Vwo Rhe Ihwo ri Hibru 13:1-25
13 Ovwan vwo ẹguọnọ rẹ ohwohwo ọkieje kerẹ iniọvo.
2 We jẹ erhorha ẹghọ* chọrọ ovwan ẹro-o, kidie wan oma rọyen ọyen ihwo evo vwọ ghọ emekashe jẹ ayen riẹnre-e.
3 Ovwan karophiyọ ihwo rehẹ evunrẹ uwodi* kerẹsiẹ ra da mrẹ nẹ ovwan vẹ ayen yen gba hẹ uwodi na, kugbe ihwo ra vwẹ oja ria, rọ vwọ dianẹ ovwan komobọ jehẹ evunrẹ ugboma na.*
4 E jẹ orọnvwe vwo ọghọ vwẹ ohri rẹ ihwo ejobi, e gbe ehwa rẹ orọnvwe na ẹgua-a, kidie Ọghẹnẹ cha vwẹ evwọfanrhiẹn* kugbe igberadja vwo guẹdjọ.
5 Ovwan kẹnoma kẹ ẹguọnọ rẹ igho vwẹ akpeyeren rẹ ovwan, we jẹ oborẹ ovwan vwori asaọkiephana te kẹ ovwan. Kidie ọ tarọ nure nẹ: “O vwo ọke vuọvo me cha vwọ yanjẹ uwe vwo-o, o vwo ọke vuọvo me cha vwọ kpairoro vrẹ wẹ-ẹ.”
6 Rere avwanre se vwo fiudugberi tanẹ: “Jihova* yen ọchuko mẹ; oshọ che mu vwe-e. Die yen ohworakpọ se ru vwe?”
7 Ovwan karophiyọ ihwo re kobaro vwẹ ohri rẹ ovwan, re ta ota rẹ Ọghẹnẹ kẹ ovwan, rẹ ovwan vwo roro kpahen oborẹ uruemu rayen hepha na, ovwan vwẹrokere esegbuyota rayen.
8 Oborẹ Jesu Kristi hepha odẹ rọ wanre na yen ọ je hepha nonẹna, ọtiọyen ọ je cha dia bẹdi bẹdẹ.
9 Ovwan je suẹn ovwan ghwrẹ womarẹ iyono sansan kugbe iyono erhorha-a, kidie o yovwirin rẹ ẹse re muwan rọye-en vwo ru ubiudu rẹ ovwan gan ukperẹ emuọre* ro fierere vuọvo vwọ kẹ ihwo re rerọ-ọ.
10 Avwanre vwo agbada ọvo rẹ ihwo re ga ẹga ọfuanfon vwevunrẹ utughẹ* na vwo uturhi rẹ ayen vwọ re vwọ-ọ.
11 Kidie a torhẹ ugboma rẹ eranvwe rẹ orherẹn rode na reyọ ọbara rayen rua asan ọfuanfon na, kerẹ izobo rẹ umwemwu vwẹ otafe rẹ asan rẹ ihwo na wonphiyọ.
12 Ọtiọyena, Jesu je rioja vwẹ otafe rẹ anurhoro rẹ orere na rere ọ sa vwọ vwẹ ọbara romobọ rọyen vwo ru ihwo na fon.
13 E gbe jẹ avwanre bro ra vwẹ otafe rẹ asan re wonphiyọ na, rere avwanre je ghwa oghwa rẹ ekan rọ ghware,
14 kidie avwanre vwo orere vwẹ etinẹ rọ cha dia rhirin rhiri-in, ẹkẹvuọvo avwanre nẹ kiọkiọkiọ hẹrhẹ ọ rọ cha na.
15 E gbe jẹ avwanre wan oma rọyen vwọ vwẹ izobo rẹ ujiri kẹ Ọghẹnẹ ọkieje, kọyen, omamọ rẹ ẹbẹrunu rẹ avwanre rẹ avwanre vwo ghwoghwo odẹ rọyen vwẹ azagba.
16 Vwọba, ovwan jẹ erhuvwu eruo chọrọ ovwan ẹro-o, ovwan ji nene ihwo efa ghare oborẹ ovwan vwori, kidie oka rẹ izobo ọtiọyena nabọ je Ọghẹnẹ.
17 Ovwan nyẹme rẹ ihwo* re kobaro vwẹ ohri rẹ ovwan, ovwan je vwomakpotọ kẹ ayen, kidie ayen yen vwẹrote ovwan* ọkieje kerẹ ihwo re cha niyẹnrẹn, rere ayen se vwo ru ọnana vẹ aghọghọ, ọ dia ọ rẹ unuẹfiọ-ọn kidie ọnana cha so omaẹwan kẹ ovwan.
18 Ovwan rha nẹrhovwo kẹ avwanre kidie avwanre vwo imuẹro nẹ avwanre vwo ẹwẹn obrorhiẹn rọ fonro,* kidie avwanre guọnọ dia ihwo rẹ uyota vwẹ erọnvwọn eje.
19 Ẹkẹvuọvo me rẹ ovwan gangan nẹ ovwan nẹrhovwo rere mi se vwo bru ovwan rhe kẹrẹkpẹ.
20 Asaọkiephana e jẹ Ọghẹnẹ rẹ ufuoma rọ kpare Ọrovwavwanre Jesu rọ dia osuigodẹ rode na vrẹn nẹ ughwu vẹ ọbara rẹ ọphọ ri bẹdi bẹdẹ na,
21 vwẹ erọnvwọn iyoyovwin eje vwọ kẹ ovwan, we se vwo ru ọhọre rọyen, je womarẹ Jesu Kristi mu ovwan vwo ru obo ri je, e jẹ a vwẹ urinrin kẹ rhirin bẹdi bẹdẹ. Isẹ.
22 Asaọkiephana iniọvo, me rẹ ovwan nẹ ovwan nabọ kerhọ rẹ ota rẹ uchebro nana, kidie ọmọbe yen mi si rhe ovwan na.
23 Me guọnọ nẹ ovwan riẹn nẹ e siobọnu oniọvo rẹ avwanre Timoti re. Ọ da fobọ rhe, me vẹ ọyen yen gba cha rhe rhe mrẹ ovwan.
24 Ovwan vwẹ uyeren mẹ vwọ kẹ ihwo eje re kobaro vwẹ ohri rẹ ovwan kugbe ihwo efuanfon na ejobi. Ihwo rehẹ Itali vwẹ uyeren rayen vwo rhe ovwan.
25 E jẹ ẹse re muwan rọye-en na nene ovwan ejobi dia.
Eta rehẹ obotọ na
^ Yẹrẹ “uruemu esiri re dje vwọ kẹ erhorha.”
^ Vwẹ Grik, “ihwo ra kanre; ihwo rehẹ ekanrọ.”
^ Yẹrẹ ọ sa dia, “kerẹsiẹ ra da mrẹ nẹ ovwan vẹ ayen yen gba rioja.”
^ Ni Eta re Vwomaphia. “Ọfanrhiẹn.”
^ Ni Eta re Vwomaphia.
^ Kọyen, urhi ro shekpahen emuọre.
^ Yẹrẹ “itabanako.”
^ Yẹrẹ “muọghọ kẹ ihwo.”
^ Yẹrẹ “erhi rẹ ovwan.” Ni Eta re Vwomaphia.
^ Vwẹ Grik, “omamọ rẹ ẹwẹn obrorhiẹn.” Yẹrẹ “ẹwẹn obrorhiẹn rẹ uyota.”