Vwo Rhe Ihwo ri Filipae 1:1-30
1 Pọl kugbe Timoti, idibo ri Kristi Jesu, vwo rhe ihwo efuanfon na eje re vẹ Kristi Jesu gba herọ rehẹ Filipae, kugbe iniruo vẹ idibo rowian:
2 E jẹ ẹse re muwan rọye-en kugbe ufuoma ro nẹ obọ rẹ Ọghẹnẹ rọ dia Ọsẹ rẹ avwanre kugbe Ọrovwori Jesu Kristi rhe, nene ovwan dia.
3 Me kpẹvwẹ Ọghẹnẹ mẹ kọke kọke me da karophiyọ ovwan
4 vwẹ koyare koyare mẹ vwọ kẹ ovwan ejobi. Me yare koyare koyare vẹ aghọghọ,
5 fikirẹ oborẹ ovwan vwo toroba ẹyan-obaro rẹ* iyẹnrẹn esiri na vwo nẹ ẹdẹ rẹsosuọ rhi duvwun ọke nana.
6 Kidie mi vwo imuẹro nana dẹn nẹ ohwo rọ ton omamọ rẹ iruo nana phiyọ vwẹ ohri rẹ ovwan na che ruo re bẹsiẹ ẹdẹ ri Kristi Jesu na vwo te.
7 Ọyen obo ri shephiyọ ri mi vwo roro ọnana kpahen ovwan eje, kidie mi vwo ẹguọnọ rẹ ovwan, ovwan re vẹ ovwẹ ghara vwẹ ẹse re muwan rọye-en vwevunrẹ uwodi re me hepha kugbe vwevunrẹ owian ra vwọ chochọn je reyọ iyẹnrẹn esiri na vwo muẹ vwo nene urhi.
8 Kidie Ọghẹnẹ oseri mẹ kpahen oborẹ urhuru rẹ ovwan eje si vwe, kidie oka rẹ ẹguọnọ ri Kristi Jesu vwo kpahen ovwan yen mi ji vwo.
9 Ọnana yen obo re me nẹrhovwo kpahan ọkieje, nẹ e jẹ ẹguọnọ rẹ ovwan dje ebuon ebuon vẹ erianriẹn ọgbagba kugbe uvi rẹ ọmrẹvughe;
10 rere ovwan se vwo vwo imuẹro rẹ erọnvwọn re ma ghanre, ovwan vwo jẹ upe evwo, we vwo jẹ ekprowọ ẹsuọ kẹ ihwo efa bẹsiẹ ẹdẹ ri Kristi vwo te;
11 rere ovwan je vwọ vọn vẹ omamọ rẹ ọvwata womarẹ Jesu Kristi, vwọ kẹ urinrin vẹ ejiro rẹ Ọghẹnẹ.
12 Asaọkiephana iniọvo, me guọnọ jẹ ovwan riẹn nẹ ẹdia re me hepha na nẹrhẹ iyẹnrẹn esiri na yan obaro,
13 te ẹdia rẹ Isodje eje re rhẹrẹ osun ri Rom, kugbe ihwo ri chekọ eje da rhe riẹn kpahen uwodi re me hepha fikirẹ Kristi na.
14 Asaọkiephana, buebun rẹ iniọvo na vwevunrẹ Ọrovwori na rhi vwo uduefiogbere fikirẹ uwodi me hepha na, uduefiogbere rayen ganphiyọ rẹ ayen vwọ ta ota rẹ Ọghẹnẹ vwọrẹ jẹ oshọ ẹdjẹ.
15 Uyota, evo ghwoghwo Kristi na fikirẹ omaẹriọ ọgangan vẹ omaẹvwanvwọn, ẹkẹvuọvo efa ruẹ ọtiọyen vẹ ẹwẹn esiri.
16 Ẹguọnọ yen muẹ i ri mi djunute ukuko na vwo ghwoghwo Kristi na, kidie ayen riẹnre nẹ a vwẹ ovwẹ mu me vwọ chochọn rẹ iyẹnrẹn esiri na;
17 ẹkẹvuovo i ri mi ke djunute na ruẹ ọtiọyen kidie ayen guọnọ sua ẹghwọ, ọ dia kidie nẹ ayen vwo ẹwẹn esiri-i, ayen guọnọ sua okpetu kẹ vwẹ vwevunrẹ uwodi re me hepha na.
18 Kẹ die yen nuro rhe? Vwẹ kidjerhe kidjerhe, owenẹ ọ dia vwọrẹ omeru yẹrẹ vwọrẹ uyota, e ghwoghwo Kristi na, ọnana kẹ vwẹ aghọghọ. Vwọrẹ uyota, me je cha rha ghọghọ,
19 kidie me riẹnre nẹ ọnana cha nẹrhẹ mi vwo usivwin womarẹ oyare rẹ ovwan kugbe ukẹcha rẹ ẹwẹn ri Jesu Kristi.
20 Ọnana vẹ obo ri mi rhẹro rọyen gangan ri mi ji vwo iphiẹrophiyọ kpahen shephiyọ, nẹ oma cha vo ovwẹ vwẹ idjerhe vuọvo-o, ẹkẹvuọvo me cha ta ota vwọrẹ jẹ oshọ ẹdjẹ, je vwẹ urinrin vwọ kẹ Kristi vwẹ ugboma mẹ kirobo ri mi ruẹ jovwo, owenẹ ọ dia womarẹ arhọ yẹrẹ womarẹ ughwu.
21 Vwọ kẹ vwẹ, me da rhọ, me rhọre vwọ kẹ Kristi, mi de ghwu, erere vwọ kẹ vwẹ.
22 Asaọkiephana, mi de yerin vwevunrẹ uvwo na, kẹ fikirẹ erere rẹ iruo mẹ; dedena, obo re me cha jẹ, mi djerephia-a.
23 Me riẹn ọ re me cha jẹ vwẹ usun rẹ erọnvwọn ivẹ nana-a, kidie me guọnọre nẹ e siobọnẹ uvwe rere mi re nene Kristi dia, kidie vwọrẹ imuẹro, ọyena yen me yovwin.
24 Ẹkẹvuọvo, obo ri che me fierere kẹ ovwan yen me vwọ dia vwevunrẹ uvwo na.
25 Ọtiọyena, vẹ imuẹro nana, me riẹnre nẹ me cha domaji ji nene ovwan eje dia fikirẹ ẹyan-obaro kugbe aghọghọ rẹ ovwan vwevunrẹ esegbuyota na,
26 rere aghọghọ rẹ ovwan vwo bunphiyọ vwevunrẹ Kristi Jesu fiki mẹ, ọke me da rhoma kuomakugbe ovwan.
27 Takpe nẹ ovwan dje* uruemu ro fo iyẹnrẹn esiri ro shekpahen Kristi na phia, rere owenẹ me rhere rhe mrẹ ovwan yẹrẹ me rhere-e, mi se vwo nyo kpahen ovwan nẹ ovwan mudia gan kokoroko vwevunrẹ ẹwẹn ọvo kugbe erhi ọvo,* nẹ ovwan eje wian kuẹgbe vwọ sẹro rẹ esegbuyota rẹ ovwan vwo kpahen iyẹnrẹn esiri na,
28 kugbe nẹ ovwan djoshọ rẹ ihwo re vwọsua ovwan vwẹ idjerhe vuọvo-o. Ọnana oka rẹ oghwọrọ vwọ kẹ ayen, ẹkẹvuọvo, ọ rẹ usivwin vwọ kẹ ovwan; obọ rẹ Ọghẹnẹ yen o nurhe.
29 Kidie a kẹ ovwan uphẹn na fikirẹ Kristi, ọ dia ọ rẹ ovwan vwo vwo esegbuyota kpahọn ọvo-o, ẹkẹvuọvo ovwan je vwọ rioja fiki rọyen.
30 Kidie nẹ ovwan hirharokuẹ ohọnre vuọvo rẹ ovwan mrẹre nẹ mi hirharoku, rẹ ovwan nyo asaọkiephana nẹ mi ji hirharokuẹ te ọke na.
Eta rehẹ obotọ na
^ Yẹrẹ “fikirẹ ẹkẹn rẹ ovwan ruru vwevunrẹ.”
^ Yẹrẹ “ovwan ruẹ kerẹ emotọ ri dje.”
^ Yẹrẹ “ẹwẹn ọvo vẹ okugbe.”