Ọbe Vwo Rhe Ihwo ri Kọlose 3:1-25
3 Ẹkẹvuọvo, ọ da dianẹ a kpare ovwan vẹ Kristi vrẹn, ovwan gba rha guọnọ erọnvwọn rehẹ obenu, rọ dia asan rẹ Kristi de chidia obọrhen rẹ Ọghẹnẹ.
2 Ovwan mu ẹwẹn rẹ ovwan kpahen erọnvwọn rehẹ obenu, ọ dia erọnvwọn rehẹ otọrakpọ na-a.
3 Kidie ovwan ghwuru, e ji si arhọ rẹ ovwan nu vwevunrẹ Kristi rọ dia ohwo rọ vẹ Ọghẹnẹ gba herọ.
4 Ọke ra da vwẹ Kristi rọ dia arhọ rẹ avwanre na vwọ phia nu, ka je vwẹ ovwan vẹ ọyen vwọ phia vwẹ urinrin.
5 Ọtiọyena, ovwan hwe ẹbẹre sansan rẹ ugboma rẹ ovwan rọhẹ akpọ na ghwu vwọ kpahen ọfanrhiẹn,* jẹfuọn, urhurusivwe rẹ ehware re je suon, urhurusivwe ọbrabra, kugbe urhuru, rọ dia edjọẹgọ.
6 Fikirẹ erọnvwọn yena yen ophu rẹ Ọghẹnẹ vwọ cha na.
7 Ovwan ji ru oka rẹ erọnvwọn tiọyena jovwo.
8 Ẹkẹvuọvo asaọkiephana ovwan siobọnẹ ayen eje: ophu ọgangan, ophu, umiovwo, ekan kugbe erharhe eta vwo nẹ unu rẹ ovwan.
9 Ovwan guẹn efian kẹ ohwohwo-o, ovwan ku uruemu* rẹ awanre na vẹ irueru rọyen nu,
10 rere ovwan ku uruemu ọkpokpọ na phiyọ, ra vwẹ erianriẹn ọgbagba vwo ruẹ phiyọ ọkpokpọ vwo nene uhoho rẹ ohwo rọ marọ.
11 Vwevunrẹ uruemu ọkpokpọ na, ofẹnẹ herọ vwẹ Grik yẹrẹ Ju-u, oyanvwe yẹrẹ jẹyanvwọ-ọn, ọrhorha, Sintian,* ọviẹn yẹrẹ ọmuvwiẹ-ẹ, ẹkẹvuọvo Kristi yen erọnvwọn ejobi, ọ jehẹ evunrẹ ihwo ejobi.
12 Vwẹ idjerhe vuọvo na, kerẹ ihwo efuanfon re je pha ghanghanre rẹ Ọghẹnẹ jẹreyọ, ovwan ku uvi rẹ ẹguọnọ rẹ arodọnvwẹ, uruemu esiri, omaevwokpotọ, dẹndẹn kugbe edirin phiyọ.
13 Ovwan rhe chirakon rẹ ohwohwo ji vwo ghovwo ohwohwo ọphẹ, ọ da tobọ dianẹ ohwo ọvo gbe ohwo ọfa ku. Kirobo ri Jihova* vwo ghovwo ovwan ọphẹ na, ovwan ji ru ọtiọyen.
14 Ẹkẹvuọvo vwọ vrẹ enana eje, ovwan ku ẹguọnọ phiyọ, kidie ẹguọnọ churu ihwo eje kuẹgbe gbagba.
15 Vwọba, e jẹ ufuoma ri Kristi sun vwevunrẹ ubiudu rẹ ovwan, kidie e se ovwan vwọ rhe ufuoma rẹ ugboma ọvuọvo na. Ovwan me rha kpẹvwẹ.
16 We jẹ ota ri Kristi na ruiruo vọnvọn vwevunrẹ ovwan, ọ me je nẹrhẹ ovwan ghwanre. Ovwan rhe yono je bọn ohwohwo gan* vẹ ine rẹ ejiro, ejiro vwọ kẹ Ọghẹnẹ, ine rẹ ẹwẹn ra sua vẹ ẹwẹn rẹ akpẹvwẹ, ovwan so une vwẹ ubiudu rẹ ovwan vwọ kẹ Jihova.*
17 Vwẹ kemu kemu rẹ ovwan ta yẹrẹ rẹ ovwan ruẹ, ovwan ru ayen eje vwẹ odẹ rẹ Ọrovwori na Jesu, ovwan rha kpẹvwẹ Ọghẹnẹ rọ dia Ọsẹ na wan oma rọyen.
18 Ovwan rẹ eya, ovwan vwomakpotọ vwọ kẹ eshare rẹ ovwan, kirobo ro fori nẹ idibo rẹ Ọrovwori na ru.
19 Ovwan rẹ eshare, ovwan rhe vwo ẹguọnọ rẹ eya rẹ ovwan, ovwan muophu ọgangan kpahen* aye-en.
20 Ovwan rẹ emọ, we muọghọ kẹ* esẹ vẹ ini rẹ ovwan vwẹ emu ejobi, kidie ọnana je Ọrovwori na mamọ.
21 Ovwan esẹ, we ruẹ obo ri che miovwo emọ rẹ ovwan ivu-un,* rere ofu vwo jẹ ayen edje.*
22 Ovwan eviẹn, we muọghọ kẹ inini rẹ ovwan vwẹ erọnvwọn ejobi, ọ dia ọke rẹ ayen da mrẹ ovwan ọvo-o, kerẹsiẹ ra da mrẹ nẹ ihworakpọ yen ovwan ruo kẹ-ẹ,* ẹkẹvuọvo we ruo nẹ otọ rẹ ubiudu rhe, vwọrẹ oshọẹdjẹ ri Jihova.*
23 Kemu kemu rẹ ovwan ruẹ, ovwan ruo nẹ otọ rẹ ubiudu rhe kerẹsiẹ ra da mrẹ nẹ Jihova* yen ovwan ruo kẹ, ọ dia ihworakpọ-ọ,
24 kidie ovwan riẹnre nẹ obọ ri Jihova ọyen ughwẹ rẹ ovwan che nurhe kerẹ osa. Ovwan gbodibo kẹ Onini na, Kristi.
25 Vwọrẹ uyota, ohwo ro ru chọ, a cha hwosa rẹ oruchọ ro ruru na vwọ kẹ, e che ni ohwo ru-u.
Eta rehẹ obotọ na
^ Vwẹ Grik, por·nei′a. Ni Eta re Vwomaphia.
^ Vwẹ Grik, “ohwo.”
^ Sintian mudiaphiyọ ohwo ro rhiẹro-o.
^ Ni Eta re Vwomaphia.
^ Yẹrẹ “ji brẹ ohwohwo uche.”
^ Ni Eta re Vwomaphia.
^ Yẹrẹ “ovwan djoma kuẹ.”
^ Yẹrẹ “nyẹme rẹ.”
^ Yẹrẹ “obo re cha nẹrhẹ ophu muẹ emọ rẹ ovwa-an; obo ri che ghwie emọ rẹ ovwan ivu-un.”
^ Yẹrẹ “rere ẹwẹn rayen vwo jẹ kuọrọn.”
^ Vwẹ Grik, “ọ dia iruo re ruẹ fikirẹ ujiri rẹ ihworakpọ-ọ.”
^ Ni Eta re Vwomaphia.
^ Ni Eta re Vwomaphia.