Vwo Rhe Ihwo ri Galesha 2:1-21
2 Ẹgbukpe 14 vwọ wan nu, mẹ vẹ Banabas da rhoma rhivwin kpo Jerusalẹm, me je reyọ Taitọs nene oma.
2 Me rare fikirẹ ẹvwọphia ọvo, me da vuẹ ayen iyẹnrẹn esiri ri mi ghwoghwo vwẹ ohri rẹ ẹgborho na. Ẹkẹvuọvo, eshare re muọghọ kẹ mamọ na ọvo yen me vuẹre, rere mi vwo vwo imuẹro nẹ onẹ re me djẹ enẹna yẹrẹ ọ re me djẹre jovwo dia ofefe-e.
3 Dede nẹ Taitọs ro nene uvwe na ohwo ri Grik, jẹ ohwo vuọvo gbarọ nẹ ọ yanvwe-e.
4 Ẹkẹvuọvo, ota yena vwomaphia fikirẹ iniọvo rẹ efian re bẹbẹ ro ukoko na rhi ni avwanre, ayen bẹbẹ rhe guọnọ otọ rẹ ugbomọphẹ rẹ avwanre riavwerhen rọyen kerẹ idibo ri Kristi Jesu, rere ayen sa vwọ vwẹ avwanre vwo ru eviẹn karekare.
5 Avwanre rhọnvwe kẹ ayen kakaka-a, rere ovwan sa vwọ yọnrọn uyota rẹ iyẹnrẹn esiri na ọkieje.
6 Ẹkẹvuọvo, vwọ kpahen otu re họhọ ihwo re muọghọ kẹ na—oka rẹ ohwo rẹ ayen hepha jovwo fiemu vuọvo kẹ vwẹ-ẹ, kidie ọ dia oborẹ ohwo hepha vwẹ otafe yen Ọghẹnẹ nẹ-ẹ—eshare yena re muọghọ kẹ mamọ na yono uvwe orọnvwọn kpokpọ vuọvo-o.
7 Ukperẹ ọtiọyen, ayen vwọ mrẹ nẹ a vwẹ iruo re vwo ghwoghwo iyẹnrẹn esiri kẹ otu re yanvwere-e vwọ kẹ vwẹ, kirobo ra je vwẹ ọ rẹ otu re yanvwere vwọ kẹ Pita—
8 kidie ohwo rọ vwẹ ẹgba kẹ Pita nẹ ọ dia ọyinkọn vwọ kẹ otu re yanvwere yen je vwẹ ẹgba kẹ vwẹ nẹ me dia ọyinkọn vwọ kẹ ihwo rẹ ẹgborho na—
9 rẹ ayen je vwọ mrẹ ẹse re muwan rọye-en re dje kẹ vwẹ, Jems, Sifas* kugbe Jọn re dia ihwo re họhọ ichivwo, ayen da sa vwẹ vẹ Banabas obọ kerẹ oka ro djerephia nẹ avwanre eje wian kuẹgbe, rere avwanre se vwo bru ẹgborho na ra, ayen mi rhe bru ihwo re yanvwere ra.
10 Orọnvwọn ọvuọvo rẹ ayen vuẹ avwanre yen, avwanre karophiyọ igbere na, me je davwẹngba gangan vwo ru ọtiọyen.
11 Ẹkẹvuọvo, ọke rẹ Sifas* vwọ rhe Antiọk, me da ghwọkuo* kidie obo ro ruru shephiyọ-ọ.
12 Kidie tavwen eshare evo ki nẹ obo ri Jems rhe, ọ vẹ ihwo rẹ ẹgborho na riemu kuẹgbe; ẹkẹvuọvo ayen vwọ rhe nu, ọ da dobọji je hẹrioma nẹ ayen, kidie ọ djoshọ rẹ otu re yanvwere na.
13 Ihwo ri Ju ri chekọ ki ji nene ruẹ uruemu rẹ omeru nana, Banabas dede da je vwomaba ayen vwẹ omeru rayen na.
14 Ẹkẹvuọvo, me vwọ mrẹ nẹ ayen ruẹ nene uyota rẹ iyẹnrẹn esiri na-a, me da vuẹ Sifas* vwẹ irharo rẹ ayen eje nẹ: “Ọ da dianẹ wẹwẹ rọ dia ohwo ri Ju yerẹn kerẹ ihwo rẹ ẹgborho na, ọ dia kerẹ ihwo ri Ju-u, kẹ diesorọ wọ rha vwọ gba ihwo rẹ ẹgborho na nẹ ayen yerin nene ẹkuruemu rẹ ihwo ri Ju?”
15 Avwanre re dia ihwo ri Ju womarẹ uvwiẹ, re dia irumwemwu ri nẹ ẹgborho na rhe-e,
16 mrẹvughe nẹ ọ dia womarẹ iruo rẹ urhi yen e vwo se ohwo ọvwata-a, ẹkẹvuọvo womarẹ esegbuyota kpahen Jesu Kristi. Ọtiọyena, avwanre vwo esegbuyota kpahen Kristi Jesu rere e se vwo se avwanre evwata womarẹ esegbuyota kpahen Kristi, ọ dia womarẹ iruo rẹ urhi-i, kidie o vwo ohwo* vuọvo re che se ọvwata womarẹ iruo rẹ urhi-i.
17 Asaọkiephana ọ da je dianẹ e ni avwanre kerẹ irumwemwu rẹ avwanre vwọ guọnọ obo re se vwo se avwanre evwata womarẹ Kristi na, Kristi kẹ odibo rẹ umwemwu? Ẹjo kakaka!
18 Me da rhoma bọn erọnvwọn re me ghwọrọ totọ jovwo, ọyena odjephia nẹ mẹvwẹ ohwo rọ churhi.
19 Kidie me wan oma rẹ urhi na ghwu vwọ kẹ urhi, rere me sa vwọ dia vwọ kẹ Ọghẹnẹ.
20 A kanre ovwẹ vẹ Kristi mu urhe. Ọtiọyena, ọ rha dia omẹvwẹ yen yerẹ-ẹn, ẹkẹvuọvo Kristi yen yerẹn vwevunrẹ oma mẹ. Vwọrẹ uyota, mi yerẹn kerẹ ohworakpọ asaọkiephana womarẹ esegbuyota ri mi vwo kpahen Ọmọ rẹ Ọghẹnẹ ro vwo ẹguọnọ mẹ, rọ je vwẹ oma rọyen kpahotọ kẹ vwẹ.
21 Ẹse re muwan rọye-en rẹ Ọghẹnẹ dje kẹ vwẹ na, me senrọ-ọ,* kidie ọ da dianẹ womarẹ urhi yen ohwo cha vwọ dia ọvwata, kọyen ughwu ri Kristi fiemu-u.
Eta rehẹ obotọ na
^ Re ji se Pita.
^ Re ji se Pita.
^ Yẹrẹ “mi de hirharokuo.”
^ Re ji se Pita.
^ Vwẹ Grik, “uvwo.”
^ Yẹrẹ “mi chukokuo-o.”