Vwo Rhe Ihwo ri Hibru 8:1-13
8 Asaọkiephana ẹkpo rẹ oborẹ avwanre ta na kẹ ọna: Avwanre vwo oka rẹ orherẹn rode nana, o chidia obọrhen rẹ ekete rẹ Ọrọmarho na vwẹ idjuvwu na,
2 odibo* rẹ asan ọfuanfon na kugbe ọ rẹ utughẹ* rẹ uyota na, ri Jihova* vwo vi, ọ dia ohworakpọ-ọ.
3 Kidie a vwẹ korherẹn korherẹn rode vwo muẹ rọ vwọ vwẹ okẹ kpahotọ ji ze izobo; ọtiọyena ko fori ọnana ji vwo vwo orọnvwọn rọ cha vwọ kpahotọ.
4 Ọ da dianẹ otọrakpọ na yen ọ hepha jovwo, ọ rha dia orherẹ-ẹn, kidie irherẹn efa herọ re vwẹ okẹ kpahotọ kirobo rẹ Urhi na tare.
5 Eshare nana ga ẹga ọfuanfon vwọrẹ udje kugbe uhoho rẹ erọnvwọn rehẹ obodjuvwu; kirobo rẹ Ọghẹnẹ vwẹ iji kẹ Mosis ọke rọ vwọ guọnọ bọn utughẹ* na: Kidie ọ tare nẹ: “Wọ me mrẹvughẹ nẹ wo ru erọnvwọn eje vwo nene obo ra vwọ nẹ wẹ vwẹ enu rẹ ugbenu na.”
6 Ẹkẹvuọvo asaọkiephana, Jesu vwo iruo rẹ odibo egbe* ro me yovwin kidie ọyen jehẹ usuọpha rẹ ọphọ ro yovwin vrẹ ọrẹsosuọ na, ra re nene urhi, ro vwo ive ro me yovwin.
7 Ọ da dianẹ ọphọ rẹsosuọ na vwo obo re chọre vwọ-ọ, o rhe vwo oboresorọ ra vwọ guọnọ ọrivẹ-ẹ.
8 Kidie ọ mrẹ oruchọ vwẹ obọ rẹ ihwo na ọke rọ vwọ tanẹ: “‘Nighere! Ẹdẹ cha,’ ọtiọyen Jihova* tare, ‘ri mi che vwo nene uwevwin rẹ Izrẹl kugbe uwevwin ri Juda re ọphọ kpokpọ.
9 Ọ cha dia kerẹ ọphọ ri mi nene esẹ rayen ride re vwẹ ẹdẹ re me yọnrọn obọ rayen ri mi vwo sun ayen nẹ otọ rẹ Ijipt rhe-e, kidie ayen yọnrọn ọphọ mẹ-ẹ, ọtiọyena me da dobọ rẹ ẹroevwote rayen ji,’ ọtiọyen Jihova* tare.
10 “‘Kidie ọnana yen ọphọ ri mi che nene uwevwin rẹ Izrẹl re ẹdẹ yena da wan nu,’ ọtiọyen Jihova* tare. ‘Mi che phi irhi mẹ phiyọ ẹwẹn rayen, mi che si ayen phiyọ ubiudu rayen. Ke me cha dia Ọghẹnẹ rayen, ayen ke dia ihwo mẹ.
11 “‘Ayen ohwo vuọvo rhe che yono ohwo rẹ ẹkuotọ rọyen kugbe oniọvo rọyen nẹ: “Riẹn Jihova-a!”* Kidie ayen eje cha riẹn vwẹ, vwo nẹ ọ rọ ma hanvwe re te ọ rọ ma rho.
12 Kidie mi che gbe arodọnvwẹ kẹ ayen fikirẹ irueru ri jẹ ọsoso enene rayen, me rha cha karophiyọ imwemwu rayen ọfa-a.’”
13 Rọ vwọ tanẹ “ọphọ kpokpọ,” kọyen o ru ọ ri jovwo na kpo ọ rẹ awanre re. Asaọkiephana, obo ri kpo awanre, rọ je ghwa re na sikẹrẹ ẹranvwiẹ re.
Eta rehẹ obotọ na
^ Yẹrẹ “odibo rẹ azagba.”
^ Yẹrẹ “itabanako.”
^ Ni Eta re Vwomaphia.
^ Yẹrẹ “itabanako.”
^ Yẹrẹ “iruo rẹ azagba.”
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.