Luk 3:1-38
3 Vwẹ ukpe rihwiorin rẹ usuon ri Tibiriọs Siza, ọke ri Pọntiọs Pailet vwọ dia osun ri Judia, Hẹrọd* vwọ dia osun rẹ ubrakpọ ri Galili, oniọvo rọyen Filip vwọ dia osun rẹ ubrakpọ rẹ ẹkuotọ rẹ Ituria kugbe Trakonaitis, Laisenias vwọ dia osun rẹ ubrakpọ rẹ Abilini,
2 vwẹ ọke rẹ orherẹn rode Anas kugbe Kaifas, ota rẹ Ọghẹnẹ de bru Jọn ọmọ ri Zekaraya rhe vwevunrẹ aton na.
3 Ọtiọyena ọ da ro irere na eje re riariẹ Jọdan phiyọ, ro vwo ghwoghwo omaebrophiyame kerẹ oka rẹ okurhẹriẹ vwọ kẹ evwoghovwo rẹ imwemwu,
4 kirobo re siro phiyọ ọbe rẹ eta rẹ ọmraro Aizaya nẹ: “Urhuru rẹ ohwo ọvo ro kperẹ vwevunrẹ aton na nẹ: ‘Muegbe rẹ idjerhe ri Jihova!* Ru idjerhe rọyen phiọn.
5 Gbe kiyara kiyara; kporo kugbenu kugbenu rode kugbe igbenu itete; ru idjerhe re pha chachahen phiọn, kugbe idjerhe re pha chohri chohri riẹriẹriẹ;
6 uvwo eje* ke cha mrẹ usivwin rẹ Ọghẹnẹ.’”*
7 Kọ ta kẹ otu ri bro cha nẹ o bru ayen phiyame na nẹ: “Ovwan emọ rẹ eredekọ na, ono yen vwẹ orhọesio kẹ ovwan nẹ ovwan djẹ vwọ kẹ ophu rọ cha na?
8 Ọtiọyena ovwan gba mọ emamọ ri dje okurhẹriẹ phia. Ovwan ta kẹ oma rẹ ovwan nẹ, ‘Ebraham yen ọsẹ rẹ avwanre-e.’ Kidie me ta kẹ ovwan nẹ Ọghẹnẹ sa vwẹ emọ kẹ Ebraham vwo nẹ ikuta nana rhe.
9 Vwọrẹ uyota, ushurhe na hẹ esiri rẹ irhe na re. Ọtiọyena kurhe kurhe rọ mọ omamọ esiri-i, ka gbọ she, e mi do phiyọ erhanre.”
10 Otu na ke nọ nẹ: “Kẹ die yen avwanre che ru?”
11 Ọ da kpahen kẹ ayen nẹ: “E jẹ ohwo ro vwo iwun ivẹ* vwẹ ọvo kẹ ohwo ro vwo ọvuọvo-o, e jẹ ohwo ro vwo obo rọ cha re ji ru ọtiọyen.”
12 Ihwo ri phi osa uyovwin dede ji bro rhe nẹ o bru ayen phiyame, ayen da ta kẹ nẹ: “Oyono, die yen ofori nẹ avwanre ru?”
13 Ọ da ta kẹ ayen nẹ: “Ovwan nokpẹn rẹ* orọnvwọn ọfa vwọ vrẹ osa uyovwin na-a.”
14 Vwọba, ihwo rehẹ iruo rẹ isodje ke nọ nẹ: “Die yen ofori nẹ avwanre ru?” Ọ da ta kẹ ayen nẹ: “Ovwan kpokpo* ohwo vuọvo yẹrẹ mu efian banran ohwo vuọvo-o, ẹkẹvuọvo e jẹ obo ra vwọ kẹ ovwan* te kẹ ovwan.”
15 Asaọkiephana ihwo na rhẹro ri Kristi na, ayen ejobi ki roro vwẹ ubiudu rayen kpahan Jọn nẹ, “Ọnana rha dia Kristi na?”
16 Jọn da kpahen, rọ vwọ ta kẹ ayen eje nẹ: “Vwọ kẹ vwẹ, mi brẹ ovwan phiyame, ẹkẹvuọvo ọ rọ gan nọ vwẹ cha, mi muwan me vwọ rhan ifi rẹ isabato rọye-en. Ọ cha vwẹ ẹwẹn ọfuanfon vẹ erhanre vwo bru ovwan phiyame.
17 Isaboro rọ vwọ frẹ ibi ekankọn hẹ obọ rọyen, ro vwo ru asan rọ da frẹ ibi ekankọn na fon karekare, ro ji vwo koko iwiti na phiyọ uwevwin rọ da sẹro rẹ erọnvwọn, ẹkẹvuọvo ọ cha vwẹ erhanre re che se fu-un vwọ torhẹ ehọrọ na.”
18 Ọ je vwẹ uchebro efa buebun phia, jẹ o ghwoghwo iyẹnrẹn esiri kẹ ihwo na.
19 Ẹkẹvuọvo Hẹrọd rọ dia osun rẹ ubrakpọ na, kidie nẹ Jọn vwẹ ọghwọku kẹ kpahen Hẹrodias rọ dia aye rẹ oniọvo rọyen kugbe erọnvwọn ebrabra eje ri Hẹrọd ruru,
20 da je vwẹ ọnana vwọba erọnvwọn yena eje ro ruru na: Ọ da kanre Jọn phiyọ uwodi.
21 Asaọkiephana rẹ ihwo na ejobi vwo bromaphiyame, Jesu de ji bromaphiyame. Rọ vwọ nẹrhovwo, odjuvwu na de rhiephiyọ,
22 ẹwẹn ọfuanfon na rọ vwomaphia kerẹ ilekuku da rhe enu rọyen, urhuru ọvo de nẹ odjuvwu rhe nẹ: “Wẹwẹ Ọmọ mẹ, ri mi vwo ẹguọnọ rọyen; mi rhiabọreyọ owẹ.”
23 Ọke ri Jesu vwọ ton iruo rọyen phiyọ, ọ hẹ omarẹ ẹgbukpe 30, kirobo rẹ ihwo rorori, ọyen ọmọri Josẹf,ọmọ ri Hẹli,
24 ọmọ ri Matat,ọmọ ri Livae,ọmọ ri Mẹlki,ọmọ ri Jannai,ọmọ ri Josẹf,
25 ọmọ ri Matatayas,ọmọ rẹ Emọs,ọmọ ri Nahum,ọmọ rẹ Esli,ọmọ ri Negae,
26 ọmọ ri Maat,ọmọ ri Matatayas,ọmọ ri Simien,ọmọ ri Josẹk,ọmọ ri Joda,
27 ọmọ ri Joanan,ọmọ ri Rhesa,ọmọ ri Zerubabẹl,ọmọ ri Shitiẹl,ọmọ ri Neri,
28 ọmọ ri Mẹlki,ọmọ rẹ Adi,ọmọ ri Kosam,ọmọ rẹ Elmadam,ọmọ rẹ Er,
29 ọmọ ri Jesu,ọmọ rẹ Ẹliẹza,ọmọ ri Jorim,ọmọ ri Matat,ọmọ ri Livae,
30 ọmọ ri Simiọn,ọmọ ri Judas,ọmọ ri Josẹf,ọmọ ri Jonam,ọmọ rẹ Eliakim,
31 ọmọ ri Milia,ọmọ ri Menna,ọmọ ri Matata,ọmọ ri Netan,ọmọ ri Devid,
32 ọmọ ri Jesse,ọmọ rẹ Obẹd,ọmọ ri Boaz,ọmọ ri Salmọn,ọmọ ri Nahshọn,
33 ọmọ rẹ Aminadab,ọmọ rẹ Ani,ọmọ ri Hẹzrọn,ọmọ ri Pẹrẹz,ọmọ ri Juda,
34 ọmọ ri Jekọp,ọmọ rẹ Aizik,ọmọ rẹ Ebraham,ọmọ ri Tira,ọmọ ri Nahọ,
35 ọmọ ri Serọg,ọmọ ri Reu,ọmọ ri Pẹlẹg,ọmọ rẹ Eba,ọmọ ri Shila,
36 ọmọ ri Keinan,ọmọ rẹ Apakshad,ọmọ ri Shẹm,ọmọ ri Noa,ọmọ ri Lamẹk,
37 ọmọ ri Mẹtusẹla,ọmọ rẹ Inọk,ọmọ ri Jerẹd,ọmọ ri Mahalalẹl,ọmọ ri Keinan,
38 ọmọ rẹ Inọsh,ọmọ ri Sẹt,ọmọ rẹ Adam,ọmọ rẹ Ọghẹnẹ.
Eta rehẹ obotọ na
^ Kọyen, Hẹrọd Antipas. Ni Eta re Vwomaphia.
^ Ni Eta re Vwomaphia.
^ Yẹrẹ “ihworakpọ eje.”
^ Yẹrẹ “mrẹ oborẹ Ọghẹnẹ che vwo sivwin ihwo.”
^ Yẹrẹ “ewun ọfa.”
^ Yẹrẹ “Ovwan reyọ.”
^ Yẹrẹ “gborho.”
^ Yẹrẹ “e jẹ osa ra hwa kẹ ovwan.”