Vwo Rhe Ihwo ri Hibru 11:1-40
11 Esegbuyota ọyen imuẹro kpahen obo re rhẹro rọyen, odjephia rẹ imuẹro kpahen erọnvwọn re herọ jẹ a mrẹ aye-en.
2 Kidie wan oma rọyen, ọyen e vwo soseri kpahen ihwo awanre* na.
3 Womarẹ esegbuyota yen avwanre vwọ riẹn nẹ a rhuẹrẹ eyeren* na phiyọ womarẹ ota rẹ Ọghẹnẹ, ọtiọyena obo ra mrẹ de nẹ evunrẹ erọnvwọn re jẹmrẹ rhe.
4 Womarẹ esegbuyota ọyen Ebẹl vwo ze izobo ro yovwin vrẹ ọ ri Ken kẹ Ọghẹnẹ, womarẹ esegbuyota yena yen e vwo soseri kpahọn nẹ ọvwata o ruẹ, kidie Ọghẹnẹ rhiabọreyọ okẹ rọyen,* dede nẹ o ghwuru, jẹ ọ je ta ota womarẹ esegbuyota rọyen.
5 Womarẹ esegbuyota ọyen e vwo mu Inọk yanran rere o vwo jẹ ughwu ẹmrẹ, a rha mrẹ vwẹ asan vuọvo-o kidie Ọghẹnẹ muro yanran; tavwen o ki muo yanran, e soseri kpahọn nẹ ọ nabọ ru obo ri je Ọghẹnẹ.
6 Vwọba, e rhe vwo esegbuyota-a, a cha sa nabọ ru obo ri je Ọghẹnẹ-ẹ, kidie kohwo kohwo ro brẹ Ọghẹnẹ ra ko vwo esegbuyota nẹ ọ herọ, nẹ ọyen hwosa vwọ kẹ ihwo re nabọ guọnọ.
7 Womarẹ esegbuyota ọyen Noa vwo dje oshọẹdjẹ rẹ Ọghẹnẹ phia ọke ra vwọ vwẹ orhọesio kẹ kpahen erọnvwọn ra je rhe mrẹ-ẹ, ọ da kare okọ vwọ kẹ esivwon rẹ evwruwevwin rọyen; womarẹ esegbuyota nana ọyen o vwo brorhiẹn hwe akpọ na, ọ da rhe dia ọriuku rẹ ophiọnphiọn ro nẹ esegbuyota cha.
8 Womarẹ esegbuyota ọyen Ebraham vwo nyẹme ọke re vwo se, o de kpo asan ra cha vwọ kẹ kerẹ uku; ọ yanran dede nẹ ọ riẹn asan rọ ra-a.
9 Womarẹ esegbuyota yen o vwo yerin kerẹ ọrhorha vwevunrẹ otọ rẹ ive na kerẹ ohwo rọhẹ otọ ọrhorha, ọ vẹ Aizik kugbe Jekọp da dia itughẹ, ihwo rọ vẹ ayen gba dia iriuku rẹ ive vuọvo na.
10 Kidie ọ hẹrhẹ orere ro vwo uvi rẹ ichivwo na, Ọghẹnẹ yen ohwo rọ rhuẹrerẹphiyọ* rọ je bọn.
11 Womarẹ esegbuyota ọyen a je vwọ kẹ Sera ẹgba rọ vwọ mrevun dede nẹ o bru afe nure, kidie o niro nẹ Ohwo ro ve ive na fuevun.*
12 Fikirẹ ọnana yen emọ vwo nẹ oma rẹ ọshare ọvo re niri nẹ o rhe che se vwiẹ emọ-ọ* rhe, emọ re pha buebun kerẹ isio rehẹ obodjuvwu na kugbe ekpẹn rehẹ orhoma rẹ abadi re che se keri-i.
13 Enana ejobi vwo esegbuyota re te ọke rẹ ayen vwo ghwu, dede nẹ ayen mrẹ orugba rẹ ive na-a; ẹkẹvuọvo ayen kparo mrẹ ayen vwẹ ugboko, ayen de rhiabọreyọ ayen ji ghwoghwo vwẹ azagba nẹ ayen erhorha kugbe ihwo re cha dia otọ na ọmọke krẹn.
14 Kidie ihwo re ta ota vwẹ idjerhe ọtiọyena nẹrhẹ ọ teyenphia nẹ ayen nabọ guọnọ asan robọ rayen.
15 Dedena, mane kẹ ayen roro kpahen asan rẹ ayen yan jovwo na ọkieje, ayen rhe vwo uphẹn rẹ ayen vwo rhivwin.
16 Ẹkẹvuọvo asaọkiephana, ayen davwẹngba rẹ ayen vwo vwo asan ro me yovwin, kọyen ọ rẹ obodjuvwu. Ọtiọyena, oma vua Ọghẹnẹ re vwo se Ọghẹnẹ raye-en, kidie o muegbe rẹ orere ọvo phiyotọ vwọ kẹ ayen.
17 Womarẹ esegbuyota ọyen ọ vwọ họhọ nẹ Ebraham vwẹ Aizik vwo ze izobo ọke ra vwọ davwọn ni—ohwo ro rhiabọreyọ ive na vẹ omavwerhovwẹn da jowọ rọ vwọ vwẹ ọmọ rọyen ọvuọvo na vwo ze izobo—
18 dede nẹ a vuẹrẹ jovwo nẹ: “Ọ re che se ọmọ* wẹn na, oma rẹ Aizik yen o che nurhe.”
19 Ẹkẹvuọvo ọ riẹnre nẹ Ọghẹnẹ sa kparọ vrẹn ọ da tobọ ghwu dede, o de ghini rhiabọreyọ vwo nẹ ughwu vwẹ idjerhe rẹ udje.
20 Womarẹ esegbuyota ọyen Aizik ji vwo bruba kẹ Jekọp vẹ Isọ vwọ kpahen erọnvwọn re cha.
21 Womarẹ esegbuyota ọyen Jekọp vwo bruba kẹ emọ ri Josẹf ọke rọ vwọ guọnọ ghwẹ re, ọ da ga Ọghẹnẹ* jẹ ọ ghwẹ oma kpahen enu rẹ ọkpọ rọyen.
22 Womarẹ esegbuyota ọyen Josẹf vwọ ta ota kpahen ọke rẹ ihwo rẹ Izrẹl che vwo nẹ Ijipt ọke rẹ ughwu rọyen vwo siẹkẹrẹ re, ọ da vwẹ odjekẹ* kẹ ayen kpahen ibeku* rọyen.
23 Womarẹ esegbuyota ọyen ọsẹ vẹ oni ri Mosis vwo sionu vwẹ emeranvwe erha ọke re vwo vwiẹ nu, kidie ayen mrẹrẹ nẹ ọmọ na vwo erhuvwu, ayen je djoshọ rẹ urhi rẹ ovie na-a.
24 Womarẹ esegbuyota ọyen Mosis vwọ sen nẹ e se ọyen ọmọ rẹ ọmọtẹ ri Fero-o, ọke rọ vwọ ghwanre nu,
25 ọ jẹ ojẹ rọ vẹ ihwo rẹ Ọghẹnẹ vwọ rioja ukperẹ ọ vwọ riavwerhen rẹ umwemwu ọmọke krẹn,
26 kidie o niro nẹ ekan ri Kristi na ọyen efe rọ rho vrẹ efe rẹ Ijipt, kidie o nẹ kiọkiọkiọ vwọ hẹrhẹ ẹhwa rẹ osa na.
27 Womarẹ esegbuyota ọyen o vwo vrẹn nẹ Ijipt, ẹkẹvuọvo ọ djoshọ rẹ ophu rẹ ovie na-a, kidie o mudia gan kokoroko ọkieje kerẹsiẹ ra da mrẹ nẹ ọ mrẹ Ọ re jẹmrẹ na.
28 Womarẹ esegbuyota ọyen o vwo ru Ọwanvrẹ na, o de ji mirin ọbara na, rere ọrọghwọrọ na vwo jẹ ọmọkpako rayen oma ẹwan.*
29 Womarẹ esegbuyota ọyen ayen vwọ wan Abadi Ọvwavware na vrẹ kerẹsiẹ ra da mrẹ nẹ otọ ọyaya, ẹkẹvuọvo ọke rẹ ihwo ri Ijipt na vwọ davwọn, ayen de divwin ghwu.
30 Womarẹ esegbuyota ọyen igbẹhẹ ri Jẹriko vwo she totọ ọke rẹ ihwo na vwọ yan riariẹ ẹdẹ ighwrẹn nu.
31 Womarẹ esegbuyota ọyen e vwo jẹ Rehab rọ dia igberadja na ẹghwọrọ vẹ ihwo ri jẹmienyo, kidie ọ rhiabọreyọ ihwo re jiri nẹ e ra bẹbẹ ni otọ na vwọrẹ ufuoma.
32 Kẹ die ọfa yen me cha ta? Kidie ọke che she vwe me da tanẹ me ta ota kpahen Gidiọn, Barak, Samsin, Jẹfta, Devid, ọtiọyen ji te Samuẹl kugbe emraro ri chekọ na.
33 Womarẹ esegbuyota ayen phi ivie kparobọ, vwẹ ophiọnphiọn vwo mu, e ve ive kẹ ayen, ayen rhurhu inu rẹ ikpohrokpo,
34 fun ẹgba rẹ erhanre, vabọ rẹ ọlọkọ, vwo nẹ ẹdia rẹ ovwiẹrẹ e ru ayen vwo vwo ogangan, ayen rhe dia ẹgba vwẹ ofovwin, ayen vwọtua unuofovwin rẹ ivwighrẹn rayen.
35 Eya dede ihwo rayen ri ghwuru womarẹ evrẹnushi, ẹkẹvuọvo e gboja kẹ eshare efa kidie ayen rhọnvwe rhiabọreyọ obọesiono womarẹ ọtanhirhe-e, rere ayen se vwo vwo evrẹnushi ro me yovwin na.
36 E, efa mrẹ ọdavwini rayen womarẹ ehwẹjẹ kugbe ẹfa, vwọrẹ uyota, vwọ vrẹ ọyena, womarẹ ejọnrọn kugbe uwodi.
37 E phi ayen, a davwen ayen ni, a vwẹ isara vwo bru ayen ibro ivẹ,* a vwẹ ọlọkọ vwo hwe ayen, ayen ku ephiẹn rẹ igegede kugbe e rẹ ẹvwe phiyọ, rẹ ayen vwọ hẹ ẹdia rẹ ọkanrovwẹ, ukpokpogho, kugbe ọke ra vwọ vwẹ oja re ayen;
38 ayen yovwin nọ vwọ kẹ akpọ na. Ayen ghorori vwẹ aton kugbe igbenu kugbe inu rẹ ikuta* kugbe inu rẹ akpọ na.
39 Dede nẹ e se omamọ oseri kpahen ihwo nana ejobi fikirẹ esegbuyota rayen, jẹ ayen mrẹ orugba rẹ ive na-a,
40 kidie Ọghẹnẹ kparo mrẹ orọnvwọn ro yovwin vrẹ ọyena rọ cha vwọ kẹ avwanre, rere e vwo jẹ ayen eruo gbagba tavwen e ki ru avwanre gba.
Eta rehẹ obotọ na
^ Yẹrẹ “kpahen esẹ avwanre ride.”
^ Yẹrẹ “oge.” Ni Eta re Vwomaphia.
^ Yẹrẹ “soseri kpahọn womarẹ okẹ rọyen rọ rhọnvwephiyọ.”
^ Yẹrẹ “ohwo ro si uhoho rọyen; ohwo ro si iplani rọyen.”
^ Yẹrẹ “a sa vwẹroso Ohwo ro ve ive na.”
^ Yẹrẹ “rọ họhọ ohwo ro ghwu nure.”
^ Vwẹ Grik, “ubi.”
^ Yẹrẹ “ọ da vwẹ uyovwin kpotọ kẹ Ọghẹnẹ.”
^ Yẹrẹ “iji.”
^ Yẹrẹ “esho.”
^ Vwẹ Grik, “obọ rẹ ọrọghwọrọ na vwo jẹ ọmọkpako rayen ete.”
^ Yẹrẹ “vwọ bẹrẹ ayen ẹbẹre ivẹ.”
^ Yẹrẹ “kugbe ẹmwa.”