Vwo Rhe Ihwo ri Hibru 3:1-19
3 Ọtiọyena, iniọvo efuanfon ri vwo use* rẹ obodjuvwu na, ovwan roro kpahen ọyinkọn kugbe orherẹn rode rẹ avwanre rhiabọreyọ na—Jesu.
2 Ọ fuevun kẹ Ohwo ro vwiro mu, kirobo rẹ Mosis je fuevun vwevunrẹ uwevwin rẹ Ohwo yena ejobi.
3 Kidie e niro nẹ o* fo urinrin rọ vrẹ ọ ri Mosis, rọ vwọ dianẹ ohwo rọ bọn uwevwin vwo ọghọ nọ uwevwin na komobọ.
4 Vwọrẹ uyota, kuwevwin kuwevwin ohwo yen bọnrọ, ẹkẹvuọvo Ọghẹnẹ yen ma erọnvwọn ejobi.
5 Asaọkiephana Mosis fuevun kerẹ ọrọvwẹrote vwevunrẹ uwevwin rẹ Ohwo yena ejobi, kerẹ oseri rẹ erọnvwọn ra cha ta ota kpahen vwẹ obaro obọ,
6 ẹkẹvuọvo Kristi fuevun kerẹ ọmọ vwẹ enu rẹ uwevwin rẹ Ọghẹnẹ. Avwanre uwevwin rọyen, ọ da dianẹ avwanre yọnrọn ugbomọphẹ rẹ ota kugbe iphiẹrophiyọ rẹ avwanre vwọ yan eyan na kokoroko re toba.
7 Ọtiọyena, kirobo rẹ ẹwẹn ọfuanfon na tare, “Nonẹna ovwan de nyupho rọyen,
8 ovwan ruẹ ubiudu rẹ ovwan gangan kerẹ ọke rẹ ayen vwọ nẹrhẹ ophu ọgangan mu vwe-e, kerẹ ẹdẹ rẹ ayen vwọ davwen ovwẹ ni vwevunrẹ ato-on,
9 asan rẹ esẹ rẹ ovwan ride da davwen ovwẹ ni, dede nẹ ayen mrẹ iruo mẹ vwẹ ẹgbukpe 40.
10 Kọyensorọ ivun vwo miovwo uvwe gangan kpahen uvwiẹ nana, re me vwọ tanẹ: ‘Ọkieje yen ayen vwo bo ghwrẹ vwẹ ubiudu rayen, ayen je rhe riẹn idjerhe mẹ-ẹ.’
11 Ọtiọyena mi de duvwun iyorin vwevunrẹ ophu mẹ nẹ: ‘Ayen cha ro evunrẹ omaerovwon mẹ-ẹ.’”
12 We nomaso iniọvo, rere ohwo vuọvo vwẹ usun rẹ ovwan na vwo jẹ ubiudu umwemwu ro vwo esegbuyota-a evwo, womarẹ o vwo sioma reyọ nẹ Ọghẹnẹ ro jeghwo na;
13 ẹkẹvuọvo ovwan rhe phiuduphiyọ ohwohwo awọ kẹdi kẹdẹ, takpe nẹ e sere “Nonẹna,” rere ẹgba rẹ ophiẹnvwe rẹ umwemwu vwo jẹ ubiudu rẹ ohwo vuọvo vwẹ usun rẹ ovwan eruo gan.
14 Kidie avwanre se ghini vwo ẹkẹn vwẹ Kristi na* ọ da dianẹ avwanre sẹro rẹ ẹroẹvwọsuọ rẹ avwanre vwori vwẹ ọtonphiyọ kokoroko re duvwun oba.
15 Kirobo ra tarọ nẹ, “Nonẹna ovwan de nyupho rọyen, ovwan ruẹ ubiudu rẹ ovwan gangan kerẹ ọke rẹ ayen vwọ nẹrhẹ ophu ọgangan mu vwe-e.”
16 Amono yen nyori rẹ ayen da je nẹrhẹ ophu ọgangan muo ghene? Ọ dia ihwo ejobi ri Mosis sun nẹ Ijipt?
17 Vwọba, amono yen ivun rayen miovwo Ọghẹnẹ vwẹ ẹgbukpe 40? Ọ dia ihwo ri ru umwemwu ri ji ghwu vwevunrẹ aton na?
18 Kẹ amono yen o duvwun iyorin kẹ nẹ ayen cha ro evunrẹ omaerovwon rọye-en? Ọ dia ihwo ri jẹmienyo na?
19 Ọtiọyena, avwanre mrẹre nẹ ayen sa ruọ-ọ kidie ayen vwo esegbuyota-a.