Luk 11:1-54
11 Asaọkiephana kọ nẹrhovwo vwẹ asan ọvo, ọke rọ vwọ dunuji, ọvo vwẹ usun rẹ idibo rọyen da ta kẹ nẹ: “Ọrovwori, yono avwanre obo ra nẹrhovwo, kirobo ri Jọn ji yono idibo rọyen.”
2 Ọtiọyena ọ da ta kẹ ayen nẹ: “Kọke kọke rẹ ovwan da nẹrhovwo, ovwan tanẹ: ‘Ọsẹ, e jẹ e ru odẹ wẹn fon.* Jẹ Uvie wẹn rhe.
3 Kẹ avwanre ibrẹdi rẹ ẹdẹ ọvuọvo vwo nene oborẹ avwanre guọnọre kẹdi kẹdẹ.
4 Vwẹ imwemwu rẹ avwanre vwo ghovwo avwanre, kidie avwanre komobọ ji vwo ghovwo kohwo kohwo rọ riosa rẹ avwanre; wọ reyọ avwanre rua evunrẹ ọdavwini-i.’”
5 Ọyena vwọ wan nu, ọ da ta kẹ ayen nẹ: “E gbe dje nẹ ọvo vwẹ usun rẹ ovwan na vwo ugbeyan, wo de bro ra vwẹ uherevie ason, wọ da ta kẹ nẹ, ‘Ugbeyan mẹ, momo uvwe ibrẹdi erha,
6 kidie ugbeyan mẹ ọvo ghwe nẹ asan oshesheri bru vwe rhe, jẹ mi vwo orọnvwọn vuọvo me cha vwọ kẹ-ẹ.’
7 Ẹkẹvuọvo ọyena da kpahen nẹ obevun rẹ uwevwin rhe nẹ: ‘Wo rhe kpokpo uvwe-e. A kanre ẹchẹ na nure, mẹ vẹ emọ mẹ itete hẹ evunrẹ ehwa re. Mi che se vrẹn re me da vwẹ orọnvwọn vuọvo kẹ wẹ-ẹ.’
8 Me ta kẹ ovwan nẹ, ọ da tobọ dianẹ o che vrẹn rọ da vwẹ orọnvwọn kẹ kidie nẹ ugbeyan rọyen yen o ruẹ-ẹ, o muẹro nẹ kidie nẹ o dje ẹyẹyarọ na, o che vrẹn rọ da vwẹ kemu kemu rọ guọnọre vwọ kẹ.
9 Ọtiọyena me ta kẹ ovwan nẹ, ovwan rha nọ, ka vwọ kẹ ovwan; ovwan rha guọnọ, kẹ ovwan cha mrẹ; ovwan rhe hworo, ke che rhie vwọ kẹ ovwan.
10 Kidie kohwo kohwo rọ nọ, a vwọ kẹ, kohwo kohwo rọ guọnọ, ọ mrẹ, kohwo kohwo ro hworo, e che rhie kẹ.
11 Vwọrẹ uyota, ọsẹ vọ vwẹ usun rẹ ovwan na yen ọmọ rọyen cha nokpẹn rẹ erin, rọ da vwẹ ọrọdekọ vwọ kẹ ukperẹ erin?
12 Yẹrẹ rọ je cha nokpẹn rẹ ukọhọ, rọ da vwẹ akpakpasimagha vwọ kẹ?
13 Ọtiọyena, ọ da dianẹ ovwan, dede nẹ ovwan irumwemwu, riẹn obo ra vwẹ okẹ esiri vwọ kẹ emọ rẹ ovwan, Ọsẹ na rọhẹ obodjuvwu che ru vrẹ ọtiọyen, rọ da vwẹ ẹwẹn ọfuanfon vwọ kẹ otu re nọ mie!”
14 Ọyena vwọ wan nu, ọ da djẹ ẹwẹn rẹ Idẹbono ọvo rọ sa ta ota-a phia. Ọke rẹ ẹwẹn rẹ Idẹbono na vwọ ro otafe nu, ọshare rọ sa ta ota-a na da ta ota, ọnana de gbe otu na unu.
15 Ẹkẹvuọvo evo vwẹ usun rayen da tanẹ: “Ọ djẹ ẹwẹn rẹ Idẹbono na phia womarẹ ogangan ri Bẹlzibọb,* osun rẹ ẹwẹn rẹ Idẹbono na.”
16 Vwọ kẹ efa, rere ayen vwọ davwọn ni, kẹ ayen vuẹ nẹ o ru oka nẹ odjuvwu rhe.
17 Rọ vwọ riẹn iroro rayen, ọ da ta kẹ ayen nẹ: “Kuvie kuvie rọ ghare vwọso oma rọyen cha ghwọrọ, uwevwin rọ ghare vwọso oma rọyen che she.
18 Vwẹ idjerhe vuọvo na, Eshu da je ghare vwọso oma rọyen, mavọ yen uvie rọyen se vwo mudia? Kidie ovwan tanẹ me djẹ ẹwẹn rẹ Idẹbono na phia womarẹ ogangan ri Bẹlzibọb.
19 Ọ da dianẹ ogangan ri Bẹlzibọb yen me vwọ djẹ ẹwẹn rẹ Idẹbono phia, kẹ ogangan rẹ ono yen emọ rẹ ovwan vwọ djẹ ayen phia? Ọnana yen sorọ rẹ ayen cha vwọ reyọ ovwan vwo guẹdjọ.
20 Ẹkẹvuọvo ọ da dianẹ womarẹ urhiobọ rẹ Ọghẹnẹ yen me vwọ djẹ ẹwẹn rẹ Idẹbono na phia, kọyen Uvie rẹ Ọghẹnẹ na ghene ro ovwan ọrhan re.
21 Ọke rẹ ọgba rọ vwẹ ekuakua ofovwin vwọ choma da rhẹrẹ uwevwin rọyen, emu vuọvo cha sa phia kẹ ekuakua rọye-en.
22 Ẹkẹvuọvo siẹrẹ ohwo ọvo rọ gan nọ da rhe rhi nene họnre ji phio kparobọ, ohwo yena kọ reyọ ekuakua ofovwin rọyen eje rọ vwẹroso jovwo na, ọ me ghare erọnvwọn rọ reyọ mie.
23 Kohwo kohwo rọhẹ ẹbẹre mẹ-ẹ, jẹ ọ vwọso ovwẹ, kohwo kohwo ro nene uvwe koko-o jẹ ọ hra.
24 Ọke rẹ ẹwẹn ro jẹfuọn de nẹ oma rẹ ohwo, ọ me wan asan rẹ ame hepha-a rọ vwọ guọnọ asan ro de rovwoma, ẹkẹvuọvo ọke rọ rha mrẹ asan vuọvo-o, ọ da tanẹ, ‘Mi che rhivwin kpo uwevwin mẹ ri mi vrẹ nu na.’
25 Ọke ro vwo te etiyin, ọ da mrẹ nẹ a nabọ hwerhe uwevwin na fon je rhuẹrẹ fia.
26 Ọ da yanran ra reyọ ẹwẹn ighwrẹn efa re bra vrẹ ekpuyovwin rọyen rhe, ayen vwọ ro evun rọyen, ayen da dia etiyin. Ọtiọyena ẹdia rẹ ọshare na ukuko na da rhe bra vrẹ ọke rẹsosuọ.”
27 Asaọkiephana rọ vwọ ta eta nana, aye ọvo rọhẹ evunrẹ otu na de kperi phia, rọ vwọ ta kẹ nẹ: “Omavwerhovwẹn dia kẹ evun ro mu we kugbe evie ru wo vieri!”
28 Ẹkẹvuọvo ọ da tanẹ, “Ẹjo, ukperẹ ọtiọyen, omavwerhovwẹn dia vwọ kẹ ihwo ri nyo ota rẹ Ọghẹnẹ ri ji ruẹ nene!”
29 Ọke rẹ otu na vwo siẹ koko, o de mu ota phiyọ nẹ: “Uvwiẹ nana uvwiẹ umwemwu; ọ guọnọ oka, ẹkẹvuọvo e che dje oka vuọvo kẹ-ẹ, jokparẹ oka ri Jona.
30 Kidie kirobo ri Jona dia oka vwọ kẹ ihwo ri Ninive, ọtiọyen Ọmọ rẹ ohwo je cha dia vwọ kẹ uvwiẹ nana.
31 Ovie aye rẹ obọrhen ọnre na che vrẹn vwẹ ẹdjọeguo na vẹ uvwiẹ nana o mi bru hwe ayen, kidie o nẹ oba rẹ akpọ na rhe rhi nyo aghwanre ri Solomọn. Ẹkẹvuọvo nighere! orọnvwọn rọ vrẹ Solomọn hẹ etinẹ.
32 Ihwo ri Ninive che vrẹn vwevunrẹ ẹdjọeguo na vẹ uvwiẹ nana ayen mi bru hwe, kidie ayen kurhẹriẹ fikirẹ oborẹ Jona ghwoghwori. Ẹkẹvuọvo nighere! orọnvwọn rọ vrẹ Jona hẹ etinẹ.
33 Ohwo da vwẹ urhukpẹ mu nu, o muo phiyọ asan rọ djahenre yẹrẹ otọ rẹ obere-e,* ẹkẹvuọvo enu rẹ ogburhukpẹ, rere ihwo re ro uwevwin na sa vwọ mrẹ elo na.
34 Urhukpẹ rẹ ugboma na yen ẹro wẹn. Ẹro wẹn de nẹ orọnvwọn ọvuọvo,* ugboma wẹn ejobi ko ji lo;* ẹkẹvuọvo ọ da rioma,* ugboma wẹn kọ je dia ebri.
35 Ọtiọyena, gbe nomaso nẹ urhukpẹ rọhẹ ugboma wẹn dia ebri-i.
36 Ọtiọyena, ugboma wẹn eje de lo, o rhe vwo ẹbẹre vuọvo rọ dia ebri vwọ-ọ, ko che lo fiotọ kerẹsiẹ rẹ urhukpẹ da vwẹ orẹmrẹ kẹ wẹ womarẹ elo rọyen.”
37 Rọ vwọ ta ọnana nu, ohwo ri Farisi ọvo da vuẹ nẹ o rhi nene ọyen riemu. Ọtiọyena, ọ da ro uwevwin, o de chidia imẹjẹ.
38 Ẹkẹvuọvo o gbe ohwo ri Farisi na unu rọ vwọ mrẹ nẹ, ọ hworhẹ abọ* tavwen ọ ke ton emuẹriọ phiyọ-ọ.
39 Ẹkẹvuọvo Ọrovwori na da ta kẹ nẹ: “Ovwan ihwo ri Farisi na, ovwan ruẹ obuko rẹ uko kugbe ọ rẹ omoze fuan, ẹkẹvuọvo vwẹ obevun, ovwan vọnre vẹ urhuru kugbe umwemwu.
40 Ovwan ri jẹ iroro evwo na! Ọ ro ru obotafe na yen ji ru obevun na, gbanẹ ọ dia ọyen?
41 Ẹkẹvuọvo ovwan vwẹ erọnvwọn rehẹ obevun vwọ kẹ okẹ rẹ arodọnvwẹ,* nighere! erọnvwọn ejobi ri shekpahen ovwan ke cha dia fuanfon.
42 Ẹkẹvuọvo okpetu rode kẹ ovwan ihwo ri Farisi, kidie ovwan hwa ẹkẹn ọvo rẹ ẹkẹn ihwe ri mint* kugbe ọ ri ru* kugbe ọ ri kẹbe kẹbe* efa ra kọn phiyọ evunrẹ ogba, ẹkẹvuọvo ovwan jẹ orhiẹn-ebro abavo kugbe ẹguọnọ rẹ Ọghẹnẹ fia! Enana erọnvwọn rẹ ovwan vwo oghwa rẹ ovwan vwo ru, jẹ ọ dia ọyen ovwan vwọ jẹ erọnvwọn ri chekọ na fia-a.
43 Okpetu rode kẹ ovwan ihwo ri Farisi, kidie ovwan guọnọ egbara rehẹ obaro* vwẹ sinagọg kugbe uyeren vwẹ afieki!
44 Okpetu rode kẹ ovwan, kidie ovwan pha kerẹ ishi* yena ra nabọ mrẹ-ẹ,* rẹ ihwo yan wan enu rayen jẹ ayen riẹnre-e!”
45 Ọvo vwẹ usun rẹ ihwo re nabọ riẹn Urhi na da kpahen kẹ nẹ: “Oyono, wọ vwẹ eta nana ru wọ ta na ji vwo yinvwaro kpahan avwanre.”
46 Ọtiọyena ọ da tanẹ: “Okpetu rode je dia kẹ ovwan re nabọ riẹn Urhi na, kidie ovwan krun eghwa re bẹn emuo nyẹ ihwo, ẹkẹvuọvo ovwan komobọ vwẹ urhiobọ rẹ ovwan vwo te eghwa na-a!
47 “Okpetu rode kẹ ovwan, kidie ovwan bọn ishi* rẹ emraro na, ẹkẹvuọvo esẹ rẹ ovwan ride yen hwe ayen!
48 Vwọrẹ uyota ovwan iseri rẹ oborẹ esẹ rẹ ovwan ride ruru, dedena ovwan rhọnvwephiyọ ayen, kidie ayen hwe emraro na ẹkẹvuọvo ovwan bọn ishi rayen.
49 Kọyensorọ aghwanre rẹ Ọghẹnẹ je vwọ tanẹ: ‘Mi che ji emraro kugbe iyinkọn bru ayen ra, ayen che hwe evo ji mukpahen evo vwẹ usun rayen,
50 rere a sa vwọ nokpẹn rẹ ọbara rẹ emraro na eje re ku kuotọ vwo nẹ ọtonphiyọ rẹ akpọ na rhe vwo mie uvwiẹ nana,
51 vwo nẹ ọbara rẹ Ebẹl re te ọ ri Zekaraya, ohwo re hweri vwẹ uvwre rẹ agbada na vẹ uwevwin na.’* E, me ta kẹ ovwan nẹ, a cha nokpẹn rọyen mie uvwiẹ nana.
52 “Okpetu rode kẹ ovwan re nabọ riẹn Urhi na, kidie ovwan reyọ usiaphrẹ rẹ erianriẹn. Ovwan komobọ rorọ-ọ, ovwan je vwẹ uphẹn kẹ ihwo efa nẹ ayen ruọ-ọ!”
53 Ọtiọyena ọke ro vwo vrẹn nẹ etiyin, isiẹbe na vẹ ihwo ri Farisi na ke sua okeke ọgangan kẹ je nọ enọ efa buebun,
54 rẹ ayen vwọ hwa phiyọ hẹrhẹ sẹ ayen sa mrẹ oborẹ ayen cha vwọ yọnrọn vwevunrẹ ota rọyen.
Eta rehẹ obotọ na
^ Yẹrẹ “e jẹ a vwẹ ọghọ kẹ odẹ wẹn; e jẹ e ni odẹ wẹn fuanfon.”
^ Odẹ re vwo se Eshu.
^ Yẹrẹ “obere ra vwọ vwanvwẹ erọnvwọ-ọn.”
^ Yẹrẹ “Ẹro wẹn de fiotọ.” Vwẹ Grik, “Ẹro wẹn da dia lọlọlọ.”
^ Yẹrẹ “kọ je vọn vẹ orẹmrẹ.”
^ Vwẹ Grik, “ọ da dia brabra; ọ da dia umwemwu.”
^ Kọyen, ọ hworhẹ abọ rọyen vwo nene urhi-i.
^ Yẹrẹ “kẹ okẹ vwọ kẹ igbere.” Ni Eta re Vwomaphia.
^ “Mint ọyen ẹbe rọ nẹrhẹ emu vwerhan.”
^ Ọnana okankọn ra vwọba ruẹ uhuvwun, a je reyọ vwo phiẹ avwarhen phiyọ emu.
^ Yẹrẹ “kifọ kifọ.”
^ Yẹrẹ “egbara ri me yovwin.”
^ Yẹrẹ “ishi rẹ ẹkarophiyọ.”
^ Yẹrẹ “yena ra jokaphiyọ-ọ.”
^ Yẹrẹ “ishi rẹ ẹkarophiyọ.”
^ Yẹrẹ “uwevwin rẹ ẹga na.”