Jọn 9:1-41
9 Rọ vwọ wanvrẹ, ọ da mrẹ ọshare ọvo ro rhuẹro nẹ evun rhe.
2 Idibo rọyen da nọ nẹ: “Rabbi, ono yen ru umwemwu rọ nẹrhẹ e vwiẹ kerẹ orhuẹro, ọshare nana gbanẹ ọsẹ vẹ oni rọyen?”
3 Jesu da kpahen nẹ: “Ọ dia ọshare nana yẹrẹ ọsẹ vẹ oni rọyen yen ru umwemwu-u, ẹkẹvuọvo ọ dia ọtiọyen rere e se vwo dje iruo rẹ Ọghẹnẹ phia vwẹ oma rọyen.
4 Ofori nẹ avwanre ruiruo rẹ Ohwo ro ji vwe rhe na vwẹ aruphẹn na; ason cha rẹ ohwo vuọvo rhe che se ruiruo-o.
5 Re me je vwọ hẹ akpọ na, mẹvwẹ yen urhukpẹ rẹ akpọ na.”
6 Ọke rọ vwọ ta eta nana nu, o de dje enya phiyotọ, o de gbe kugbe vẹ ekpẹn, ọ da reyọ vwo ghworo ẹro rẹ ọshare na
7 ọ da ta kẹ nẹ: “Yanran ra hworhẹ vwẹ ẹtẹrhe ame ri Siloam” (ra fan phiyọ “Jo Yanran”). Ọ da yanran, ọ da hworhẹ, ọ da mrorẹ rhivwin rhe.
8 Ọtiọyena ihwo re dia kẹrẹ kugbe ihwo re mrẹ jovwo nẹ ọyen ohwo rọ yara emu ke tanẹ: “Ọnana ọshare ro chidia yara emu jovwo na, gbanẹ ọ dia ọyen?”
9 Evo ke tanẹ: “Ọyen.” Jẹ efa tanẹ: “Ẹjo, ẹkẹvuọvo ọ họherọ.” Jẹ ọshare na tanẹ: “Mẹvwẹ yen ohwo na.”
10 Ọtiọyena ayen da nọ nẹ: “Kẹ mavọ yen ẹro wẹn vwo rhie?”
11 Ọ da kpahen nẹ: “Ọshare na re se Jesu na yen vwẹ enya gbe ekpẹn, o de vwo ghworo ẹro mẹ, ọ da ta kẹ vwẹ nẹ, ‘Yanran kpo Siloam ra hworhẹ.’ Ọtiọyena me da yanran, me da hworhẹ, me da mrorẹ.”
12 Ọtiọyena ayen da ta kẹ nẹ: “Tivọ yen ọshare na hepha?” Ọ da tanẹ: “Me riẹnre-e.”
13 Ayen da reyọ ọshare ro rhuẹro jovwo na bru ihwo ri Farisi na ra.
14 Ẹdẹ ri Jesu vwẹ enya gbe ekpẹn ji rhiẹro rọyen na, Ẹdẹ Urovwoma.
15 Ọtiọyena vwẹ udje nana, ihwo ri Farisi na ke je nọ ọshare na oborẹ ẹro rọyen vwo rhie. Ọ da ta kẹ ayen nẹ: “O phi enya vẹ ekpẹn ro gbe kugbe phiyọ ẹro mẹ, me da hworhẹ, ke me mrorẹ.”
16 Evo vwẹ usun rẹ ihwo ri Farisi na ke tanẹ: “Ọ dia obọ rẹ Ọghẹnẹ yen ohwo nana nurhe-e, kidie ọ yọnrọn urhi rẹ Ẹdẹ Urovwoma na-a.” Efa da tanẹ: “Mavọ yen ohwo rọ dia orumwemwu se vwo ru eka tiọyena?” Ọtiọyena ohẹriẹ da dia ohri rayen.
17 Ayen da rhoma ta kẹ orhuẹro na nẹ: “Die yen wọ ta kpahọn, kidie ẹro wẹn yen o rhieri?” Ọshare na da tanẹ: “Ọmraro yen o ruẹ.”
18 Ẹkẹvuọvo ihwo ri Ju na segbuyota nẹ o rhuẹro jovwo rọ ke rhoma mrorẹ na-a, bẹsiẹ rẹ ayen vwo se ọsẹ vẹ oni rẹ ọshare rọ mrorẹ asaọkiephana re na.
19 Ayen da nọ ayen nẹ: “Ọnana yen ọmọ rẹ ovwan rẹ ovwan tanẹ o rhuẹro nẹ evun rhe na? Kẹ mavọ yen ọ vwọ mrorẹ asaọkiephana?”
20 Ọsẹ vẹ oni rọyen da kpahen nẹ: “Avwanre riẹnre nẹ ọnana ọmọ rẹ avwanre kugbe nẹ o rhuẹro nẹ evun rhe.
21 Ẹkẹvuọvo obo ro ruẹ mrorẹ asaọkiephana, avwanre riẹnre-e; yẹrẹ ohwo ro rhiẹro rọyen, avwanre riẹnrẹ-ẹ. Ovwan nọ. Ọ rha dia omotete-e. E jẹ ọ vwẹ unu robọ rọyen ta.”
22 Ọsẹ vẹ oni rọyen ta eta nana kidie oshọ rẹ ihwo ri Ju na muẹ ayen, kidie ihwo ri Ju na rhọnvwe kugbe jovwo re nẹ, kohwo kohwo rọ rhọnvwere nẹ Jesu yen Kristi, ka djẹ ohwo yena vwo nẹ sinagọg na.
23 Ọnana yen sorọ rẹ ọsẹ vẹ oni rọyen vwọ tanẹ: “Ọ rha dia omotete-e. Ovwan nọ.”
24 Ọtiọyena vwẹ obọ rivẹ, ayen de se ọshare ro rhuẹro jovwo na, ayen da ta kẹ nẹ: “Vwẹ urinrin kẹ Ọghẹnẹ, avwanre riẹnre nẹ ọshare nana orumwemwu.”
25 Ọ da kpahen nẹ: “Sẹ orumwemwu me riẹnre-e. Orọnvwọn vuọvo me riẹnre kẹ ọna, nẹ mi rhuẹro jovwo, ẹkẹvuọvo asaọkiephana me mrorẹ re.”
26 Ayen da ta kẹ nẹ: “Die yen o ru kẹ wẹ? Mavọ yen ọ wan rhiẹro wẹn?”
27 Ọ da kpahen kẹ ayen nẹ: “Me vuẹ ovwan jovwo re, dedena ovwan kerhọ-ọ. Diesorọ ovwan vwọ rhoma guọnọ nyo? Gbanẹ ovwan je guọnọ dia idibo rọyen?”
28 Ọtiọyena ayen da ta kẹ vwọrẹ ọjẹfia nẹ: “Wẹwẹ odibo rẹ ọshare yena, ẹkẹvuọvo avwanre idibo ri Mosis.
29 Avwanre riẹnre nẹ Ọghẹnẹ ta ota kẹ Mosis, ẹkẹvuọvo vwọ kẹ ọshare nana, avwanre riẹn asan ro nurhe-e.”
30 Ọshare na da kpahen kẹ ayen nẹ: “Ọnana gbe vwe unu mamọ, nẹ ovwan riẹn asan ro nurhe-e, jẹ o rhiẹro mẹ.
31 Avwanre riẹnre nẹ Ọghẹnẹ kerhọ rẹ irumwemwu-u, ẹkẹvuọvo ọ da dianẹ ohwo djoshọ rẹ Ọghẹnẹ ji ruẹ ọhọre rọyen, ọ kerhọ rẹ ohwo nana.
32 Nẹ awanre rhe, e ji rhi nyo dẹvo nẹ ohwo ọvo rhiẹro rẹ ohwo ro rhuẹro nẹ evun rhe-e.
33 Ọ da dianẹ ọ dia obọ rẹ Ọghẹnẹ yen ọshare nana nurhe-e, o rhe se ru emu vuọvo kakaka-a.”
34 Ayen da kpahen kẹ nẹ: “Wẹwẹ re vwiẹ phiyọ umwemwu karekare na kọyen rhoma guọnọ yono avwanre?” Ayen de do phiyọ otafe!
35 Jesu de nyo nẹ ayen do ro phiyọ otafe, rọ vwọ mrẹ, ọ da tanẹ: “Wo vwo esegbuyota kpahen Ọmọ rẹ ohwo na?”
36 Ọshare na da kpahen nẹ: “Ono yen ohwo na, ọga, rere mi se vwo vwo esegbuyota kpahọn?”
37 Jesu da ta kẹ nẹ: “Wọ mrẹrẹ re, vwọrẹ uyota, ọyen yen ohwo ro nene uwe ta ota na.”
38 Ọ da tanẹ: “Mi vwo esegbuyota kpahọn, Ọrovwori.” Ọ da vwẹ uyovwin kpotọ kẹ.
39 Ọtiọyena Jesu da tanẹ: “Fikirẹ ẹdjọeguo nana ọyen me vwọ rhe akpọ nana, rere ihwo re mrorẹ-ẹ sa vwọ mrorẹ, ihwo re mrorẹ se vwo rhuẹro.”
40 Ihwo ri Farisi re vẹ ọyen gba hẹ etiyin de nyo eta nana, ayen da ta kẹ nẹ: “Avwanre ji rhuẹro rẹ, gbanẹ avwanre rhuẹro?”
41 Jesu da ta kẹ ayen nẹ: “Ọ da dianẹ ovwan rhuẹro jovwo, mane jẹ ovwan rhe vwo umwemwu vuọvo-o. Ẹkẹvuọvo asaọkiephana, ovwan tanẹ, ‘Avwanre mrorẹ.’ Umwemwu rẹ ovwan jehẹ etiyin.”