Vwo Rhe Ihwo ri Filipae 2:1-30
2 Ọ da dianẹ uduephiophiyawọ herọ vwevunrẹ Kristi, ọ da dianẹ uchebro rẹ ẹguọnọ herọ, ọ da dianẹ ovwan kuomakuẹgbe vwọ ga ẹga,* ọ da dianẹ ẹguọnọ vẹ arodọnvwẹ herọ,
2 ovwan ru aghọghọ mẹ vọn womarẹ ovwan vwo vwo ẹwẹn ọvuọvo, ovwan vwo vwo ẹguọnọ ọvuọvo, ovwan vwọ dia vwọrẹ okugbe ọvuọvo,* ovwan ji vwo vwo iroro ọvuọvo.
3 Ovwan vwẹ ẹghwọ yẹrẹ omaẹkparọ vwo ruẹ emu ọvuọvo-o, ẹkẹvuọvo vwọrẹ omaevwokpotọ ovwan no nẹ ihwo efa yovwin nọ ovwan,
4 ovwan guọnọ erhuvwu romobọ rẹ ovwan ọvo-o, ẹkẹvuọvo ovwan je guọnọ erhuvwu rẹ ihwo efa.
5 Ovwan vwo oka rẹ iroro nana ri Kristi Jesu ji vwo na,
6 dede nẹ ọ họhọ Ọghẹnẹ, ọ tobọ roro kpahen obo rọ sa vwọ davwẹngba rere ọ vẹ Ọghẹnẹ vwọ dia abavo-o.
7 Ẹjo, o siobọnẹ erọnvwọn eje, ọ da rhe họhọ ọviẹn, ọ da rhe dia ohworakpọ.
8 Vwọ vrẹ ọyena, ọke rọ vwọ rhe kerẹ ohworakpọ,* ọ vwomakpotọ o de nyẹme re te ẹdia rẹ ughwu, e, ughwu vwẹ urhe rẹ oja.*
9 Fikirẹ ọnana dẹn yen Ọghẹnẹ vwọ kparọ kpenu kpo ẹdia rọ vrẹ ọ rọ hepha jovwo, o de ji mu odẹ rọ vrẹ kodẹ kodẹ vwọ kẹ,
10 rere igbon ejobi vwo shiguẹ vwẹ odẹ ri Jesu, te e rehẹ obodjuvwu vẹ e rehẹ akpọ kugbe e rehẹ obotọ rẹ akpọ na,
11 kẹrẹnvwe kẹrẹnvwe me je rhọnvwe vwẹ azagba nẹ Jesu Kristi yen Ọrovwori vwọ kẹ urinrin rẹ Ọghẹnẹ rọ dia Ọsẹ na.
12 Ọtiọyena, iniọvo mẹ eghanghanre, kirobo rẹ ovwan nyẹme ọkieje, ọ dia ọke re me vẹ ovwan vwọ herọ ọvo-o, ẹkẹvuọvo tobọ vrẹ ọtiọyen vwẹ obuko mẹ na, ovwan rha vwẹ oshọ vẹ ẹphariẹ vwọ wian kẹ usivwin rẹ ovwan.
13 Ọghẹnẹ yen ohwo rọ kẹ ovwan ẹgba, kidie oma vwerhọn ro vwo ru ọtiọyen, ọ kẹ ovwan owenvwe vẹ ẹgba rẹ ovwan vwo ruiruo.
14 Ovwan rhe ruẹ erọnvwọn eje vwọ vrabọ rẹ iguegun vẹ aphro,
15 rere ovwan vwọ dia ihwo ri vwo eka-an, re je re abe-e, kerẹ emọ rẹ Ọghẹnẹ ri jẹ upe evwo vwevunrẹ uvwiẹ rọ pha gugunu chachahen rẹ ovwan dia ohri rọyen de lo kerẹ irhukpẹ vwẹ akpọ na,
16 je yọnrọn ota rẹ arhọ na kokoroko. Ọke yena ke me sa ghọghọ vwẹ ẹdẹ ri Kristi, kidie me riẹnre nẹ me djẹ kufia yẹrẹ wiowian ọgangan kufia-a.
17 Ẹkẹvuọvo, ọ da tobọ dianẹ e ku vwe kerẹ izobo rẹ udi kuẹ enu rẹ izobo na kugbe iruo ọfuanfon* rẹ esegbuyota rẹ ovwan mu ovwan vwo ru, oma vwerhen ovwẹ, mi ji nene ovwan ejobi ghọghọ.
18 Vwẹ idjerhe vuọvo na, e jẹ oma je vwerhen ovwan rere ovwan nene uvwe ghọghọ.
19 Asaọkiephana, mi rhẹro rọyen nẹ ọ da dia ọhọre rẹ Ọrovwori Jesu, mi che ji Timoti bru ovwan rhe kẹrẹkpẹ, rere me sa vwọ mrẹ ọbọngan ọke mi de nyo iyẹnrẹn kpahen ovwan.
20 Kidie mi vwo ohwo ọfa ro vwo uruemu kerẹ ọrọyen rọ cha nabọ vwẹrote ọdavwẹ rẹ ovwa-an.
21 Kidie ihwo ri chekọ na eje guọnọ erhuvwu romobọ rayen, ọ dia ọ ri Jesu Kristi-i.
22 Ẹkẹvuọvo ovwan riẹnre nẹ ọ vwẹ uruemu vwo djephia nẹ ọyen nabọ muwan, kidie kerẹ ọmọ vẹ ọsẹ, o nene uvwe gbodibo vwọ hẹre iyẹnrẹn esiri na.
23 Ọtiọyena, ọyen yen mi vwori vwẹ ẹwẹn nẹ mi che ji bru ovwan rhe ugege me da ghwa riẹn obo re cha phia kẹ vwẹ.
24 Vwọrẹ uyota, mi vwo imuẹro nẹ ọ da dia ọhọre rẹ Ọrovwori na, mi ji che bru ovwan rhe kẹrẹkpẹ.
25 Ẹkẹvuọvo asaọkiephana mi niro nẹ o shephiyọ mi vwo ji Ẹpafroditọs bru ovwan rhe, oniọvo mẹ kugbe ohwo me vẹ ọyen gba wian, re me vẹ ọyen je dia isodje, ọ ke je dia ọyinkọn rẹ ovwan, rẹ ovwan ji rhe rhe vwẹrote vwe,
26 kidie o vwo owenvwe rọ vwọ mrẹ ovwan eje, rọ vwọ dianẹ o muomaphiyọ kidie nẹ ovwan nyori nẹ o shero ọga.
27 Vwọrẹ uyota, o ghini shero ọga te ẹdia ro de dino ghwu; ẹkẹvuọvo Ọghẹnẹ gbe arodọnvwẹ kẹ, jẹ ọ dia ọyen ọvo-o, o ji gbe arodọnvwẹ kẹ vwẹ rere mi vwo jẹ uvweri ọvo ẹvwọba ọfa.
28 Ọtiọyena, mi jo brẹ ovwan cha kpakpata rere ovwan da mrẹ, ovwan vwọ rhoma ghọghọ, ẹnwan mẹ mi ji kpotọ.
29 Ovwan rhiabọdede sasasa kirobo rẹ ovwan ruẹ kẹ idibo rẹ Ọrovwori na, ovwan rhe nẹ eshare tiọyena ghanghanre,
30 kidie ọ joma ghwu fikirẹ iruo ri Kristi,* o phi arhọ rọyen phiyọ ẹdia rẹ imuoshọ* rere o se vwo ru obo ro fori nẹ ovwan ru kẹ vwẹ ọ da dianẹ ovwan hẹ obonẹ jovwo.
Eta rehẹ obotọ na
^ Vwẹ Grik, “ovwan ghara ẹwẹn na.”
^ Yẹrẹ “dia kugbe vwọrẹ erhi.” Ni Eta re Vwomaphia.
^ Vwẹ Grik, “ọke ra vwọ mrẹ nẹ ọ vwomaphia kerẹ ohworakpọ.”
^ Ni Eta re Vwomaphia.
^ Yẹrẹ “iruo rẹ azagba.”
^ Yẹrẹ ọ sa dia, “iruo rẹ Ọrovwori na.”
^ Yẹrẹ “o phi erhi rọyen phiyọ ẹdia rẹ ideghene.” Ni Eta re Vwomaphia.