Ọbe Vwo Rhe Ihwo ri Kọlose 2:1-23
2 Kidie me guọnọre nẹ ovwan riẹn oborẹ me davwẹngba te fikirẹ ovwan vẹ ihwo ri Laodisha, kugbe ihwo eje re je rhe mrẹ vwẹ dẹvo-o.*
2 Ọnana dia ọtiọyen rere ẹwẹn rayen se vwo totọ, ayen mi ku evun gbe vwọ dia ọvo vwọrẹ ẹguọnọ, ayen mi ji vwo efe ro nẹ evunrẹ imuẹro ro fiotọ rẹ oborẹ ayen vwo ẹruọ rọyen cha, rere ayen se vwo vwo erianriẹn ọgbagba rẹ odjahọn ọfuanfon rẹ Ọghẹnẹ na, kọyen Kristi.
3 A nabọ si efe rẹ aghwanre kugbe erianriẹn eje nu vwẹ oma rọyen.
4 Me ta ọnana rere ohwo vuọvo vwo jẹ ovwan ẹphiẹn womarẹ unu ẹrarọ.
5 Dede nẹ me vẹ ovwan herọ vwọrẹ ugboma-a, je me vẹ ovwan herọ vwọrẹ ẹwẹn, oma vwerhen ovwẹ re me vwọ mrẹ oborẹ ovwan ruẹ erọnvwọn nene ọrhuẹrẹphiyotọ kugbe oborẹ esegbuyota rẹ ovwan ghwotọ kokoroko te vwevunrẹ Kristi.
6 Ọtiọyena, kirobo rẹ ovwan ghwe rhiabọreyọ Kristi Jesu Ọrovwori na, ovwan rha yan nene ọtiọyen,
7 rẹ ovwan vwọ tan awọ muotọ je bọn oma rẹ ovwan gan vwẹ evun rọyen rere ovwan ji mudia gan kokoroko vwevunrẹ esegbuyota na, kirobo re yono ovwan, ovwan me je rha kpẹvwẹ ọkieje.
8 Ovwan nomaso rere ohwo vuọvo vwo jẹ ovwan e vwo ruẹ eviẹn womarẹ aghwanre kugbe ophiẹnvwe ofefe rẹ ẹkuruemu rẹ ihworakpọ, vwo nene iroro* rẹ akpọ na, ọ dia vwo nene Kristi-i;
9 kidie vwẹ oma rọyen ọyen ovọnvọn rẹ iruemu rẹ Ọghẹnẹ na eje hepha.
10 Ọtiọyena, ovwan vwo erọnvwọn eje wan oma rọyen nure, ohwo rọ dia uyovwin rẹ usuon kugbe ogangan ejobi.
11 A yanvwe ovwan womarẹ oyerinkugbe rẹ ovwan vẹ ọyen vwori, ọ dia oyanvwe ra vwẹ obọ ru re vwo si ohọroma na no-o, ẹkẹvuọvo oyanvwe ri Kristi.
12 Kidie e shi ovwan vẹ ọyen kugbe vwevunrẹ omaebrophiyame rọyen, a je kpare ovwan vẹ ọyen vrẹn kugbe womarẹ oyerinkugbe rẹ ovwan vẹ ọyen vwori fikirẹ esegbuyota rẹ ovwan vwo kpahen iruo rẹ igbunu rẹ Ọghẹnẹ rọ kparerọ vrẹn nẹ ughwu.
13 Vwọba, dede nẹ ovwan ghwuru jovwo vwevunrẹ imwemwu kugbe ẹdia ri jẹyanvwọn rẹ ugboma rẹ ovwan, Ọghẹnẹ nẹrhẹ ovwan vẹ ọyen vwo arhọ kugbe. Ọ da vwẹ imwemwu rẹ avwanre eje vwo ghovwo avwanre nẹ otọ rẹ ẹwẹn rhe,
14 o de phoro ọbe ra vwẹ obọ si rọ vọnre vẹ iji re vwọsua avwanre jovwo na. O siro no womarẹ urhe rẹ oja* ro hwere mu.
15 Ọ ban isuon kugbe egangan na phiyọ nure, o ji dje ayen phia vwẹ azagba kerẹ ihwo re phikparobọ nure, ro vwo suẹn ayen kerẹ isodje ri nudje rẹ ophikparobọ womarẹ urhe rẹ oja* na.*
16 Ọtiọyena, ovwan jẹ ohwo vuọvo reyọ ovwan vwo guẹdjọ fikirẹ oborẹ ovwan ria kugbe oborẹ ovwan da-a, yẹrẹ fikirẹ eruo rẹ orẹ ọvo yẹrẹ orẹ rẹ emeranvwe kpokpọ yẹrẹ ẹdẹ urovwoma-a.
17 Erọnvwọn yena uhoho rẹ obo re cha vwẹ obaro, ẹkẹvuọvo ayen rugba vwevunrẹ Kristi.
18 Ovwan jẹ ohwo vuọvo nẹrhẹ osa na va ovwan abọ-ọ, ohwo ro vwo omavwerhovwẹn kpahen omaevwokpotọ rẹ ophiẹnvwe kugbe oka rẹ ẹga ra vwọ kẹ emekashe, rọ vwẹ erọnvwọn rọ mrẹre vwọ yonma. Vwọrẹ uyota, o vwo oboresorọ o vwo ru ọtiọye-en, ẹkẹvuọvo, o ruẹ ọtiọyen kidie o vwo iroro rẹ ohworakpọ,
19 ọ yọnrọn uyovwin na ga-an, uyovwin na rọ vwẹ oborẹ ugboma na guọnọre eje vwọ kẹ, ro churu oma na ejobi kuẹgbe womarẹ ẹrhon vẹ iriẹn rọyen, ọ me nẹrhẹ ọ rho vẹ ọrho ro nẹ obọ rẹ Ọghẹnẹ rhe.
20 Ọ da dianẹ ovwan vẹ Kristi ghwu kugbe vwọ kpahen iroro* rẹ akpọ na, kẹ diesorọ ovwan vwo yerẹn kerẹ ihwo re jehẹ ẹbẹre ọvo rẹ akpọ na, rẹ ovwan vwo ruẹ nene iji nana:
21 “Wọ yọnra-an, yẹrẹ davwa-an, yẹrẹ djobọte-e,”
22 iji ro shekpahen erọnvwọn re ghwọrọ siẹrẹ a da reyọ ayen vwo ruiruo vwo nene iji kugbe iyono rẹ ihworakpọ nu?
23 Dede nẹ e họhọ emu rẹ aghwanre, jẹ ayen oka rẹ ẹga rẹ ohwo sane komobọ rọyen kugbe omaevwokpotọ rẹ ophiẹnvwe, oja ọgangan ra vwọ ria ugboma na, ẹkẹvuọvo ayen fiemu vuọvo vwẹ ohọnre re nene ojevwe rẹ ugboma na họnra na-a.
Eta rehẹ obotọ na
^ Vwẹ Grik, “re je rhe mrẹ opharo mẹ dẹvo-o.”
^ Vwẹ Grik, “erọnvwọn rẹsosuọ.”
^ Ni Eta re Vwomaphia.
^ Ni Eta re Vwomaphia.
^ Yẹrẹ ọ sa dia, “wan oma rọyen.”
^ Vwẹ Grik, “erọnvwọn rẹsosuọ.”