Vwo Rhe Ihwo ri Galesha 1:1-24
1 Pọl rọ dia ọyinkọn, ọ dia vwo nẹ obọ rẹ ihwo yẹrẹ womarẹ ohwo-o, ẹkẹvuọvo womarẹ Jesu Kristi kugbe Ọghẹnẹ rọ dia Ọsẹ na rọ kparerọ vrẹn nẹ ughwu,
2 kugbe iniọvo na eje re vẹ ovwẹ gba herọ, vwo rhe ikoko rehẹ Galesha:
3 E jẹ ẹse re muwan rọye-en kugbe ufuoma ro nẹ obọ rẹ Ọghẹnẹ rọ dia Ọsẹ rẹ avwanre kugbe Ọrovwori Jesu Kristi rhe, nene ovwan dia.
4 Ọ vwẹ oma rọyen kpahotọ fikirẹ imwemwu rẹ avwanre, rere o se vwo sivwin avwanre vwo nẹ eyeren* umwemwu nana kirobo rẹ ọhọre rẹ Ọghẹnẹ kugbe Ọsẹ rẹ avwanre hepha,
5 ohwo ra vwẹ urinrin kẹ rhirin bẹdi bẹdẹ. Isẹ.
6 O gbe vwe unu nẹ ovwan fobọ chukoku* Ohwo ro se ovwan womarẹ ẹse re muwan rọye-en ri Kristi na, vwo kpo oka rẹ iyẹnrẹn esiri ọfa.
7 Ọ dianẹ kẹ iyẹnrẹn esiri ọfa herọ-ọ, ẹkẹvuọvo o vwo ihwo evo re sua okpetu kẹ ovwan, re guọnọ chahan iyẹnrẹn esiri ro shekpahen Kristi na.
8 Ẹkẹvuọvo, avwanre yẹrẹ amakashe ro nẹ obodjuvwu rhe da tobọ ghwoghwo iyẹnrẹn esiri rọ vrẹ ọ rẹ avwanre ghwoghwo kẹ ovwan na, e jẹ ekan dia vwọ kẹ.
9 Kirobo rẹ avwanre tare jovwo, me rhoma vwanriẹn, Kohwo kohwo ro ghwoghwo iyẹnrẹn esiri rọ vrẹ ọ rẹ ovwan rhiabọreyọ na kẹ ovwan, e jẹ ekan dia vwọ kẹ.
10 Ẹroesiri rẹ ihworakpọ yen me guọnọ, gbanẹ ọ rẹ Ọghẹnẹ? Yẹrẹ, me davwẹngba mi vwo ru obo ri je ihworakpọ? Ọ da dianẹ mi ji ruẹ obo ri je ihworakpọ, kọyen me dia ọviẹn ri Kristi-i.
11 Iniọvo, me guọnọ nẹ ovwan riẹn nẹ ọ dia obọ rẹ ohworakpọ yen iyẹnrẹn esiri ri mi ghwoghwo kẹ ovwan na nurhe-e;
12 kidie ọ dia ohworakpọ yen vwerọ kẹ vwẹ yẹrẹ ke yono uvwe-e, ẹkẹvuọvo Jesu Kristi yen vwerọ nẹ vwẹ womarẹ ẹvwọphia.
13 O muẹro nẹ ovwan nyo kpahen uruemu mẹ jovwo vwẹ ẹga rẹ ihwo ri Ju, nẹ mi mukpahen ukoko rẹ Ọghẹnẹ gangan,* me je so omaẹwan rode vwọ kẹ;
14 me je nabọ yan obaro vwẹ ẹga rẹ ihwo ri Ju na vwọ vrẹ edje mẹ buebun vwẹ ẹkuotọ mẹ, kidie mi vwo oruru kpahen ẹkuruemu rẹ esẹ mẹ vwọ vrẹ ayen shesheri.
15 Ẹkẹvuọvo, ọke rẹ Ọghẹnẹ rọ reyọ ovwẹ vwo nẹ evun rẹ oni mẹ rhe, ro de ji se vwe womarẹ ẹse rọyen re muwan rọye-en, vwo no nẹ oyoma
16 ro vwo dje Ọmọ rọyen phia wan oma mẹ, rere mi se vwo ghwoghwo iyẹnrẹn esiri ro shekpahọn vwọ kẹ ẹgborho na, me nokpẹn rẹ uchebro mie ohwo* vuọvo ugege yena-a;
17 yẹrẹ ki mi ji kpo Jerusalẹm bru otu re karovwẹ dia iyinkọ-ọn, ẹkẹvuọvo mi kpo Arebia, ọyena vwọ wan nu, mi de rhivwin kpo Damaskọs.
18 Ẹgbukpe erha vwọ wan nu, mi de kpo Jerusalẹm ra mrẹ Sifas,* mi de nene dia ẹdẹ 15.
19 Ẹkẹvuọvo, me mrẹ ọvuọvo vwẹ usun rẹ iyinkọn ri chekọ na-a, jokparẹ Jems oniọvo rẹ Ọrovwori na.
20 Asaọkiephana, vwọ kpahen erọnvwọn ri mi siẹ rhe ovwan na, Ọghẹnẹ oseri mẹ nẹ ọ dia efian mi guẹ-ẹn.
21 Ọyena vwọ wan nu, mi de kpo ubrakpọ ri Siria kugbe Silisha.
22 Ẹkẹvuọvo, ikoko rẹ Inenikristi rehẹ Judia vughe uvwe-e.
23 Ayen di nyo rẹ ihwo vwọ ta: “Asaọkiephana, ọshare ro mukpahen avwanre jovwo na ghwoghwo iyẹnrẹn esiri ro shekpahen esegbuyota rọ vwọso jovwo na.”
24 Ọtiọyena, kẹ ayen vwẹ urinrin kẹ Ọghẹnẹ fiki mẹ.
Eta rehẹ obotọ na
^ Yẹrẹ “oge.” Ni Eta re Vwomaphia.
^ Yẹrẹ “sioma nẹ.”
^ Yẹrẹ “vrẹka.”
^ Vwẹ Grik, “uvwo kugbe ọbara.”
^ Re ji se Pita.