Vwo Rhe Ihwo ri Hibru 6:1-20
6 Ọtiọyena rọ vwọ dianẹ avwanre yerin vrẹ uyono rẹsosuọ ro shekpahen Kristi re na, e gbe jẹ avwanre pharhe rere a rho tedje, a rha rhoma tọn uchivwo-o, kọyen okurhẹriẹ vwo nẹ iruo ifefe kugbe esegbuyota kpahen Ọghẹnẹ,
2 uyono ro shekpahen omaebrophiyame kugbe ra vwọ ghwabọ kpahen uyovwin rẹ ihwo, evrẹnushi rẹ ihwo ri ghwuru kugbe ẹdjọeguo ri bẹdẹ.
3 Avwanre che ru ọnana siẹrẹ Ọghẹnẹ da rhọnvwe.
4 Vwọ kpahen ihwo re ke yono jovwo re, re davwen ẹserọphẹ rẹ obodjuvwu na re, ra vwẹ ẹwẹn ọfuanfon kẹ
5 re je davwen omamọ rẹ ota rẹ Ọghẹnẹ kugbe ogangan* rẹ eyeren* rọ cha na
6 ẹkẹvuọvo ri sheri, a rha cha sa cha ayen uko vwo kurhẹriẹ-ẹ, kidie ayen komobọ rhoma kanre* Ọmọ rẹ Ọghẹnẹ mu urhe, ayen da phọphọ vwẹ azagba.
7 Kidie otọ na mrẹ ebruphiyọ ro nẹ obọ rẹ Ọghẹnẹ cha ọke rọ da da ame osio rọ rhọ kuo kọke kọke, ọ me nẹrhẹ ekankọn djẹ phia, ro che fierere vwọ kẹ ihwo ra vwẹ fiki rayen vwọ kọn.
8 Ẹkẹvuọvo ọ da dianẹ idjigbẹn vẹ ekpia yen djẹre vwọ, a cha kpairoro vrẹ, o rhe che kri-i ke che duvwun iyorin kẹ, ukuotọ rọyen a me torhẹ.
9 Ẹkẹvuọvo vwọ kẹ ovwan, iniọvo eghanghanre, avwanre vwo imuẹro rẹ erọnvwọn ri yovwirin, erọnvwọn ri shekpahen usivwin, dede nẹ avwanre ta ota vwẹ idjerhe nana.
10 Kidie Ọghẹnẹ dia ohwo ro jẹ ọvwata ẹdia ro de jẹ iruo rẹ ovwan kugbe ẹguọnọ rẹ ovwan dje kẹ odẹ rọyen ẹkarophiyọ-ọ, rẹ ovwan vwo gbodibo kẹ ihwo efuanfon na, rẹ ovwan ji vwo ruẹ ọtiọyen te ọke na.
11 Ẹkẹvuọvo avwanre guọnọre nẹ ovwan ohwo ọvuọvo je wian gangan ọtiọyen, ovwan se vwo vwo imuẹro rẹ iphiẹrophiyọ na vọnvọn re duvwun oba,
12 rere ovwan vwo jẹ evwiẹrẹ ẹdia, ẹkẹvuọvo ovwan me dia e re vwẹrokere ihwo re womarẹ esegbuyota vẹ edirin riuku rẹ ive na.
13 Kidie ọke rẹ Ọghẹnẹ vwo ve ive rọyen kẹ Ebraham, rọ vwọ dianẹ o vwo ohwo ọfa rọ rho nọ-ọ na, ọ da vwẹ oma rọyen duvwun iyorin,
14 rọ vwọ tanẹ: “Vwọrẹ imuẹro, mi che bruba kẹ wẹ, mi ji che ru we bun.”
15 Ọtiọyena Ebraham vwo vwo edirin nu, ive nana de te obọ.
16 Kidie ihworakpọ vwẹ ohwo rọ rho nọ ayen vwo duvwun iyorin, iyorin eduvwon rayen yen phioba phiyọ ẹghwọ ejobi, kidie vwọ kẹ ayen, ọyen imuẹro rẹ urhi rhọnvwephiyọ.
17 Vwẹ idjerhe vuọvo na, ọke rẹ Ọghẹnẹ vwo brorhiẹn nẹ ọyen cha nabọ dje ọhọre* rọyen ro je wene na phia phephẹn kẹ ihwo re cha riuku rẹ ive na, ọ da vwẹ imuẹro kẹ ayen* womarẹ iyorin eduvwon,
18 rere womarẹ erọnvwọn ivẹ ri wene-e, rẹ Ọghẹnẹ de che se jẹ efian eguo na, avwanre re djẹ ro asan rẹ adjarhọ na se vwo vwo uduephiophiyawọ ọgangan ra vwọ yọnrọn iphiẹrophiyọ re phi phiyọ obaro rẹ avwanre na kokoroko.
19 Avwanre vwo iphiẹrophiyọ nana kerẹ ọtan vwọ kẹ erhi na,* o muẹro je ghwotọ, ọ je ro evunrẹ ikọtini ra vwọ hẹriẹ evunrẹ uwevwin rẹ ẹga na,
20 asan rẹ ọkobaro ọvo roro fikirẹ avwanre, Jesu rọ rhe dia orherẹn rode bẹdi bẹdẹ kerẹ Mẹlkizẹdẹk.
Eta rehẹ obotọ na
^ Yẹrẹ “ebruphiyọ.”
^ Yẹrẹ “oge.” Ni Eta re Vwomaphia.
^ Yẹrẹ “hwe.”
^ Yẹrẹ “uchebro.”
^ Yẹrẹ “ọ da jowọ.”
^ Yẹrẹ “vwọ kẹ arhọ rẹ avwanre.” Ni Eta re Vwomaphia.