẹ udi rẹ uyota.
56 Kohwo kohwo rọ re uvwo mẹ je da ọbara mẹ, ọ vẹ ovwẹ vwo oyerinkugbe, me vẹ ọyen ji vwo oyerinkugbe.
57 Kirobo rẹ Ọsẹ ro jeghwo na ji vwe rhe, ri mi de ji yerẹn fikirẹ Ọsẹ na, ọtiọyen ohwo rọ vwẹ ovwẹ vwọ ghẹrẹ oma rọyen ji che yerin fiki mẹ.
58 Ọnana yen ibrẹdi ro wontọ nẹ odjuvwu rhe na. Ọ dia oka rẹ esẹ rẹ ovwan ride rere rẹ ayen de ji ghwu na-a. Kohwo kohwo rọ vwẹ ibrẹdi nana vwọ ghẹrẹ oma rọyen cha dia bẹdi bẹdẹ.”
59 Ọ ta eta nana ọke ro vwo yono vwẹ sinagọg* ọvo vwẹ Kepanọm.
60 Ọke rẹ ayen vwo nyo ọnana, buebun rẹ idibo rọyen da tanẹ: “Ota nana muekpahen; ono yen sa kerhọ rọyen?”
61 Ẹkẹvuọvo Jesu vwọ riẹn vwẹ oma rọyen nẹ idibo rọyen guẹn kpahan ọnana, ọ da ta kẹ ayen nẹ: “Ọnana nẹrhẹ ovwan kprowọ?
62 Kẹ ọ da rha dianẹ ovwan mrẹ Ọmọ rẹ ohwo ro kpo obenu kpo asan rọ hepha jovwo vwo?
63 Ẹwẹn na yen kẹ ohwo arhọ, uvwo na fiemu vuọvo-o. Eta re me ta kẹ ovwan na, ẹwẹn kugbe arhọ.
64 Ẹkẹvuọvo o vwo evo vwẹ usun rẹ ovwan na ri segbuyota-a.” Kidie nẹ ọtonphiyọ rhe yen Jesu vwọ riẹn ihwo ri segbuyota-a kugbe ohwo rọ cha shẹ na.
65 Vwo kpobarophiyọ, ọ da tanẹ: “Ọnana yen sorọ me vwọ ta kẹ ovwan nẹ, o vwo ohwo vuọvo ro se bru vwe rhe-e jokpanẹ Ọsẹ na rhọnvwe kẹ.”
66 Fikirẹ ọnana, buebun rẹ idibo rọyen de rhivwin kpo erọnvwọn rehẹ obuko, ayen rhe nene yan ọfa-a.
67 Ọtiọyena Jesu da ta kẹ Ihwivẹ na nẹ: “Ovwan je cha yanra-an, gbanẹ ovwan cha yanran?”
68 Saimọn Pita da kpahen kẹ nẹ: “Ọrovwori, ono yen avwanre che bru ra? Wo vwo eta rẹ arhọ ri bẹdi bẹdẹ.
69 Avwanre segbuyota avwanre je rhe riẹn re nẹ wẹwẹ yen Ohwo Ọfuanfon rẹ Ọghẹnẹ na.”
70 Jesu da kpahen kẹ ayen nẹ: “Mẹvwẹ yen sane ovwan ihwivẹ na, gbanẹ ọ dia omẹvwẹ? Dedena ọvo vwẹ usun rẹ ovwan na ọ ro miovwo ohwo.”*
71 Vwọrẹ uyota, Judas ọmọ ri Saimọn Iskariọt yen ọ ta ota kpahan, kidie ohwo nana cha shẹ dede nẹ ọyen ọvo vwẹ usun rẹ Ihwivẹ na.
Eta rehẹ obotọ na
^ Ni Eta re Vwomaphia.
^ Omarẹ iroko iyorin yẹrẹ esan. Vwẹ Grik, “omarẹ istediọmu 25 yẹrẹ 30.” Istediọmu ọvo vẹ imita 185 (ichiyin 606.95) abavo.
^ Ni Eta re Vwomaphia.
^ Yẹrẹ ọ sa dia, “vwẹ osikoko rẹ azagba.”
^ Yẹrẹ “idẹbono.”