Luk 24:1-53
24 Ẹkẹvuọvo vwẹ ẹdẹ rẹsosuọ rẹ udughwrẹn na, ayen da rhiọ kpo asan ushi* na, ayen ghwa erọnvwọn ri gbon phanphanphan* rẹ ayen muegbe rọyen nene oma.
2 Ẹkẹvuọvo ayen da mrẹ nẹ e ghorie ukuta na nẹ unu rẹ ushi* na,
3 ọke rẹ ayen vwọ ruọ, ayen mrẹ ugboma rẹ Ọrovwori na Jesu-u.
4 Rẹ ẹwẹn rayen je vwọ yanghan ku kpahen ọnana, nighere! eshare ivẹ ri ku iwun ri lo phiyọ de mudia kẹrẹ ayen.
5 Oshọ de mu eya na, kẹ ayen nẹ otọ, ọtiọyena eshare na da ta kẹ ayen nẹ: “Diesorọ ovwan vwọ guọnọ ohwo ro yerẹn vwẹ ohri rẹ ihwo ri ghwuru?
6 Ọ hẹ etinẹ-ẹ, ẹkẹvuọvo a kparerọ vrẹn re. Ovwan karophiyọ obo rọ vuẹ ovwan ọke rọ je vwọ hẹ Galili,
7 nẹ a cha vwẹ Ọmọ rẹ ohwo na kpahotọ kẹ irumwemwu, kẹ ayen che hwe mu urhe, vwẹ ẹdẹ rerha ko che vrẹn.”
8 Ayen da karophiyọ eta rọyen,
9 ayen de rhivwin nẹ asan ushi* na kpo, ayen da niyẹnrẹn rẹ erọnvwọn nana eje kẹ Uhwọvo na kugbe ihwo ri chekọ na eje.
10 Eya na yen Meri Magdalini, Joana kugbe Meri oni ri Jems. Vwọba, eya ri chekọ re vẹ ayen gba herọ na ji gbikun rẹ erọnvwọn nana vwọ kẹ iyinkọn na.
11 Ẹkẹvuọvo eta nana ke họhọ ogbeta kẹ ayen, ayen rha rhọnvwe se eya na gbuyota-a.
12 Ẹkẹvuọvo Pita de vrẹn, ọ da djẹ kpo asan ushi* na, ro vwo rhuẹn ni evun rọyen, emwa iyoyovwin na ọvo kọyen ọ mrẹre. Ọ da yanran, jẹ ọ vwẹro roro obo re phiare na.
13 Ẹkẹvuọvo nighere! vwẹ ẹdẹ yena, ivẹ vwẹ usun rayen ki kpo ọko ọvo re se Emaọs, rọ vwẹ omarẹ imaili ighwrẹn* vwo sheri kẹ Jerusalẹm,
14 kẹ ayen ta ota kẹ ohwohwo kpahan erọnvwọn nana eje re phiare na.
15 Asaọkiephana rẹ ayen vwo gbikun je ta ota kpahan erọnvwọn nana na, Jesu komobọ rọyen de bru ayen rhe, ọ vẹ ayen ke yan usun yanran,
16 ẹkẹvuọvo ayen se vughe-e.
17 Ọ da ta kẹ ayen nẹ: “Enana die yen ovwan ta ota kpahan rẹ ovwan vwọ yanran na?” Ayen de mudia, jẹ ayen muomaphiyọ.
18 Ọ re se Kliopas da kpahen kẹ nẹ: “Wẹwẹ ọrhorha rẹ ọyen ọvo dia asan obọ rọyen vwẹ Jerusalẹm, ru wo vwo jẹ erọnvwọn re phiare vwọ vwẹ uvwre rẹ ọke nana ẹriẹn?”*
19 Ọ da nọ ayen nẹ: “Erọnvwọn vọ?” Ayen da ta kẹ nẹ: “Erọnvwọn ri shekpahen Jesu ohwo ri Nazarẹt na, ohwo ro dje oma rọyen phiyọ ọmraro rọ vọnre vẹ ẹgba womarẹ iruo vẹ ota vwẹ obaro rẹ Ọghẹnẹ kugbe ihwo na eje;
20 kugbe oborẹ irherẹn ride vẹ isun rẹ avwanre vwerọ kpahotọ nẹ e brorhiẹn rẹ ughwu hwe, ayen da kanrọ mu urhe.
21 Ẹkẹvuọvo avwanre rhẹro rọyen jovwo nẹ ọshare nana yen ohwo ro che sivwin Izrẹl. E, vwọ vrẹ enana eje, nonẹna yen ọ vwọ gba ẹdẹ erha rẹ erọnvwọn nana phia re.
22 Vwọba, eya evo vwẹ usun rẹ avwanre je ta obo ri gbe avwanre unu, kidie ayen rhiọ kpo asan ushi* na
23 ọke rẹ ayen vwo jẹ ugboma rọyen ẹmrẹ, ayen da rhe rhe tanẹ ayen je mrẹ emekashe re tare nẹ, ọ hẹ akpọ.
24 Evo vwẹ usun rẹ ihwo re vẹ avwanre gba herọ de kpo asan ushi* na, ayen da mrẹ kirobo rẹ eya na ghwa ta, ẹkẹvuọvo ayen mrẹ Jesu-u.”
25 Ọtiọyena, ọ da ta kẹ ayen nẹ: “E ihwo ri jẹ iroro evwo rẹ ubiudu rayen je fobọ se erọnvwọn eje rẹ emraro na tare gbuyota-a na!
26 O rhe fo ri Kristi na vwọ rioja rẹ erọnvwọn nana, je ro evunrẹ urinrin rọyen?”
27 Rọ vwọ tonphiyọ vẹ Mosis kugbe emraro na eje, ọ da fan otọ rẹ erọnvwọn ri shekpahen oma rọyen vwẹ Isiesi Ọfuanfon na eje kẹ ayen.
28 Ukuotọ rọyen, ayen de rhi sikẹrẹ ọko rẹ ayen ra na, o de ru kerẹsiẹ ra da mrẹ nẹ ọ je guọnọ kpo obaro.
29 Ẹkẹvuọvo ayen da rẹ nẹ ọ domaji, rẹ ayen vwọ tanẹ: “Nene avwanre dia, kidie ovwọnvwọn joma te re, ọke je joma she re.” Ọtiọyena ọ da ro uwevwin, o de nene ayen dia.
30 Rọ vẹ ayen vwọ riemu na,* ọ da reyọ ibrẹdi na, ọ da nẹrhovwo phiyọ, o de bro, kọ vwọ kẹ ayen.
31 Ọtiọyena ẹro rayen da nabọ rhiephiyọ, ayen de rhi vughe; ẹkẹvuọvo o de hrẹn jẹ ayen vwo.
32 Ayen da ta kẹ ohwohwo nẹ: “Ubiudu rẹ avwanre rha torhẹ vwevunrẹ avwanre nanaye rọ vwọ ta ota kẹ avwanre vwẹ idjerhe, rọ vwọ nabọ rhie Isiesi Ọfuanfon na kẹ avwanre?”*
33 Ayen de vrẹn vwẹ unọke yena, ayen de rhivwin kpo Jerusalẹm, ayen da mrẹ Uhwọvo na vẹ ihwo re vẹ ayen gbe siomakoko,
34 ihwo re tare nẹ: “Vwọrẹ uyota, a kpare Ọrovwori na vrẹn, ọ vwomaphia kẹ Saimọn!”
35 Ayen de gbikun rẹ obo re phiare vwẹ idjerhe na kẹ ayen kugbe oborẹ ayen rhi vwo vughe womarẹ ibrẹdi ro bruru.
36 Rẹ ayen je vwọ ta erọnvwọn nana, ọyen komobọ de mudia ohri rayen, ọ da ta kẹ ayen nẹ: “E jẹ ufuoma nene ovwan dia.”
37 Ẹkẹvuọvo kidie nẹ uguegue ro ayen oma, oshọ ji muẹ ayen, kẹ ayen roro nẹ ohwo rẹ ẹwẹn yen ayen mrẹ na.
38 Ọtiọyena, ọ da ta kẹ ayen nẹ: “Diesorọ ẹwẹn rẹ ovwan rhe totọ-ọ, diesorọ ovwan vwo vwo ẹwẹn ivivẹ?
39 Ovwan ni abọ mẹ vẹ awọ mẹ, rere ovwan riẹn nẹ mẹvwẹ dẹn; ovwan djobọte vwe rere ovwan mrẹ, kidie ohwo rẹ ẹwẹn vwo uvwo vẹ ibeku kirobo rẹ ovwan mrẹ nẹ mi vwori na-a.”
40 Rọ vwọ ta ọnana, o de dje abọ rọyen vẹ awọ rọyen kẹ ayen.
41 Ọke rẹ ayen ji rhi segbuyota-a, kidie nẹ ayen ghọghọ o ji gbe ayen unu, ọ da ta kẹ ayen nẹ: “Ovwan vwo orọnvwọn ra sa re vwẹ etiyin?”
42 Ẹkẹvuọvo ayen da vwẹ erin re vunvwurun vwọ kẹ,
43 ọ da reyọ, ọ da riọ vwẹ irharo rayen.
44 Ọ da ta kẹ ayen nẹ: “Enana yen eta re me ta kẹ ovwan ọke re me vẹ ovwan je vwọ herọ, nẹ erọnvwọn eje re si kpahen ovwẹ vwevunrẹ Urhi ri Mosis kugbe Emraro na kugbe Une rẹ Ejiro che rugba.”
45 Ọ da nabọ rhie ẹwẹn rayen phiyọ rere ayen se vwo vwo ẹruọ rẹ oborẹ Isiesi Ọfuanfon na mudiaphiyọ,
46 ọ da ta kẹ ayen nẹ, “Ọnana yen obo re si phiyotọ: nẹ Kristi na cha rioja ji vrẹn nẹ ohri rẹ ihwo ri ghwuru vwẹ ẹdẹ rerha,
47 fikirẹ odẹ rọyen, ke che ghwoghwo okurhẹriẹ vwọ kẹ evwoghovwo rẹ imwemwu vwẹ ẹgborho na eje—a cha tuọnphiyọ vwo nẹ Jerusalẹm.
48 Ovwan cha dia iseri rẹ erọnvwọn nana.
49 Nighere! mi jẹ oborẹ Ọsẹ mẹ veri brẹ ovwan cha. Ovwan dia evunrẹ orere na bẹsiẹ re vwo ku ogangan ro nẹ obenu rhe phiyọ ovwan.”
50 O de sun ayen ro otafe rhirin re te Bẹtani, ọ da kpare abọ rọyen kpenu, ọ da nẹrhovwo kẹ ayen.
51 Rọ vwọ nẹrhovwo kẹ ayen na, a da hẹriẹ vwo nẹ ayen, a da reyọ kpo odjuvwu.
52 Ayen da vwẹ uyovwin kpotọ kẹ, ayen de rhivwin kpo Jerusalẹm vẹ aghọghọ rode.
53 Ọkieje kọyen ayen vwọ hẹ evunrẹ uwevwin rẹ ẹga na, rẹ ayen vwo jiri Ọghẹnẹ.
Eta rehẹ obotọ na
^ Yẹrẹ “ushi rẹ ẹkarophiyọ.”
^ Ipọda yẹrẹ ẹbe kugbe iri re vwo muegbe rẹ ugboma vwọ kẹ esho.
^ Yẹrẹ “ushi rẹ ẹkarophiyọ.”
^ Yẹrẹ “ushi rẹ ẹkarophiyọ.”
^ Yẹrẹ “ushi rẹ ẹkarophiyọ.”
^ Omarẹ iroko 11. Vwẹ Grik, “Istediọmu 60.” Istediọmu ọvo vẹ imita 185 (ichiyin 606.95) abavo.
^ Yẹrẹ ọ sa dia, “Wẹwẹ ọvo yen ọrhorha vwẹ Jerusalẹm ro jẹ riẹn?”
^ Yẹrẹ “ushi rẹ ẹkarophiyọ.”
^ Yẹrẹ “ushi rẹ ẹkarophiyọ.”
^ Yẹrẹ “Rọ vẹ ayen vwo chidia imẹjẹ na.”
^ Yẹrẹ “rọ vwọ nabọ dje Isiesi Ọfuanfon na fiotọ kẹ avwanre?”