Vwo Rhe Taitọs 1:1-16
1 Pọl, odibo rẹ Ọghẹnẹ kugbe ọyinkọn ri Jesu Kristi, ro vwo oka rẹ esegbuyota rẹ ihwo rẹ Ọghẹnẹ sanere vwori kugbe erianriẹn ọgbagba rẹ uyota na rọ vẹ omaẹvwọkpahotọ kẹ Ọghẹnẹ shephiyọ,
2 re mukpahen iphiẹrophiyọ rẹ arhọ ri bẹdẹ, rẹ Ọghẹnẹ ro che se gun efia-an na veri ọke grongron rọ wanre;
3 ẹkẹvuọvo ọke ro bruphiyọ vwo te, ọ da nẹrhẹ a riẹn ota rọyen womarẹ iruo rẹ aghwoghwo ra vwọ kẹ vwẹ vwo nene iji rẹ Ọghẹnẹ rọ dia Osivwin rẹ avwanre;
4 vwo rhe Taitọs, omamọ rẹ ọmọ ro vwo oka rẹ esegbuyota rẹ avwanre vwori:
E jẹ ẹse re muwan rọye-en kugbe ufuoma ro nẹ obọ rẹ Ọghẹnẹ rọ dia Ọsẹ na kugbe Kristi Jesu Osivwin rẹ avwanre rhe, nene uwe dia.
5 Me yanjẹ uwe vwo vwẹ Krit rere wọ sa vwọ kpọ erọnvwọn ri she chọ vi, wọ me je vwẹ ekpako vwo mu vwo nẹ orere ọvo vwo kpo ọfa, kirobo re me vuẹ wẹ nẹ wo ru:
6 Ọ da dianẹ ohwo ọvo herọ ro vwo eka-an, ọshare ro vwo aye ọvo, ro vwo emọ ri segbuyota, ra je tanẹ i ruẹ ogbiru* yẹrẹ gbe vwọsua-a.
7 Kidie kerẹ odibo rẹ Ọghẹnẹ, ofori nẹ oniruo dia ohwo ro vwo eka-an, ọ dia ohwo ro ruẹ ọ robọ rọyen ọvo-o, ọ fobọ muophu-u, ọ dia ọgbaudi-i, ọ dia ohwo ro gbe ozighi-i,* ọ dia ohwo ro vwo urhuru rẹ erere rẹ ọghware-e,
8 ẹkẹvuọvo ọ me dia ohwo rọ ghọ erhorha, ohwo ro vwo ẹguọnọ rẹ emu esiri, ro vwo iroro ro fiotọ,* ọvwata, ohwo rọ fuevun, ohwo ro se suẹn oma rọyen,
9 ohwo rọ nabọ yọnrọn ota rẹ uyota* na ọke ro de yono,* rere o se vwo phiuduphiyọ ihwo awọ* womarẹ uyono rọ vọnre vẹ erere, je ghwọku ihwo re vwọsuọ.
10 Kidie ihwo buebun ri gbe vwọsua herọ, ihwo re ta eta ifefe, kugbe ihwo re phiẹn ihwo, ma rho kẹ otu ri churu mu ota rẹ oyanvwe.
11 Ofori nẹ e rhurhu unu rayen, kidie ihwo nana rha bọvwọn esegbuyota rẹ ọsoso evwruwevwin rhuotọ, rẹ ayen vwo yono erọnvwọn ro fori nẹ ayen yono-o, fikirẹ erere rẹ ọghware.
12 Ohwo ọvo vwẹ usun rayen rọ dia ọmraro rayen tare nẹ: “Ihwo ri Krit evwọrefian, eranvwe rẹ aghwa re wan ihwo oma, egbọre ri vwo oborẹ ayen ruẹ-ẹ.”
13 Oseri nana uyota. Ọtiọyena, rha vwẹ ọghwọku ọgangan kẹ ayen, rere esegbuyota rayen sa vwọ gan,
14 nẹ ayen kerhọ rẹ ikuegbe rẹ esia rẹ ihwo ri Ju kugbe iji rẹ ihwo ri chukoku uyota na-a.
15 Erọnvwọn ejobi pha fuanfon vwọ kẹ ihwo re fonro; ẹkẹvuọvo vwọ kẹ ihwo ri gberi ri ji vwo esegbuyota-a, o vwo emu vuọvo rọ fonro-o, kidie iroro kugbe ẹwẹn obrorhiẹn rayen gberi.
16 Ayen ghwoghwo vwẹ azagba nẹ ayen riẹn Ọghẹnẹ, ẹkẹvuọvo ayen senrọ womarẹ iruo rayen, kidie ayen ihwo ri tuon oma, ri nyẹme-e, a je rhọnvwe kẹ ayen nẹ ayen ruiruo esiri vuọvo-o.
Eta rehẹ obotọ na
^ Yẹrẹ “i muẹ ruẹ.”
^ Yẹrẹ “ohwo rọ ghwiẹ ihwo-o.”
^ Yẹrẹ “iroro abavo.”
^ Yẹrẹ “ovuẹ ra sa vwẹroso.”
^ Yẹrẹ “vwẹ ona rẹ uyono rọyen.”
^ Yẹrẹ “bru ihwo uche.”