Vwo Rhe Ihwo ri Hibru 2:1-18
2 Kọyensorọ o vwo fo nẹ avwanre kerhọ vrẹ obo ri jovwo vwọ kẹ erọnvwọn rẹ avwanre nyori, rere avwanre vwo je bo ghwrẹ.
2 Kidie ọ da dianẹ ota ra tare womarẹ emekashe muẹro, a da je vwẹ oja re kohwo kohwo rọ churhi kugbe kohwo kohwo ro jẹmienyo vwo nene orhiẹn ọsoso,
3 kẹ mavọ yen avwanre sa vwọ vabọ ọ da dianẹ avwanre chukoku usivwin rode tiọyena? Kidie Ọrovwavwanre yen ka ta ota kpahọn, otu ri nyoro ji soseri kpahọn kẹ avwanre,
4 Ọghẹnẹ je vwomaba ayen vwo soseri vẹ eka kugbe igbunu kugbe iruo rẹ igbevwunu sansan kugbe ẹwẹn ọfuanfon na, rọ ghare vwo nene ọhọre rọyen.
5 Kidie ọ dia emekashe yen ọ vwẹ akpọ rọ cha na rẹ avwanre ta ota kpahan na kẹ nẹ i suo-on.
6 Ẹkẹvuọvo vwẹ asan ọvo, oseri ọvo tare nẹ: “Die yen ohworakpọ ru wọ vwọ karophiyọ, yẹrẹ die yen ọmọ rẹ ohwo ru wọ vwọ vwẹrote?
7 Wo vwiro kpotọ emerha nọ emekashe, wọ vwẹ erhu rẹ urinrin vẹ ọghọ vwo tughẹ, wo de vwo mu vwẹ enu rẹ iruo rẹ obọ wẹn.
8 Wo phi erọnvwọn eje phiyọ obotọ rẹ awọ rọyen.” Kidie nẹ Ọghẹnẹ phi erọnvwọn eje phiyọ obotọ rọyen, o rhe vwo orọnvwọn vuọvo ro jẹ obotọ rọyen ẹdia-a. Dedena, asaọkiephana, avwanre je rhe mrẹ erọnvwọn eje vwẹ obotọ rọye-en.
9 Ẹkẹvuọvo avwanre mrẹ Jesu re vwo kpotọ emerha nọ emekashe, ra vwẹ erhu rẹ urinrin vẹ ọghọ vwo tughẹ asaọkiephana, kidie ọ rioja te ẹdia rẹ ughwu, rere womarẹ ẹse rẹ Ọghẹnẹ re muwan rọye-en na, ọ sa vwọ davwen ughwu vwọ kẹ ihwo ejobi.
10 Ohwo rọ nẹrhẹ erọnvwọn ejobi dia, rẹ erọnvwọn ejobi je herọ vwọ kẹ na, reyọ emọ buebun vwo kpo urinrin. Ọtiọyena ọyen obo ri fori rọ vwọ nẹrhẹ Onotu rẹ ayen cha wan oma rọyen vwo usivwin na dia gbagba womarẹ ojaẹriọ.
11 Kidie asan ọvuọvo yen ọ ro ruẹ ihwo fuan kugbe ihwo ro ruẹ fuan na nurhe, ọtiọyena oma rha vuọ ro vwo se ayen iniọvo-o,
12 kirobo rọ tare: “Mi che ghwoghwo odẹ wẹn kẹ iniọvo mẹ; me cha so une vwo jiri uwe vwẹ ohri rẹ ukoko na.”
13 Obọfa ọ je ta: “Me cha vwẹrosuọ.” Ọ je rhoma ta: “Nighere! Mẹ vẹ imitete na ri Jihova* vwọ kẹ vwẹ.”
14 Ọtiọyena, rọ vwọ dianẹ “imitete” na vwo ọbara vẹ uvwo na, ọ da je rhe dia kerẹ ayen, rere ọ sa vwọ womarẹ ughwu rọyen ru ọ rọ sa sua ughwu na phiyọ ofefe, kọyen Idẹbono,
15 ọ je sa vwọ nẹrhẹ ihwo eje rehẹ ẹdia rẹ ọviẹn vwẹ akpeyeren rayen eje fikirẹ oshọ rẹ ughwu vwo ugbomọphẹ.*
16 Kidie ọ dia emekashe yen ọ vwẹ ukẹcha kẹ-ẹ, ẹkẹvuọvo ọmọ* rẹ Ebraham yen ọ vwẹ ukẹcha kẹ.
17 Ọtiọyena, ọ rhe dia kerẹ “iniọvo” rọyen vwẹ kidjerhe kidjerhe, rere ọ sa vwọ dia orherẹn rode ro vwo arodọnvwẹ, rọ je fuevun vwẹ erọnvwọn ri shekpahen Ọghẹnẹ, rere o se vwo ze izobo rẹ arhuẹrẹ* fikirẹ imwemwu rẹ ihwo na.
18 Rọ vwọ dianẹ ọyen komobọ rioja ọke ra vwọ davwọn ni na, kọ sa vwẹ ukẹcha kẹ ihwo ra davwan nẹ.
Eta rehẹ obotọ na
^ Ni Eta re Vwomaphia.
^ Yẹrẹ “ughwu dia emuvwiẹ.”
^ Vwẹ Grik, “ubi.”
^ Yẹrẹ “izobo ra vwọ tan ohwo; izobo re vwo fuẹn ophu.”