Luk 13:1-35
-
Ovwan kurhẹriẹ, ọ rha dia ọtiọye-en ka ghwọrọ ovwan (1-5)
-
Udje rẹ urhe rẹ ifigi rọ mọre-e na (6-9)
-
E sivwin aye ro se muẹdia kpomaviẹ-ẹ vwẹ ẹdẹ Urovwoma (10-17)
-
Idje rẹ ubi rẹ imọstadi kugbe iphuephu na (18-21)
-
A guọnọ ẹgbaẹdavwọn a sa vwọ wan anurhoro ọhwahwa na (22-30)
-
“Urhirako yena,” Hẹrọd (31-33)
-
Jesu vwerhe oma fikirẹ Jerusalẹm (34, 35)
13 Vwẹ ọke yena ihwo evo rehẹ etiyin da niyẹnrẹn kẹ kpahen ihwo ri Galili ri Pailet vwẹ ọbara rayen vwọ gua izobo rayen.
2 Ọ da kpahen kẹ ayen nẹ: “Ovwan rorori nẹ ihwo ri Galili yena yen ma dia irumwemwu vwọ vrẹ ihwo ri Galili ri chekọ na eje, kidie nẹ ayen rioja rẹ erọnvwọn nana?
3 Ẹjo, me ta kẹ ovwan nẹ; jokpanẹ kẹ ovwan kurhẹriẹ, ọtiọyen ovwan eje je cha ghwọrọ.
4 Yẹrẹ ihwo 18 rẹ uwevwin ro kpenu rọhẹ Siloam she teyen, ro de hwe ayen na—ovwan rorori nẹ ayen yen ma riabe vwọ vrẹ ihwo ri chekọ na eje re dia Jerusalẹm?
5 Ẹjo, me ta kẹ ovwan nẹ; jokpanẹ kẹ ovwan kurhẹriẹ, ovwan eje je cha ghwọrọ kirobo rẹ ayen ghwọrọre na.”
6 Ọyena vwọ wan nu, o de ru udje nana: “Ọshare ọvo vwo urhe rẹ ifigi ra kọn phiyọ ogba rẹ ivaini rọyen, ọ da rhe guọnọ omamọ vwọ, ẹkẹvuọvo ọ mrẹ ọvuọvo-o.
7 Ọ da ta kẹ ohwo rọ vwẹrote ivaini na nẹ, ‘Ọnana yen ọ vwọ gba ẹgbukpe erha re me vwọ guọnọ omamọ vwẹ urhe rẹ ifigi nana re, ẹkẹvuọvo me mrẹ ọvuọvo-o. Gbọ she! Diesorọ ọ de vwọ reyọ otọ na jẹ ọ mọ emamọ-ọ?’
8 Ọ da kpahen kẹ nẹ, ‘Onini, je yan jovwo vwẹ ẹgbukpe ọvo bẹsiẹ me vwọ tọn riariẹ phiyọ ji phi imaniọ* phiyọ.
9 Ọ da mọ omamọ vwẹ obaro na, jẹ o yovwirin; ẹkẹvuọvo ọ rha mọ-ọ, gba gbọ she.’”
10 Asaọkiephana ko yono vwẹ ọvo vwẹ usun ri sinagọg na vwẹ Ẹdẹ Urovwoma na.
11 Nighere! aye ọvo hẹ etiyin ro vwo ẹwẹn rẹ ovwiẹrẹ* vwẹ ẹgbukpe 18 re; o gunuru, o se muẹdia kpomaviẹ kakaka-a.
12 Ọke rọ vwọ mrẹ, Jesu da ta kẹ nẹ: “Aye, e si we nẹ ovwiẹrẹ wẹn na re.”
13 Ọ da ghwabọ rọyen kpahọn, ugege yena aye na de mudia kpomavi, kọ vwẹ urinrin kẹ Ọghẹnẹ.
14 Ẹkẹvuọvo kidie nẹ ophu muẹ osun ri sinagọg na nẹ Jesu ru esivwon na vwẹ Ẹdẹ Urovwoma, ọ da ta kẹ otu na nẹ: “Ẹdẹ esan yen herọ ro fori nẹ a vwọ wiowian, ọtiọyena ovwan rhe rere e sivwin ovwan vwẹ ẹdẹ yena, ọ dia Ẹdẹ Urovwoma na-a.”
15 Ẹkẹvuọvo Ọrovwori na da kpahen kẹ nẹ: “Ovwan ihwo rẹ omeru na, ovwan ohwo ọvuọvo rhan erhuẹn yẹrẹ ekẹkẹtẹ rẹ ovwan nẹ asan ra gba ayen phiyọ rẹ ovwan de suẹn ayen ra da ame vwẹ Ẹdẹ Urovwoma na?
16 Aye nana rọ dia ọmọtẹ rẹ Ebraham rẹ Eshu gba phiyotọ vwẹ ẹgbukpe 18 na, o rhe fo nẹ a rhan nẹ ẹdia nana vwẹ Ẹdẹ Urovwoma?”
17 Ọke rọ vwọ ta eta nana, oma kọ vua ihwo eje re vwọsuọ, ẹkẹvuọvo otu na eje ke ghọghọ fikirẹ emu urinrin eje ro ruru.
18 Ọtiọyena ọ da tanẹ: “Die yen Uvie rẹ Ọghẹnẹ na họhọre, die yen me sa reyọ vwo dje?
19 Ọ họhọ ubi rẹ imọstadi rẹ ọshare ọvo reyọre, ọ da kọn phiyọ ogba rọyen, ọ da rho, o de hirhephiyọ urhe, emephran rẹ odjuvwu na da rhe dia evunrẹ eghọn rọyen.”
20 Obọfa, ọ da tanẹ: “Die yen me sa reyọ Uvie rẹ Ọghẹnẹ na vwo dje?
21 Ọ pha kerẹ iphuephu rẹ aye ọvo reyọre, o de gbe kugbe vẹ ovwanvwọ ride* erha rẹ iflawa bẹsiẹ rẹ ọsoso rẹ egun na vwo phu.”
22 O de nẹ orere kpo orere, nẹ ọko kpo ọko, jẹ o yono rọ vwọ hẹ idjerhe kpo Jerusalẹm na.
23 Asaọkiephana ọshare ọvo da ta kẹ nẹ: “Ọrovwori, imihwo krẹn yen che sivwin rhọ?” Ọ da ta kẹ ayen nẹ:
24 “Ovwan davwẹngba gangan rere ovwan sa vwọ wan anurhoro ọhwahwa na ruọ, kidie me ta kẹ ovwan nẹ ihwo buebun cha guọnọ ruọ, ẹkẹvuọvo ayen cha sa ruọ-ọ.
25 Ọke rẹ ọrovwuwevwin na de vrẹn je kanre ẹchẹ na nu, ovwan che mudia otafe, jẹ ovwan hworo ẹchẹ je tanẹ, ‘Ọrovwori, rhie kẹ avwanre.’ Ẹkẹvuọvo ọ cha kpahen kẹ ovwan nẹ: ‘Me riẹn asan rẹ ovwan nurhe-e.’
26 Vwẹ ọke yena kẹ ovwan cha tanẹ, ‘Avwanre rere je da vwẹ obaro wẹn, wo yonori vwẹ irhuvwun ride rẹ avwanre.’
27 Ẹkẹvuọvo kọ cha ta kẹ ovwan nẹ, ‘Me riẹn asan rẹ ovwan nurhe-e. Ovwan wan nẹ etinẹ, ovwan eje ri ruiruo umwemwu na!’
28 Etiyin kọyen ovwan da cha rha viẹ je ria akon rẹ ovwan, ọke rẹ ovwan da mrẹ Ebraham, Aizik, Jekọp, kugbe emraro na eje vwevunrẹ Uvie rẹ Ọghẹnẹ, ẹkẹvuọvo e do ovwan phiyọ otafe.
29 Vwọba, ihwo che nẹ ẹbẹre ọnre va nẹcha vẹ ẹbẹre ọnre shera rhe kugbe vwo nẹ obohwẹre ọnre na vẹ obọrhen ọnre na rhe, kẹ ayen che chidia imẹjẹ vwẹ Uvie rẹ Ọghẹnẹ.
30 Nighere! o vwo ihwo evo re kuko re cha dia erẹsosuọ, kugbe e re dia erẹsosuọ re cha kuko.”
31 Vwẹ unọke yena, evo vwẹ usun rẹ ihwo ri Farisi na de bro rhe, ayen da ta kẹ nẹ: “Vrẹn, wọ yan nẹ etinẹ, kidie Hẹrọd guọnọ hwe we.”
32 Ọ da ta kẹ ayen nẹ: “Ovwan yanran ra ta kẹ urhirako yena nẹ, ‘Nighere! me djẹ ẹwẹn rẹ Idẹbono phia ji sivwin ihwo nonẹna kugbe odẹ rọ cha na, ẹdẹ rerha yen mi che vwo ruo re.’
33 Dedena, o vwo obo rọ wanre-e, mi che ruo nonẹna, odẹ rọ cha na kugbe ẹdẹ rọ vwọ kpahọn, kidie ọ cha sa phia nẹ* e hwe ọmraro vwẹ otafe ri Jerusalẹmu-u.
34 Jerusalẹm, Jerusalẹm, ọ ro hwe emraro na ro ji phi ihwo re ji bro rhe—brabọ yen me davwẹngba vwo koko emọ wẹn kugbe kirobo rẹ ọhọ koko emọ rọyen vwẹ otọ rẹ ibekpe rọyen! Ẹkẹvuọvo ovwan guọnọre-e.
35 Nighere! A yanjẹ uwevwin rẹ ovwan vwo kẹ ovwan re. Me ta kẹ ovwan nẹ, ovwan rha cha mrẹ vwẹ ọfa-a, rhi te ọke rẹ ovwan vwọ tanẹ: ‘Ebruba kẹ ohwo rọ cha vwẹ odẹ ri Jihova!’”*
Eta rehẹ obotọ na
^ Yẹrẹ “ifatalaiza.”
^ Yẹrẹ “ẹwẹn rọ nẹrhẹ oma she chọ.”
^ Vwẹ Grik, “ovwanvwọ ri siya.” Siya ọvo vẹ Ilita 7.33 abavo.
^ Yẹrẹ “kidie e che se se gbuyota nẹ.”
^ Ni Eta re Vwomaphia.