Vwo Rhe Ihwo ri Galesha 5:1-26
5 Kristi si avwanre vwo nẹ ọviẹn vwọ rhe ugbomọphẹ yena. Ọtiọyena ovwan mudia gan, ovwan rha rhoma gba oma rẹ ovwan phiyọ otọ rẹ urhekpe rẹ ọviẹ-ẹn.
2 Nighere! Mẹvwẹ ri Pọl vuẹ ovwan nẹ ovwan da yanvwe, Kristi rhe che fiemu vuọvo kẹ ovwa-an.
3 Me rhoma vwanriẹn kẹ kohwo kohwo rọ yanvwere nẹ o vwo oghwa rọ vwọ yọnrọn Urhi na eje.
4 Ovwan hẹrioma vwo nẹ Kristi, ovwan re guọnọ dia evwata womarẹ urhi; ovwan nẹrhẹ ẹse rọyen re muwan rọye-en na va ovwan abọ.
5 Vwọ kẹ avwanre, avwanre hẹrhẹ womarẹ ẹwẹn na, ji rhẹro rẹ ọke rẹ avwanre cha vwọ dia evwata vwẹ ẹro rẹ Ọghẹnẹ womarẹ esegbuyota.
6 Kidie vwọ kẹ odibo ri Kristi Jesu, oyanvwe yẹrẹ jẹyanvwọ fiemu-u, ẹkẹvuọvo esegbuyota ro ruiruo womarẹ ẹguọnọ yen fiemu.
7 Ovwan riẹn djẹ jovwo. Kẹ ono rha da ovwan obọ ji rẹ ovwan vwo jẹ uyota na enene?
8 Ọ dia obọ rẹ ohwo ro se ovwan na yen oka rẹ oriẹriẹvwe nana nurhe-e.
9 Iphuephu* tutuno yen nẹrhẹ ọsoso egun rẹ ibrẹdi phuẹ.
10 Me vwẹroso ovwan re vẹ Ọrovwori na gba herọ, nẹ ovwan che vwo iroro rọ fẹnẹre-e; ẹkẹvuọvo ohwo rọ sua okpetu kẹ ovwan, o toro ohwo rọ hepha-a, cha mrẹ ẹdjọeguo ro foro.
11 Vwọ kẹ vwẹ iniọvo, ọ da dianẹ mi ji ghwoghwo oyanvwe, kẹ diesorọ e ji vwo muẹkpahan ovwẹ? Ọ da dia ọtiọyen, kọyen e si urhe rẹ oja* rọ sua ekprowọ na no re.
12 Mane kẹ eshare re guọnọ so oyanghan vwẹ ohri rẹ ovwan na sa ghware oma rayen.*
13 Iniọvo, e se ovwan vwọ rhe ugbomọphẹ; takpe nẹ ovwan reyọ ugbomọphẹ na kerẹ uphẹn rẹ ovwan vwọ reyọ vwọtua ojevwe rẹ ugboma-a, ẹkẹvuọvo e jẹ ẹguọnọ mu ovwan vwọ ga ohwohwo kerẹ eviẹn.
14 Kidie Urhi na eje rugba vwevunrẹ iji ọvuọvo, rọ tare nẹ: “Vwo ẹguọnọ rẹ ọrivẹ wẹn kirobo wo vwo ẹguọnọ rẹ oma wẹn.”
15 Ọ da dianẹ ovwan rhonvwa je sua ọmiaovwẹ kẹ ohwohwo, ovwan nomaso rere ovwan vwo jẹ ohwohwo ẹghwọrọ.
16 Ẹkẹvuọvo me tare nẹ, Ovwan rha yan nene odjekẹ rẹ ẹwẹn na, ovwan rhe che ru ojevwe rẹ ugboma ọvuọvo-o.
17 Kidie ojevwe rẹ ugboma na vwọsua ọ rẹ ẹwẹn na, ọtiọyen ọ rẹ ẹwẹn na je vwọsua ọ rẹ ugboma na; ayen ivẹ na vwọsua ohwohwo, ọtiọyena ovwan rhe se ruẹ oborẹ ovwan guọnọ ru-u.
18 Vwọba, ọ da dianẹ ẹwẹn na yen suẹn ovwan, kọyen ovwan rha hẹ otọ rẹ urhi-i.
19 Asaọkiephana iruo rẹ ugboma na nabọ teyenphia, eyen ọfanrhiẹn,* jẹfuọn, uruemu ra ghẹmrẹ,*
20 edjọẹgọ, e vwo nene emekashe rẹ Idẹbono ruẹ kuẹgbe,* eghrẹn, ẹghwọ, omaẹriọ, ophu ọgangan, jẹ ohwohwo enyo, ohẹriẹ, e vwo brẹ oma ẹkuẹko,
21 omaẹriọ ọgangan, idiẹda vroma, akpọẹriọ re de ruẹ obo ri je ohwo, kugbe erọnvwọn tiọyena. Mi siẹ ovwan orhọ kpahen erọnvwọn tiọyena kirobo ri mi ji si ovwan orhọ jovwo, nẹ ihwo ri ruẹ erọnvwọn tiọyena cha riuku rẹ Uvie rẹ Ọghẹnẹ-ẹ.
22 Ẹkẹvuọvo, omamọ rẹ ẹwẹn na yen ẹguọnọ, aghọghọ, ufuoma, edirin, uruemu esiri, uyoyovwin, esegbuyota,
23 dẹndẹn, omaẹriẹnsuon. Vwọ kpahen erọnvwọn tiọyena, o vwo urhi rọ vwọso aye-en.
24 Vwọba, otu re vẹ Kristi Jesu gba herọ kanre ugboma na kugbe urhurusivwe vẹ ojevwe rọyen mu urhe nure.
25 Avwanre da vwẹ uphẹn kẹ ẹwẹn rẹ Ọghẹnẹ nẹ o sun akpeyeren rẹ avwanre, e gbe jẹ a yan nene odjekẹ rẹ ẹwẹn na.
26 E jẹ avwanre kparoma-a, e nene ohwohwo vwanvwa oma-a, a rioma kpahen ohwohwo-o.
Eta rehẹ obotọ na
^ Yẹrẹ “iyisti.”
^ Ni Eta re Vwomaphia.
^ Yẹrẹ “hirhe oma phiyọ ichibẹ,” ọtiọyena ayen rhe che muwan rẹ ayen vwo ru nene urhi rẹ ayen titẹ na-a.
^ Vwẹ Grik, por·nei′a. Ni Eta re Vwomaphia.
^ Yẹrẹ “uruemu rẹ omavovwẹ kanre.” Vwẹ Grik, a·sel′gei·a. Ni Eta re Vwomaphia.
^ Yẹrẹ “imajiki; a vwọ reyọ ihuvwun vwo ruiruo.”