Vwo Rhe Taitọs 3:1-15
3 Wọ me rha karophiyọ ayen nẹ ayen vwomakpotọ ji muọghọ kẹ isuon kugbe ihwo ri vwo ogangan rẹ usuon, ayen choma vwọ kẹ kiruo kiruo esiri ejobi,
2 ayen ta erharhe eta kpahen ohwo vuọvo-o, ayen dia ihwo rẹ ẹghwọ-ọ, ẹkẹvuọvo ayen dia ihwo re nuẹ,* ri dje uruemu re dẹndẹn phia kẹ ihwo ejobi.
3 Kidie avwanre ka dia ihwo ri vwo iroro-o, ri nyẹme-e, re sun ghwru, re dia eviẹn vwọ kẹ urhurusivwe kugbe ojevwe sansan, ri ruẹ obo re brare je rioma gangan, ri tun ihwo oma ji vwo utuoma kpahen ohwohwo.
4 Ẹkẹvuọvo, ọke rẹ ẹse rẹ Ọghẹnẹ rọ dia Osivwin rẹ avwanre, kugbe ẹguọnọ ro vwo kpahen ihworakpọ vwọ teyenphia
5 (ọ dia fikirẹ iruo rẹ ọvwata vuọvo rẹ avwanre ruru-u, ẹkẹvuọvo fikirẹ arodọnvwẹ rọyen), o de sivwin avwanre womarẹ ẹhọ rọ nẹrhẹ avwanre vwo arhọ kugbe eruo ro ru avwanre phiyọ ọkpokpọ womarẹ ẹwẹn ọfuanfon.
6 O ku ẹwẹn nana ku avwanre vọnvọn* womarẹ Jesu Kristi rọ dia Osivwin rẹ avwanre,
7 rere ọke re de kere avwanre phiyọ evwata womarẹ ẹse re muwan rọye-en rẹ ohwo yena nu, kẹ avwanre sa dia iriuku ri vwo iphiẹrophiyọ rẹ arhọ ri bẹdẹ.
8 A sa vwẹroso eta nana, me je guọnọ nẹ wọ rha kanrunumuẹ ayen, rere ihwo ri se Ọghẹnẹ gbuyota se vwo mu ẹwẹn rayen kpahen eruo rẹ iruo esiri ọkieje. Erọnvwọn nana yovwirin, i ji fierere vwọ kẹ ihwo.
9 Ẹkẹvuọvo, wo vwobọ vwẹ aphro rẹ ẹkpa, ehiahiẹ ri shekpahen uvwiẹ rẹ esẹ ride kugbe ẹghwọ vẹ ohọnre fikirẹ Urhi na-a, kidie eyen emu ifefe ri vwo erere vuọvo-o.
10 Kẹnoma kẹ ohwo ro titi ẹko, ọke ru wọ da vwẹ uchebro* kẹ obọ rẹsosuọ vẹ obọ rivẹ nu,
11 kidie wọ riẹnre nẹ ohwo tiọyena chukoku idjerhe na re, o ruẹ umwemwu, o ji brorhiẹn hwe oma rọyen nure.
12 Ọke mi de ji Atemas yẹrẹ Taekikọs bru we rhe, davwẹngba wẹn eje wo bru vwe rhe Nikopolis, kidie etiyin yen mi brorhiẹn nẹ me cha dia vwẹ ọke ekpahen na.
13 Mrẹvughe nẹ wọ vwẹ oborẹ Zenas rọ nabọ riẹn Urhi na, kugbe Apolọs guọnọre vwọ kẹ ayen, rere emu vuọvo vwo jẹ ayen ẹkanrọn vwẹ oyan rayen.
14 Ẹkẹvuọvo, jẹ ihwo rẹ avwanre ji yono obo re ruiruo esiri ọkieje, ayen sa vwọ vwẹ ukẹcha phia vwẹ ọke ra da guọnọ ukẹcha rẹ okpakpa, rere iruo esiri vwo jẹ ayen ẹkanrọn.*
15 Ihwo eje re vẹ ovwẹ gba herọ vwẹ uyeren rayen vwo rhe we. Vwẹ uyeren mẹ vwọ kẹ ihwo eje ri vwo ẹguọnọ rẹ avwanre vwevunrẹ esegbuyota na.
E jẹ ẹse re muwan rọye-en na nene ovwan ejobi dia.
Eta rehẹ obotọ na
^ Yẹrẹ “ihwo ri roro emu fiotọ.”
^ Yẹrẹ “ghwologhwolo.”
^ Yẹrẹ “orhọesio.”
^ Vwẹ Grik, “rere ayen vwo jẹ dia ihwo re mọ emamọ-ọ.”