Vwo Rhe Ihwo ri Hibru 1:1-14
1 Vwẹ ọke grongron rọ wanre, Ọghẹnẹ ta ota kẹ esẹ rẹ avwanre ride womarẹ emraro na ọke buebun kugbe vwẹ idjerhe sansan.
2 Asaọkiephana vwẹ oba rẹ ẹdẹ nana, ọ ta ota kẹ avwanre womarẹ Ọmọ ọvo ro vwo mu ọriuku rẹ erọnvwọn ejobi, rọ je wan oma rọyen ma eyeren* na.
3 Ọyen odjephia rẹ urinrin rẹ Ọghẹnẹ kugbe uhoho rẹ obo rọ hepha dẹn, ọyen nẹrhẹ erọnvwọn ejobi dia womarẹ ota rẹ ẹgba rọyen. Ọke rọ vwọ hworhẹ avwanre fon nẹ imwemwu rẹ avwanre nu, o de chidia obọrhen rẹ Ọrọmarho na vwẹ obenu.
4 Ọtiọyena, o rhi yovwin vrẹ emekashe na, te ẹdia rọ vwọ riuku rẹ odẹ rọ rho vrẹ erayen.
5 Kerẹ udje, ọvọ vwẹ usun rẹ emekashe na yen Ọghẹnẹ ta eta nana kẹ dẹvure nẹ: “Wẹwẹ ọmọ mẹ; nonẹna me rhe dia ọsẹ wẹn re”? Obọfa: “Me cha dia ọsẹ rọyen, ọ me je dia ọmọ mẹ”?
6 Ẹkẹvuọvo, ọke rọ vwọ rhoma reyọ Ọmọkpako rọyen rhe otọrakpọ na, ọ da tanẹ: “E jẹ emekashe rẹ Ọghẹnẹ eje vwẹ uyovwin kpotọ kẹ.”
7 Vwọba, ọ ta kpahen emekashe na nẹ: “O ru emekashe rọyen phiyọ ihwo rẹ ẹwẹn, o de rhe ru idibo* rọyen phiyọ ogidi erhanre.”
8 Ẹkẹvuọvo vwọ kpahen Ọmọ na, ọ tare nẹ: “Ọghẹnẹ yen ekete wẹn rhirin bẹdi bẹdẹ, ọkpọ rẹ Uvie wẹn, ọyen ọkpọ rẹ ophiọnphiọn.*
9 Wo vwo ẹguọnọ rẹ ophiọnphiọn, wo de rhe vwo utuoma kpahen jurhi ẹyọnrọn. Kọyensorọ Ọghẹnẹ, Ọghẹnẹ wẹn vwọ vwẹ evwri rẹ aghọghọ vwọ jẹ wẹ reyọ vwọ vrẹ irivẹ wẹn.”
10 Ọ je tanẹ: “Vwẹ ọtonphiyọ, E Ọrovwori, ọyen wọ vwọ vwẹ uchivwo rẹ akpọ na vwo vi, idjuvwu na iruo rẹ obọ wẹn.
11 Ayen cha ghwọrọ kufia, ẹkẹvuọvo wọ cha dia; ayen cha ghwo kerẹ ewun,
12 wo che kpirhin ayen kerẹ ewun ogrongron, e che wene ayen kerẹ ewun. Ẹkẹvuọvo wo wene-e, ikpe wẹn ji che vwo oba-a.”
13 Ẹkẹvuọvo, ọvọ vwẹ usun rẹ emekashe na yen Ọghẹnẹ ta eta nana kẹ dẹvure nẹ: “Chidia obọrhen mẹ bẹsiẹ me vwọ vwẹ ivwighrẹn wẹn hwotọ kẹ wẹ chiyin”?
14 Ayen eje dia ihwo rẹ ẹwẹn ri ruiruo ọfuanfon* re jiri nẹ i re gbodibo vwọ kẹ ihwo ri che vwo usivwin?
Eta rehẹ obotọ na
^ Yẹrẹ “oge.” Ni Eta re Vwomaphia.
^ Yẹrẹ “idibo rẹ azagba.”
^ Yẹrẹ “orhiẹn ọsoso.”
^ Yẹrẹ “ruiruo rẹ azagba.”