Vwo Rhe Ihwo ri Hibru 7:1-28
7 Kidie Mẹlkizẹdẹk nana, ovie ri Salẹm, orherẹn rẹ Ọghẹnẹ ro Me Kpenu na, vwa Ebraham ọke ro vwo rhivwin cha nẹ ohọnre ro de phi ivie na kparobọ, o de bruba kẹ,
2 Ebraham da vwẹ* ẹkẹn ọvo rẹ ẹkẹn ihwe rẹ erọnvwọn ejobi kẹ. Ẹsosuọ, odẹ rọyen mudiaphiyọ “Ovie rẹ Ophiọnphiọn,” e ki ji se ovie ri Salẹm, kọyen “Ovie rẹ Ufuoma.”
3 Rọ vwọ dianẹ o vwo ọsẹ-ẹ, o vwo oni-i, o vwo uvwiẹ-ẹ, o vwo ọtonphiyọ rẹ ẹdẹ yẹrẹ oba rẹ akpeyere-en, ẹkẹvuọvo e ruro vwọ họhọ Ọmọ rẹ Ọghẹnẹ na, ọ da dia orherẹn vwẹ ọke ejobi.*
4 Ni oborẹ ọshare nana rho te, ohwo rẹ Ebraham rọ dia ọgbuyovwin rẹ orua na vwẹ ẹkẹn ọvo rẹ ẹkẹn ihwe rẹ erọnvwọn ri me yovwin rọ ghwẹ nẹ ohọnre na rhe kẹ.
5 Uyota, vwo nene Urhi na, a vwẹ iji kẹ emọ ri Livae ra vwẹ ẹdia rẹ orherẹn kẹ nẹ ayen reyọ ẹkẹn ọvo rẹ ẹkẹn ihwe mie ihwo na, kọyen vwo mie iniọvo rayen, dede nẹ enana emọ rẹ Ebraham.*
6 Ẹkẹvuọvo ọshare nana ro nẹ uvwiẹ rayen rhe-e na, reyọ ẹkẹn ọvo rẹ ẹkẹn ihwe mie Ebraham, o de bruba kẹ ohwo re ve ive na kẹ.
7 Asaọkiephana, aphro herọ-ọ nẹ, ọ rọ rhoro yen brẹba kẹ ọ rọ hanvwere.
8 Vwẹ ẹdia ọvo, ihwo ri ghwẹ yen reyọ ẹkẹn ọvo rẹ ẹkẹn ihwe, ẹkẹvuọvo vwẹ ẹdia ọfa, kẹ ohwo re soseri kpahen nẹ o yerẹn.
9 A je sa tanẹ Livae rọ reyọ ẹkẹn ọvo rẹ ẹkẹn ihwe dede, je hwa ẹkẹn ọvo rẹ ẹkẹn ihwe womarẹ Ebraham,
10 kidie ọyen jẹ ọmọ rẹ ọsẹ rọyen rode ji rhi vwiẹ-ẹ* ọke rẹ Mẹlkizẹdẹk vwọ vwa.
11 Ọ da dianẹ a sa dia gbagba womarẹ ẹko rẹ irherẹn ri Livae na (kidie ọyen ẹbẹre ọvo rẹ Urhi ra vwọ kẹ ihwo na jovwo), kẹ diesorọ a vwọ rhoma guọnọ orherẹn ọfa ra tare nẹ ọ pha kerẹ Mẹlkizẹdẹk, ọ dia ọ rọ pha kerẹ Erọni-i?
12 Kidie rọ vwọ dianẹ e wene ẹko rẹ irherẹn na, kọ rhe dia obo ri fori re ji vwo wene Urhi na.
13 Kidie uvwiẹ ọfa yen ohwo ra ta eta nana kpahen nurhe, rẹ ohwo vuọvo vwẹ evun rọyen je rhe vwẹrote irueru re ruẹ vwẹ agbada na-a.
14 Kidie o phẹnre dẹn nẹ uvwiẹ ri Juda yen Ọrovwavwanre nurhe, jẹ Mosis ta ota ọvuọvo kpahen irherẹn ri che nẹ uvwiẹ yena rhe-e.
15 Ọnana tobọ rhoma rhi phẹn phiyọ ọke rẹ orherẹn ọfa rọ họhọ Mẹlkizẹdẹk vwọ rhe,
16 ọ ga kerẹ orherẹn, ọ dia fikirẹ uvwiẹ ro nurhe kirobo rẹ Urhi na guọnọre-e, ẹkẹvuọvo womarẹ ẹgba rẹ arhọ ra sa ghwọrọ-ọ.
17 Kidie e soseri kpahọn nẹ: “Wẹwẹ orherẹn bẹdi bẹdẹ kerẹ Mẹlkizẹdẹk.”
18 Ọtiọyena, a da kpairoro vrẹ iji ri jovwo na kidie o vwo ẹgba-a, ọ je cha sa cha avwanre uko-o.
19 Kidie Urhi na nẹrhẹ emu vuọvo dia gbagba-a, ẹkẹvuọvo Ọghẹnẹ kẹ avwanre iphiẹrophiyọ ro yovwin vrẹ, rẹ avwanre sa wan oma rọyen sikẹrẹ.
20 Vwọba, rọ vwọ dianẹ e ru ọnana ababọ rẹ iyorin eduvwo-on na
21 (kidie vwọrẹ uyota, o vwo ihwo evo re dia irherẹn jẹ e duvwun iyori-in, ẹkẹvuọvo ọnana rhe dia ọtiọyen womarẹ iyorin re duvwunru, womarẹ Ohwo rọ tare nẹ: “Jihova* duvwun iyorin nure, o che wene ẹwẹn rọye-en,* ‘Wẹwẹ orherẹn bẹdi bẹdẹ’”),
22 Jesu kọ rhe dia imuẹro* rẹ ọphọ ro yovwin vrẹ ọ ri jovwo na.
23 Vwọba, ihwo buebun da rhe dia irherẹn okpokpahọn kidie ughwu jẹ ayen sa dia ọtiọyen rhirin rhiri-in,
24 ẹkẹvuọvo rọ vwọ dianẹ ọ herọ bẹdi bẹdẹ na, o rhe vwo ohwo vuọvo rọ cha reyọ ẹdia rọyen kerẹ orherẹ-ẹn.
25 Ọtiọyena o ji se sivwin ihwo re wan oma rọyen brẹ Ọghẹnẹ ra karekare, kidie ọkieje yen ọ vwọ herọ rọ vwọ rẹ kẹ ayen.
26 Kidie ofori rẹ avwanre vwo vwo orherẹn rode tiọyen rọ fuevun, rẹ abọ rọyen fonro, ro vwo ẹgua-a, rọ fẹnẹ irumwemwu, ra je kpare kpenu vwọ vrẹ idjuvwu na.
27 Vwọ fẹnẹ irherẹn ride yena, ofori ro vwo ze izobo kẹdi kẹdẹ-ẹ, ẹsosuọ fikirẹ imwemwu robọ rọyen, a ke rha mrẹ ọ rẹ ihwo na, kidie o ru ọnana ẹsiẹvo goi ọke rọ vwọ vwẹ oma rọyen kpahotọ.
28 Kidie ihworakpọ ri vwo ovwiẹrẹ yen Urhi na vwo mu kerẹ irherẹn ride, ẹkẹvuọvo a vwẹ ota rẹ iyorin eduvwon na vwọ reyọ Ọmọ ọvo vwo mu rẹ Urhi na vwọ wanvrẹ nu, ohwo re ruru gbagba bẹdi bẹdẹ.
Eta rehẹ obotọ na
^ Yẹrẹ “ghare.”
^ Yẹrẹ “orherẹn bẹdi bẹdẹ.”
^ Vwẹ Grik, “emọ ri nẹ agada rẹ Ebraham rhe.”
^ Vwẹ Grik, “ọmọ rọhẹ agada rẹ ọsẹ rọyen rode.”
^ Ni Eta re Vwomaphia.
^ Yẹrẹ “ọ cha vie idiekpọvwẹ-ẹ.”
^ Yẹrẹ “Jesu kọyen a vwọ re esarobọ.”