Vwo Rhe Ihwo ri Filipae 3:1-21
3 Ọ rọ koba iniọvo mẹ, ovwan rha ghọghọ vwevunrẹ Ọrovwori na. Ọ dia ukpokpoma kẹ vwẹ me vwọ vwanriẹn erọnvwọn vuọvo na si rhe ovwa-an, mi ruo kidie me guọnọ sẹro rẹ ovwan.
2 Ovwan nomaso kpahen ihwo ri ruẹ kerẹ eranko, nomaso kpahen ihwo re sua omaẹwan, nomaso kpahen ihwo re yanvwa.
3 Kidie avwanre yen ihwo ri vwo uvi rẹ oyanvwe na, avwanre re ga ẹga ọfuanfon womarẹ ẹwẹn rẹ Ọghẹnẹ, re vwẹ Kristi Jesu vwọ yonma, avwanre mu ẹroẹvwọsuọ avwanre kpahen ugboma na-a,
4 ọ da dianẹ ohwo ọvo guọnọ yonma kidie nẹ ọ vwẹroso ugboma na, me sa yonma vrẹ ohwo yena:
5 a yanvwe ovwẹ vwẹ ẹdẹ rẹrenren, mẹvwẹ ohwo rẹ Izrẹl ro nẹ uvwiẹ ri Benjamin rhe, ohwo ri Hibru rẹ ihwo ri Hibru vwiẹre. Vwọ kpahen urhi, mẹvwẹ Farisi,
6 vwọ kpahen oruru, mi mukpahen ukoko na, vwọ kpahen ophiọnphiọn re mu kpahen urhi, mi dje oma mẹ phia kerẹ ohwo ro vwo eka-an.
7 Dedena, erọnvwọn re dia erere kẹ vwẹ jovwo, mi ni ayen kirobo re ku kufia* fikirẹ Kristi na.
8 Vwọba, mi ji ni erọnvwọn eje kirobo re ku kufia fikirẹ erianriẹn ri Kristi Jesu Ọrovwovwe ra mrẹ vwo dje-e. Fiki rọyen yen mi vwo ku erọnvwọn ejobi kufia mi de ni ayen kerẹ erhurhu,* rere mi se vwo vwo Kristi,
9 rere a sa vwọ mrẹ nẹ me vẹ ọyen herọ, ọ dia fikirẹ ophiọnphiọn romobọ mẹ ro nẹ enene rẹ Urhi na rhe-e, ẹkẹvuọvo fikirẹ ophiọnphiọn rọ herọ womarẹ esegbuyota re vwo kpahen Kristi, ophiọnphiọn ro nẹ obọ rẹ Ọghẹnẹ rhe re mu kpahen esegbuyota.
10 Ọdavwẹ mẹ ọyen me vwọ riẹn kugbe ogangan ra vwọ kparọ nẹ ushi, me guọnọ rioja kirobo rọ rioja, ji ghwu kirobo ro ghwuru,
11 mi ruẹ ọtiọyen rere ọ da dia obo ri shephiyọ, uphẹn rẹ evrẹnushi rẹ ukaro na se vwo te vwe obọ.
12 Ọ dianẹ kẹ o te vwe obọ re yẹrẹ ke ru vwe gba re-e, ẹkẹvuọvo me pharha sẹ obọ mẹ se te orọnvwọn yena ri Kristi Jesu vwẹ fiki rọyen vwọ sane ovwẹ.*
13 Iniọvo, mi ji rhi ni oma mẹ kerẹsiẹ ra da mrẹ nẹ o te vwe obọ re-e, ẹkẹvuọvo orọnvwọn ọvo muẹro: Me kpairoro vrẹ erọnvwọn rehẹ obuko ke me vwọtua erọnvwọn rehẹ obaro,
14 me pharha rere mi se vwo vwo osa rẹ use rẹ obenu na rẹ Ọghẹnẹ vwọ kẹ ohwo womarẹ Kristi Jesu.
15 Ọtiọyena, e jẹ avwanre ri tedje vwo oka rẹ iroro nana, ẹkẹvuọvo ọ da dianẹ ovwan vwo iroro rọ fẹnẹ ọnana, Ọghẹnẹ che dje iroro ọgbagba na kẹ ovwan.
16 Obo rọ wanre eje, asan rẹ avwanre yan obaro te, e jẹ avwanre rha yan obaro vwẹ idjerhe vuọvo na.
17 Iniọvo, e jẹ ovwan ejobi ku evun gbe vwẹrokere uvwe, ovwan me je tẹnrovi ihwo re yan vwẹ idjerhe ro shephiyọ vẹ udje rẹ avwanre phi phiyotọ kẹ ovwan.
18 Kidie ihwo buebun herọ ri mi djunute kọke kọke jovwo, jẹ asaọkiephana mi djunute ayen vẹ ameoviẹ, ihwo ri ruẹ kerẹ ivwighrẹn rẹ urhe rẹ oja* ri Kristi na.
19 Oba rayen kẹ oghwọrọ, evun rayen yen ọghẹnẹ rayen, omavovwẹ rayen yen urinrin rayen, ayen mu ẹwẹn rayen kpahen erọnvwọn rẹ akpọ na.
20 Ẹkẹvuọvo avwanre emotọ rẹ odjuvwu, avwanre vwẹ owenvwe hẹrhẹ osivwin ọvo rọ dia Ọrovwori na Jesu Kristi rọhẹ obodjuvwu,
21 rọ cha vwẹ ogangan rọyen rode ro che vwo sun erọnvwọn ejobi na vwo wene ugboma rẹ avwanre rọ vwiẹre na vwọ dia kerẹ ugboma rọyen rọ vọnre vẹ urinrin.
Eta rehẹ obotọ na
^ Yẹrẹ ọ sa dia, “mi ni ayen kerẹ erọnvwọn ra kpairoro vrẹ.”
^ Yẹrẹ “ikuekun; inuhu.”
^ Vwẹ Grik, “vwọ ghwobọ kpahen ovwẹ.”
^ Ni Eta re Vwomaphia.