Ọbe ri Jems 5:1-20
5 We nyo asaọkiephana, ovwan edafe na, ovwan viẹ ji vwerhe oma fikirẹ ukpokpogho ro bru ovwan cha.
2 Efe rẹ ovwan ghwọrọ kufia, eghwọghwọ je re emwa rẹ ovwan.
3 Iro vẹ idọnọ efuanfon rẹ ovwan mu ekagba, ekagba rayen na che soseri hwe ovwan je re uvwo rẹ ovwan. Oborẹ ovwan ghwẹ koko na cha họhọ erhanre vwẹ ẹdẹ re koba na.
4 Nighere! Osa rẹ ovwan rhọnvwe hwa kẹ iruiruo ri vuẹn orhọ rẹ udju rẹ ovwa-an rhe kperẹ phia, Jihova* rẹ ituofovwin na nyo ukperi rẹ oviẹ rẹ ihwo ri vuẹn orhọ na.
5 Ovwan riakpọ ji ru ojevwe rẹ ovwan vwẹ otọrakpọ na. Ovwan rere, je dia tubie tubie re te ẹdẹ rẹ ehwe.
6 We brorhiẹn hwe; we hwe ọvwata na, kọyensorọ ọ vwọ reyọ vwọso ovwan.
7 Ọtiọyena iniọvo, ovwan vwẹ edirin hẹrhẹ ọrhire* rẹ Ọrovwori na. Nighere! Ọghwẹrẹ na hẹrhẹ emamọ iyoyovwin rẹ otọ na, ọ vwẹ edirin hẹrhẹ bẹsiẹ rẹ osio rẹsosuọ vẹ osio rọ koba vwọ rhọ.
8 Ọtiọyena, ovwan ji vwo edirin rere we ru udu rẹ ovwan gan, kidie ọrhire* rẹ Ọrovwori na sikẹre re.
9 Ovwan guẹn ohwohwo-o, iniọvo, rere e vwo jẹ ovwan eguo. Nighere! Oguẹdjọ na mudia vwẹ anurhoro na.
10 Iniọvo, ovwan vwẹrokere udje rẹ emraro na re rioja ji vwo edirin, re je ta ota vwẹ odẹ ri Jihova.*
11 Nighere! Avwanre niroso nẹ ihwo ri chirakon vwo omavwerhovwẹn.* Ovwan nyo kpahen akoechiro ri Job, ovwan je mrẹ oborẹ Jihova* ru kẹ ukuko na, ro djerephia nẹ Jihova* ọyen ohwo rọ vọnre vẹ ẹguọnọ* kugbe arodọnvwẹ.
12 Ọ rọ ma rho iniọvo mẹ, ovwan rha vwẹ odjuvwu yẹrẹ otọrakpọ na yẹrẹ korọnvwọn korọnvwọn ọfa vwo duvwun iyori-in. Ẹkẹvuọvo, e jẹ “E” rẹ ovwan dia e, “Ẹjo” rẹ ovwan me je dia ẹjo, rere e vwo jẹ ovwan e vwo guẹn ẹdjọ.
13 O vwo ohwo rẹ akpọ bẹn vwẹ ohri rẹ ovwan? E jẹ ọ rha nẹrhovwo. O vwo ohwo rẹ oma vwerhan, e jẹ ọ rha so ine rẹ ejiro.
14 O vwo ohwo rọ muọga vwẹ ohri rẹ ovwan? E jẹ o se ekpako rẹ ukoko na rere ayen nẹrhovwo kẹ je vwẹ evwri ghworo vwẹ odẹ ri Jihova.*
15 Ẹrhovwo rẹ esegbuyota na che sivwin ohwo rọ muọga* na, Jihova* kọ cha kparọ vrẹn. Vwọba, ọ da dianẹ o ru umwemwu jovwo, ke vwo ghovwo.
16 Ọtiọyena, ovwan gba fan imwemwu rẹ ovwan kẹ ohwohwo je nẹrhovwo kẹ ohwohwo rere e vwo sivwin ovwan. Ẹrhovwo rẹ ọvwata vọnre vẹ ẹgba mamọ.
17 Ilaija ọyen ohwo kerẹ avwanre, dedena ọke rọ vwọ nẹrhovwo gangan nẹ osio rhọ-ọ, osio ghene rhọ ku otọ na vwẹ ẹgbukpe erha gbẹ emeranvwe esa-an.
18 Ọ da rhoma nẹrhovwo, osio da rhe rhọ, ekankọn da djẹ nẹ otọ na rhe.
19 Iniọvo mẹ, ọ da dianẹ e sun ohwo ọvo ghwru nẹ uyota na, ohwo ọfa da vwẹ ukẹcha kẹ vwo rhivwin rhe,
20 gba riẹn nẹ kohwo kohwo rọ vwẹ ukẹcha kẹ orumwemwu vwo siobọnu umwemwu rọyen che sivwon* nẹ ughwu, o ji che rhurhu imwemwu buebun.
Eta rehẹ obotọ na
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.
^ Ni Eta re Vwomaphia.
^ Yẹrẹ “ebruba.”
^ Ni Eta re Vwomaphia.
^ Ni Eta re Vwomaphia.
^ Yẹrẹ “ehrọre.”
^ Ni Eta re Vwomaphia.
^ Yẹrẹ ọ sa dia, “ọ rẹ oma rhọ.”
^ Ni Eta re Vwomaphia.
^ Yẹrẹ “che sivwin erhi rọyen.” Ni Eta re Vwomaphia.