Vwo Rhe Ihwo ri Hibru 12:1-29
12 Ọtiọyena, rọ vwọ dianẹ avwanre vwo evwru rẹ iseri buebun re riariẹ avwanre phiyọ na, e gbe jẹ avwanre do koghwa koghwa ọhọhọhọ kugbe umwemwu rọ fobọ jẹphiyọ avwanre awọ na kufia, rere a vwẹ erhiorin vwọ djonẹ rọhẹ obaro rẹ avwanre na,
2 rẹ avwanre vwọ tẹnrovi Jesu kiọkiọkiọ, Onotu kugbe Ọ ro ruẹ esegbuyota rẹ avwanre gba na. Fikirẹ aghọghọ rọhẹ obaro rọyen, o de chirakon rẹ urhe rẹ oja,* oma vo rọ-ọ, o chidia phiyọ obọrhen rẹ ekete rẹ Ọghẹnẹ re.
3 Ovwan nabọ roro kpahen ohwo ro chirakon rẹ erharhe rẹ eta tiọyena rẹ irumwemwu ta kpahọn vwọ sua omaẹwan kẹ oma rayen, rere oma vwo jẹ ovwan ẹrhọ, rẹ ofu de rhi dje ovwan.*
4 Vwevunrẹ ohọnre rẹ ovwan họnra vwọsua umwemwu na, ovwan je rhe họnre te ẹdia rẹ ọbara rẹ ovwan de hwẹ totọ-ọ.*
5 Uchebro ra vwọ kẹ ovwan kerẹ emọ na chọrọ ovwan ẹro karekare, ọ rọ tare nẹ: “Ọmọ mẹ, wọ vwẹ ẹro ri phovwin vwo nẹ ọghwọku ro nẹ obọ ri Jihova* rhe-e, wo jẹ ofu dje we ọke rọ da kpọ wẹ vi-i;
6 kidie ihwo ri Jihova* vwo ẹguọnọ rọyen, eyen ọ ghwọkuẹ, vwọrẹ uyota, kohwo kohwo rọ reyọre kerẹ ọmọ, ọyen ọ fa.”*
7 Ofori nẹ ovwan chirakon kerẹ ẹbẹre ọvo rẹ ọghwọku* rẹ ovwan. Ọghẹnẹ nene ovwan yerẹn kerẹ emọ. Kidie ọmọ vọ yen ọsẹ rọyen jẹ ghwọkuẹ?
8 Ẹkẹvuọvo, ọ da dianẹ ovwan ejobi je rhe ghare vwẹ ọghwọku nana-a, kọyen ovwan ghene emọ rẹ esen, ovwan dia emọ rọyen dẹ-ẹn.
9 Vwọba, esẹ* rẹ avwanre ghwọkuẹ avwanre, avwanre ji muọghọ kẹ ayen. O rhe fo avwanre vwọ nabọ vwẹ oma rẹ avwanre vwọ kpahotọ kẹ Ọsẹ rọ vwẹ ẹwẹn rọyen vwo suẹn akpeyeren rẹ avwanre rere e vwo arhọ?
10 Kidie ayen ghwọkuẹ avwanre vwẹ ọmọke vwo nene oborẹ ayen niri nẹ o shephiyọ, ẹkẹvuọvo o ruẹ ọtiọyen fikirẹ erere rẹ avwanre, rere avwanre sa vwọ ghare vwẹ ofuanfon rọyen.
11 Uyota, o vwo ọghwọku vuọvo rọ kẹ ohwo omavwerhovwẹn ọke ra da reyọ vwọ phia-a, ẹkẹvuọvo ọ miavwa ohwo;* jẹ ukuotọ rọyen, ọ mọ omamọ rẹ ufuoma kugbe ophiọnphiọn vwọ kẹ ihwo re vwiro yono.
12 Ọtiọyena, ovwan phi ẹgba phiyọ abọ re ghwrọrọ kpotọ kugbe igbon re ganre-e,
13 ovwan mi rhe ruẹ idjerhe ọphiọnphiọn kẹ awọ rẹ ovwan, rere ẹbẹre rọ vwiẹrẹre na vwo jẹ ẹdia eno, ukperẹ ọtiọyen e mi sivwon.
14 Ovwan davwẹngba rere ovwan vẹ ihwo ejobi vwo yerinkugbe vwọrẹ ufuoma, ovwan mi ji yeren akpọ rẹ ẹfuọn,* kidie ababọ rọyen, ohwo vuọvo cha sa mrẹ Ọrovwori na-a.
15 Ovwan nabọ nomaso rere ẹse rẹ Ọghẹnẹ re muwan rọye-en na vwo jẹ ohwo vuọvo ẹva abọ, rere owọ rẹ urhe ro vwo obi vwo jẹ djẹ phia rọ da so okpetu, ji gbe ihwo buebun ẹgua;
16 ovwan ji nomaso rere ohwo vuọvo vwẹ ohri rẹ ovwan vwo jẹ ọvwọfanrhiẹn* ẹdia yẹrẹ ohwo rọ vwẹ ẹro ri saka vwo nẹ erọnvwọn efuanfon, kerẹ Isọ rọ vwẹ udemu ọvo vwo wene ẹdia rọyen kerẹ ọmọkpako.
17 Kidie ovwan riẹnre nẹ vwẹ ukuko na rọ vwọ guọnọ riuku rẹ ebruphiyọ na, a rhọnvwe kẹ-ẹ; dede nẹ ọ viẹre rọ vwọ davwẹngba gangan ro vwo wene ẹwẹn,* o se ruo-o.*
18 Kidie ọ dia orọnvwọn re se djobọte re ji phi erhanre phiyọ ọyen ovwan sikẹre-e, ọ dia evwru ro muebri kugbe ebri hwi kugbe ogiribo-o,
19 ọ je dia edo rẹ owanre kugbe urhuru rọ ta eta rẹ ihwo na nyori, rẹ ayen da rẹ nẹ a rha ta ota ọfa kẹ aye-en.
20 Kidie oshọ mu ayen mamọ fikirẹ iji rọ tare nẹ: “Ọ da tobọ dianẹ eranvwe yen vwẹ oma te ugbenu na, e je phio hwe.”
21 Vwọba, oborẹ ayen mrẹre muoshọ te ẹdia rẹ Mosis da tanẹ: “Oshọ mu vwe, me phariẹ.”
22 Ẹkẹvuọvo ovwan sikẹrẹ Ugbenu ri Zayọn kugbe orere rẹ Ọghẹnẹ ro jeghwo na, Jerusalẹm rọhẹ obodjuvwu, kugbe uri mane uri* rẹ emekashe
23 rehẹ evunrẹ ọghwẹkoko,* kugbe ukoko rẹ ọmọkpako na re si edẹ rayen phiyọ obodjuvwu, kugbe Ọghẹnẹ rọ dia Oguẹdjọ rẹ ihwo eje, kugbe evwata ri yeren akpọ nene odjekẹ rẹ ẹwẹn na, re ji ru gbagba nure,
24 kugbe Jesu rọ dia usuọpha rẹ ọphọ kpokpọ na, kugbe ọbara ra fẹrẹnre na, rọ ta ota vwẹ idjerhe ro yovwin vrẹ ọbara rẹ Ebẹl.
25 Ovwan mrẹvughe nẹ ovwan vwẹ abọ fa erhọ kẹ* ohwo rọ ta ota na-a. Kidie ọ da dianẹ ihwo re rhọnvwe kerhọ rẹ ohwo rọ vwẹ orhọesio rẹ Ọghẹnẹ phia vwẹ otọrakpọ na sa djẹ vabọ-ọ, kẹ mavọ yen avwanre sa vwọ djẹ vabọ ọ da dianẹ avwanre chukoku ohwo rọ ta ota nẹ obodjuvwu cha na!
26 Vwẹ ọke yena, urhuru rọyen kpogho akpọ na, ẹkẹvuọvo asaọkiephana, o ve nure nẹ: “Me cha rhoma kpogho akpọ na obọfa, ọ dia akpọ na ọvo-o, ẹkẹvuọvo ji te odjuvwu na.”
27 Asaọkiephana ota na “obọfa” djerephia nẹ e che si erọnvwọn re kpoghori na no, erọnvwọn re ru nure, rere erọnvwọn re kpoghori-i na sa vwọ dia.
28 Ọtiọyena, rẹ avwanre vwọ mrẹ nẹ avwanre che rhiabọreyọ Uvie ọvo re che se kpogho-o na, e gbe jẹ avwanre rhe rhiabọreyọ ẹse re muwan rọye-en, rẹ avwanre sa wan oma rọyen vwọ vwẹ ẹga ọfuanfon rẹ Ọghẹnẹ che rhiabọreyọ vwọ kẹ, vẹ oshọẹdjẹ rẹ Ọghẹnẹ kugbe udidi.
29 Kidie Ọghẹnẹ rẹ avwanre erhanre rọ ghwọrọ erọnvwọn fiotọ.
Eta rehẹ obotọ na
^ Ni Eta re Vwomaphia.
^ Yẹrẹ “ofu de rhi dje erhi rẹ ovwan.” Ni Eta re Vwomaphia.
^ Yẹrẹ “te ẹdia rẹ ovwan de ghwu-u.”
^ Ni Eta re Vwomaphia.
^ Ni Eta re Vwomaphia.
^ Yẹrẹ “vwẹ oja ria.”
^ Yẹrẹ “uyono.”
^ Vwẹ Grik, “esẹ rẹ uvwo.”
^ Yẹrẹ “ọ nẹrhẹ e muomaphiyọ.”
^ Vwẹ Grik, “ovwan me je vwọtua ofuanfon.”
^ Ni Eta re Vwomaphia. “Ọfanrhiẹn.”
^ Kọyen, ẹwẹn rẹ ọsẹ rọyen.
^ Vwẹ Grik, “ọ mrẹ asan vwọ kẹ-ẹ.”
^ Yẹrẹ “uriorin ihwe buebun mane uriorin ihwe buebun.”
^ Yẹrẹ “ọghwẹgbe.”
^ Yẹrẹ “ovwan chukoku.”