Vwo Rhe Taitọs 2:1-15
2 Ẹkẹvuọvo vwọ kẹ wẹ, wọ me rha ta ota rọ vẹ uyono rọ vọnre vẹ erere na shephiyọ.
2 E jẹ eshare re kpakore na dia ihwo ri ruẹ emu vrẹka-a, ihwo ri se emu gboja, ri vwo iroro ro fiotọ, esegbuyota rọ ghwotọ, ẹguọnọ, kugbe akoechiro.
3 Vwẹ idjerhe vuọvo na, e jẹ eya re kpakore vwo uruemu ro dje ọghọ phia kẹ Ọghẹnẹ, ayen miovwo ihwo-o, ayen dia eviẹn vwọ kẹ iwaini buebu-un, ayen dia iyono rẹ obo ri yovwirin,
4 rere ayen sa vwọ vwẹ uchebro vwọ kẹ* eya re dia ighene na nẹ ayen vwo ẹguọnọ rẹ eshare rayen, vwo ẹguọnọ rẹ emọ rayen,
5 vwo iroro ro fiotọ, vwo uruemu rọ fonro, dia ihwo re wian vwẹ uwevwin,* ri vwo omamọ uruemu, re vwomakpotọ kẹ eshare rayen, rere e vwo jẹ erharhe eta ẹta kpahen ota rẹ Ọghẹnẹ.
6 Vwẹ idjerhe vuọvo na, rha vwẹ uchebro kẹ ighene eshare na nẹ ayen vwo iroro ro fiotọ.
7 Vwẹ kidjerhe kidjerhe, dia udje vwẹ iruo esiri. Vwẹ ẹwẹn re vwo se emu gboja vwo yono ihwo obo re fonro;*
8 rha reyọ eta re vọnre vẹ erere ra cha sa nọ enọ kpahe-en vwo ruiruo, rere oma vwọ vo otu re vwọsua, ayen rha cha mrẹ ota ọbrabra* vuọvo ta kpahen avwanre-e.
9 E jẹ eviẹn vwomakpotọ kẹ inini rayen vwẹ erọnvwọn ejobi, ayen davwẹngba vwo ru obo ri je ayen, ayen nene inini rayen kprọ eta-a,
10 ayen cho mie inini raye-en, ẹkẹvuọvo e jẹ ayen dia ihwo ra sa vwẹroso karekare, rere vwẹ kidjerhe kidjerhe, e se vwo brọghọ phiyọ uyono rẹ Ọghẹnẹ rọ dia Osivwin rẹ avwanre.
11 Kidie e dje ẹse rẹ Ọghẹnẹ re muwan rọye-en na phia re, rọ nẹrhẹ koka koka rẹ ihwo se vwo usivwin.
12 O yono avwanre nẹ avwanre sen iruemu ri tuẹn Ọghẹnẹ oma kugbe ojevwe rẹ akpọ na, rere avwanre yeren akpọ vwẹ idjerhe ro djerephia nẹ avwanre vwo iroro ro fiotọ, uruemu ọvwata kugbe omaẹvwọkpahotọ kẹ Ọghẹnẹ vwẹ eyeren* nana,
13 rẹ avwanre vwọ hẹrhẹ iphiẹrophiyọ rẹ omavwerhovwẹn kugbe ẹvwọphia rẹ urinrin rẹ Ọghẹnẹ rode na kugbe ọ rẹ Osivwin rẹ avwanre Jesu Kristi,
14 ohwo rọ vwẹ oma rọyen kpahotọ kẹ avwanre rere o vwo sivwin avwanre* vwo nẹ koka koka ri jurhi ẹyọnrọn, ji ru avwanre fon vwọ kẹ oma rọyen, ihwo re dia ughwẹ ọghanghanre vwọ kẹ, ri vwo oruru rẹ iruo esiri.
15 Rhe yono erọnvwọn nana, rhe brẹ ihwo uche,* rha ghwọkuẹ ihwo vẹ ogangan ejobi. Wo jẹ ohwo vuọvo vwẹ ẹro ri phovwin vwo ni we-e.
Eta rehẹ obotọ na
^ Yẹrẹ “ayen karophiyọ; ayen yono.”
^ Yẹrẹ “ihwo re vwẹrote iwevwin rayen.”
^ Yẹrẹ ọ sa dia, “yono vẹ ẹfuọn.”
^ Yẹrẹ “orharhe ota.”
^ Yẹrẹ “oge.” Ni Eta re Vwomaphia.
^ Vwẹ Grik, “rere ọ vwọ tan avwanre hirhe.”
^ Yẹrẹ “rhe phiuduphiyọ ihwo awọ.”