Vwo Rhe Ihwo ri Hibru 4:1-16
4 Ọtiọyena, rọ vwọ dianẹ ive ra vwọ ro evunrẹ omaerovwon rọyen je herọ na, e gbe jẹ avwanre nomaso* rere ive na vwo jẹ ohwo vuọvo vwẹ usun rẹ ovwan na ẹva abọ.
2 Kidie e ji ghwoghwo iyẹnrẹn esiri na kẹ avwanre kirobo re ghwoghwiro kẹ ayen; ẹkẹvuọvo ota rẹ ayen nyori na fierere kẹ aye-en, kidie ayen vwo oka rẹ esegbuyota rẹ ihwo re kerhọ vwori-i.
3 Kidie avwanre ri vwo esegbuyota ro omaerovwon rọyen kirobo rọ tare: “Ọtiọyena mi de duvwun iyorin vwevunrẹ ophu mẹ nẹ, ‘Ayen cha ro evunrẹ omaerovwon mẹ-ẹ,’” dede nẹ iruo rọyen kuphiyọ vwo nẹ ọke rẹ akpọ na vwọ tonphiyọ.
4 Kidie ọ ta kpahen ẹdẹ righwrẹn na vwẹ asan ọvo nẹ: “Ọghẹnẹ de rovwoma vwo nẹ iruo rọyen eje vwẹ ẹdẹ righwrẹn na,”
5 ọ da rhoma ta vwẹ etinẹ na nẹ: “Ayen cha ro evunrẹ omaerovwon mẹ-ẹ.”
6 Ọtiọyena rọ vwọ dianẹ uphẹn je herọ vwọ kẹ ihwo rẹ ayen vwọ ro evun rọyen, jẹ ihwo re ke ghwoghwo iyẹnrẹn esiri na kẹ ro evun rọye-en fikirẹ jẹmienyo na,
7 ọ da rhoma jokaphiyọ ẹdẹ ọvo, rọ vwọ ta vwevunrẹ une rẹ ejiro ri Devid ọke grongron vwọ wan nu nẹ, “Nonẹna”; kirobo ra tarọ jovwo, “Nonẹna ovwan de nyupho rọyen, ovwan ruẹ ubiudu rẹ ovwan ganga-an.”
8 Kidie ọ da dianẹ Joshua sun ayen ro asan rẹ omaerovwon jovwo, Ọghẹnẹ rha ta ota kpahen ẹdẹ ọfa ọke vwọ yan obaro-o.
9 Ọtiọyena ẹdẹ urovwoma ọvo je herọ vwọ kẹ ihwo rẹ Ọghẹnẹ.
10 Kidie ohwo rọ ro evunrẹ omaerovwon rẹ Ọghẹnẹ nu, ji rovwoma vwo nẹ iruo rẹ obọ rọyen, kirobo rẹ Ọghẹnẹ ji rovwoma nẹ ọrọyen.
11 E gbe jẹ avwanre davwẹngba rẹ avwanre eje a sa vwọ ro omaerovwon yena, rere ohwo vuọvo vwo jẹ uruemu ri jẹmienyo vuọvo na e sherua.
12 Kidie ota rẹ Ọghẹnẹ herọ yerẹn, ọ je vọn vẹ ẹgba, ọ dan vrẹ ọlọkọ ro vwo akon ivẹ. O duvwẹn rua oma ọ me ghare erhi* vẹ ẹwẹn,* kugbe ibeku vẹ otu, ọ sa riẹn iroro vẹ obo rehẹ evunrẹ ubiudu na.
13 O vwo emama vuọvo ro siomanu kẹ-ẹ, ẹkẹvuọvo erọnvwọn ejobi banphiyọ, i rhiephiyọ ghwroro vwẹ obaro rẹ ohwo rẹ avwanre cha niyẹnrẹn kẹ.
14 Ọtiọyena, rọ vwọ dianẹ avwanre vwo orherẹn rode, Jesu rọ dia Ọmọ rẹ Ọghẹnẹ rọ ro evunrẹ idjuvwu na, e gbe jẹ avwanre rhe ghwoghwo esegbuyota rẹ avwanre vwo kpahọn vwẹ azagba.
15 Kidie ọ dia orherẹn rode ro jẹ ẹruọ rẹ ovwiẹrẹ rẹ avwanre evwo yen avwanre vwori-i, ẹkẹvuọvo avwanre vwo ọ ra davwen ni vwẹ kidjerhe kidjerhe kerẹ avwanre, jẹ o ru umwemwu-u.
16 E gbe jẹ avwanre sikẹrẹ ekete rẹ ẹse re muwan rọye-en na vẹ ugbomọphẹ rẹ ota, rere avwanre sa vwọ mrẹ arodọnvwẹ vẹ ẹse re muwan rọye-en rọ cha cha avwanre uko vwẹ ọke ro fori.