Vwo Rhe Ihwo ri Galesha 3:1-29
3 E ovwan ihwo ri Galesha ri jẹ ọhọ evwo! Ono yen phiẹn ovwan, ovwan ra nabọ djisẹ ri Jesu Kristi kẹ phephẹn nẹ a kanrerọ mu urhe?
2 Onọ nana ọvo yen me guọnọ nọ ovwan: Womarẹ iruo rẹ urhi na yen ẹwẹn ọfuanfon na wan te ovwan obọ, gbanẹ fikirẹ esegbuyota rẹ ovwan vwo kpahen oborẹ ovwan nyori?
3 Ọtiọyen ovwan ghẹn te? Ovwan vwọ tonphiyọ, ovwan nenesi rẹ ẹwẹn rẹ Ọghẹnẹ, kẹ ovwan guọnọ vwẹ ekuakua rẹ akpọ na vwo kuophiyọ?
4 Ovwan rioja nana ejobi kufia? O muvwẹro nẹ ovwan rioja nana ejobi kufia-a.
5 Ọtiọyena, ohwo rọ kẹ ovwan ẹwẹn ọfuanfon na, ro ji ruiruo rẹ igbevwunu vwẹ ohri rẹ ovwan na, o ruo fikirẹ iruo rẹ urhi ru we ruẹ, gbanẹ fikirẹ esegbuyota rẹ ovwan vwo kpahen oborẹ ovwan nyori?
6 Kirobo rẹ Ebraham “vwo esegbuyota kpahen Jihova,* e de kere phiyọ ọvwata.”
7 Vwọrẹ uyota, ovwan riẹnre nẹ ihwo ri vwo esegbuyota yen emọ rẹ Ebraham.
8 Isiesi ọfuanfon na vwọ ta phiyotọ nẹ Ọghẹnẹ che se ihwo rẹ ẹgborho na evwata womarẹ esegbuyota, o de ghwoghwo iyẹnrẹn esiri na kẹ Ebraham phiyotọ nẹ: “Wan oma wẹn yen ẹgborho na ejobi che vwo vwo ebruphiyọ.”
9 Ọtiọyena, e ku ebruphiyọ ku ihwo ri vwo esegbuyota, kirobo re ji ku ebruphiyọ ku Ebraham ro vwo esegbuyota.
10 Ekan vwọ kẹ ihwo eje re vwẹroso iruo rẹ urhi na, kidie e siro nẹ: “Ekan kẹ ihwo eje re rhọnvwe ru erọnvwọn ejobi re si phiyọ ukpirhin ọbe rẹ Urhi na-a.”
11 Vwọba, o muẹro dẹn nẹ Ọghẹnẹ che se se ohwo vuọvo ọvwata womarẹ urhi-i, kidie “ọvwata cha rhọ womarẹ esegbuyota.”
12 E mu Urhi na kpahen esegbuyota-a. Ukperẹ ọtiọyen, “kohwo kohwo ro ru erọnvwọn nana cha wan oma rayen rhọ.”
13 Kristi dẹ avwanre reyọ, ro vwo si avwanre nẹ ekan rẹ Urhi na, ọ da rhe dia ohwo ra hanrhere ukperẹ avwanre, kidie e siro: “Ekan vwọ kẹ kohwo kohwo ra vwọ ya urhe.”
14 Ọnana phiare rere ebruphiyọ re ve kẹ Ebraham se vwo te ẹgborho na obọ womarẹ Kristi Jesu, ọtiọyena ke se vwo ẹwẹn ọfuanfon re veri na womarẹ esegbuyota rẹ avwanre.
15 Iniọvo, udje rẹ ihworakpọ yen me vwọ ta ota na: A da re ọphọ nu, ọ da tobọ dianẹ ohwo ọvo goi yen rerọ, o rhe vwo ohwo vuọvo rọ sa phan yẹrẹ phiba-a.
16 Asaọkiephana, e ve ive na kẹ Ebraham vẹ ọmọ* rọyen. Ọ dia ọ tare nẹ, “vẹ emọ* wẹn,” kerẹsiẹ ra da mrẹ nẹ e pha buebu-un. Ukperẹ ọtiọyen, ọ tare nẹ, “vẹ ọmọ* wẹn,” vwẹ ọhọ rẹ ohwo ọvo rọ dia Kristi.
17 Vwọba, me ta ọnana: Urhi na re jiri ẹgbukpe 430 vwọ wan nu, si ọphọ rẹ Ọghẹnẹ rere jovwo na no, ro de phioba phiyọ ive na-a.
18 Ọ da dianẹ e mu uku na kpahen urhi, kọyen ọ rha dia ive yen e muro kpahe-en; ẹkẹvuọvo Ọghẹnẹ vwiro ruẹse kẹ Ebraham womarẹ ive.
19 Kẹ diesorọ a vwọ vwẹ Urhi na mu? E vwiro mu rere o vwo dje urhiẹchọ phia bẹsiẹ ọmọ* re ve ive na kẹ vwọ rhe; Ọghẹnẹ da vwẹ Urhi na kẹ emekashe, ayen de ghwoghwo phia womarẹ usuọpha.
20 A guọnọ usuọpha siẹrẹ ohwo ọvo da re ọphọ-ọ, ọtiọyen ọ je hepha vwọ kẹ Ọghẹnẹ, ọyen ọvo yen ve ive na.
21 Urhi na vwọso ive rẹ Ọghẹnẹ? Ẹjo kakaka! Kidie ọ da dianẹ e jurhi ọvo rọ sa vwẹ arhọ kẹ ohwo, ke se kere avwanre phiyọ evwata siẹrẹ avwanre de nene urhi na.
22 Ẹkẹvuọvo Isiesi Ọfuanfon na phi erọnvwọn ejobi phiyọ otọ rẹ umwemwu, rere ebruphiyọ rẹ ive re mu kpahen esegbuyota na vwo te ihwo eje ri vwo esegbuyota kpahen Jesu Kristi obọ.
23 Ẹkẹvuọvo tavwen esegbuyota ke rhe, urhi na yen suẹn avwanre, avwanre da rhe dia otọ rẹ usuon rọyen, jẹ avwanre rhẹro rẹ esegbuyota re che djephia.
24 Ọtiọyena, Urhi na da rhe dia ọ ro suẹn avwanre* brẹ Kristi ra, rere e se vwo se avwanre evwata womarẹ esegbuyota.
25 Ẹkẹvuọvo esegbuyota vwọ rhire na, avwanre rha hẹ otọ rẹ ọ ro suẹn avwanre* na-a.
26 Vwọrẹ uyota, ovwan eje emọ rẹ Ọghẹnẹ womarẹ esegbuyota rẹ ovwan vwo kpahen Kristi Jesu.
27 Kidie ovwan eje ri bromaphiyame, re vẹ Kristi gba herọ asaọkiephana ku Kristi phiyọ re.
28 Owenẹ wọ dia ohwo ri Ju yẹrẹ Grik, ọviẹn yẹrẹ ọmuvwiẹ, ọshare yẹrẹ aye, ovwan ejobi ọvuọvo vwevunrẹ Kristi Jesu.
29 Vwọba, ovwan da dia i ri Kristi, ovwan ke ghene emọ* rẹ Ebraham, ovwan cha riuku rẹ ive na kirobo rẹ Ọghẹnẹ veri.
Eta rehẹ obotọ na
^ Ni Eta re Vwomaphia.
^ Vwẹ Grik, “ubi.”
^ Vwẹ Grik, “ibi.”
^ Vwẹ Grik, “ubi.”
^ Vwẹ Grik, “ubi.”
^ O mudiaphiyọ “ọrọvwẹrote yẹrẹ sẹro rẹ emọ.”
^ O mudiaphiyọ “ọrọvwẹrote yẹrẹ sẹro rẹ emọ.”
^ Vwẹ Grik, “ubi.”