Ọbe ri Jems 4:1-17
4 Die yen sua ifovwin vẹ ohọnre rọhẹ uvwre rẹ ovwan na? Ọ dia ojevwe rẹ ugboma* ro nene ovwan họnra na yen suọ?
2 Ovwan guọnọ, jẹ o te ovwan obọ-ọ. Ovwan hwe ihwo ji gborho ihwo, dedena, o ji te ovwan obọ-ọ. Ovwan je họnra ji phiẹ ofovwin. O te ovwan obọ-ọ, kidie ovwan nọre-e.
3 Ọke rẹ ovwan vwọ nọ dede o ji te ovwan obọ-ọ, kidie obo ri mu ovwan vwọ nọ na chọre. Ovwan nọ rere ovwan sa reyọ vwo ru ojevwe rẹ ugboma rẹ ovwan.
4 Ovwan igberadja* na, ovwan rha riẹn nẹ ohwo rọ vwẹ oma ru ugbeyan rẹ akpọ na, ọvweghrẹn rẹ Ọghẹnẹ? Ọtiọyena, kohwo kohwo rọ guọnọ dia ugbeyan rẹ akpọ na, jẹ ọ vwẹ oma ruẹ ọvweghrẹn rẹ Ọghẹnẹ.
5 Gbanẹ ovwan roro nẹ isiesi ọfuanfon na de tanẹ, “Ẹwẹn rọhẹ evunrẹ oma rẹ avwanre na vọnre vẹ omaẹriọ ọgangan”?
6 Ẹkẹvuọvo, ẹse re muwan rọye-en rọ vwọ kẹ ohwo yen ma rho. Kọyensorọ isiesi ọfuanfon na vwọ tanẹ: “Ọghẹnẹ vwọsua ihwo re kparoma, ẹkẹvuọvo ẹse rọyen re muwan rọye-en herọ vwọ kẹ ihwo re vwomakpotọ.”
7 Ọtiọyena, ovwan vwomakpotọ kẹ Ọghẹnẹ, ẹkẹvuọvo vwọso Idẹbono, kọ djẹ kẹ ovwan.
8 Sikẹrẹ Ọghẹnẹ, ko sikẹre owẹ. Ovwan hworhẹ abọ rẹ ovwan fon, ovwan irumwemwu na, ru ubiudu rẹ ovwan fon, ovwan ihwo ri vwo ẹwẹn ivivẹ na.
9 Ovwan muomaphiyọ, vweri, je viẹ. E jẹ ehwẹ rẹ ovwan hirhephiyọ uvweri, aghọghọ rẹ ovwan mi rhe hirhephiyọ omaemuophiyọ.
10 Ovwan vwomakpotọ vwẹ ẹro ri Jihova,* kọ kpare ovwan kpenu.
11 Iniọvo, ovwan rha ta ota vwọsua ohwohwo-o. Kohwo kohwo rọ ta ota vwọso oniọvo rọyen yẹrẹ gun oniọvo rọyen ẹdjọ, jẹ ọ ta ota vwọso urhi na ji gun urhi na ẹdjọ. Jẹ wo de gun urhi na ẹdjọ, kọyen wọ rha dia ohwo ro ruẹ nene urhi na-a, ukperẹ ọtiọyen, wẹ kẹ oguẹdjọ.
12 Ojurhi vẹ Oguẹdjọ vuọvo yen herọ, ọyen yen ohwo ro se sivwin je ghwọrọ. Ẹkẹvuọvo, ono yen owẹ wọ vwọ reyọ ọrivẹ wẹn vwo guẹdjọ?
13 We nyo, ovwan re tanẹ, “Nonẹna yẹrẹ odẹ rọ cha na avwanre che kpo orere yena je ghwọrọ ẹgbukpe ọvo vwẹ oboyin, avwanre cha chueki je mrẹ erere,”
14 jẹ ovwan riẹn obo re cha phia kẹ arhọ rẹ ovwan odẹ rọ cha na-a. Kidie ovwan pha kerẹ irho rọ vwomaphia vwẹ ọmọke krẹn, ọ me ranvwiẹ.
15 Ukperẹ ọtiọyen, ofori nẹ ovwan ta: “Ọ da dia ọhọre ri Jihova,* avwanre cha dia akpọ ji ru ọnana yẹrẹ ọyena.”
16 Ẹkẹvuọvo, kẹ ovwan phuoma je yoma gangan. Omaẹyan tiọyena eje brare.
17 Ọtiọyena, ohwo da riẹn obo ri yovwirin jẹ o ruro-o, ọyena umwemwu.
Eta rehẹ obotọ na
^ Vwẹ Grik, “ojevwe rẹ ẹbẹre sansan rẹ oma rẹ ovwan.”
^ Yẹrẹ “ihwo re fuevu-un.”
^ Ni Eta re Vwomaphia.
^ Ni Eta re Vwomaphia.