Luk 6:1-49
-
Jesu, “Ọrovwori rẹ ẹdẹ Urovwoma na” (1-5)
-
E sivwin ọshare ọvo rẹ obọ rọyen sida (6-11)
-
Iyinkọn 12 na (12-16)
-
Jesu yono ji sivwẹn (17-19)
-
Omavwerhovwẹn sansan kugbe ikpetu ride (20-26)
-
Vwo ẹguọnọ rẹ ivwighrẹn (27-36)
-
Wọ rha vwẹ ihwo guẹdjọ-ọ (37-42)
-
A riẹnrẹ womarẹ omamọ rọyen (43-45)
-
Uwevwin ra nabọ bọn; uwevwin rẹ uchivwo rọyen ganre-e (46-49)
6 Asaọkiephana vwẹ ẹdẹ urovwoma, kọ wan idju ra kọn ekankọn phiyọ, idibo rọyen ke kọrọ ibi ekankọn na, kẹ ayen ria ayen, jẹ ayen vwẹ abọ rayen vwọ wrẹnwrẹn ayen.
2 Ọtiọyena evo vwẹ usun rẹ ihwo ri Farisi na da tanẹ: “Diesorọ ovwan vwo ruẹ obo re vwọso urhi vwẹ Ẹdẹ Urovwoma na?”
3 Jesu da kpahen kẹ ayen nẹ: “Ovwan ji rhi se dẹvo-o, oborẹ Devid ruru ọke rẹ owẹnvwe vwo hwe vẹ eshare re vẹ ọyen gba herọ?
4 Obo rọ ro uwevwin rẹ Ọghẹnẹ, rọ da reyọ ibrẹdi re vwo dje na, rọ da riọ, rọ da je vwẹ evo kẹ eshare re vẹ ọyen gba herọ, orọnvwọn rẹ urhi rhọnvwe kẹ ohwo vuọvo nẹ ọ re-e, jokparẹ irherẹn na ọvo?”
5 Ọtiọyena ọ da ta kẹ ayen nẹ: “Ọmọ rẹ ohwo yen Ọrovwori rẹ Ẹdẹ Urovwoma na.”
6 Vwẹ ẹdẹ urovwoma ọfa, ọ da ro evunrẹ sinagọg na, ko yono. Ọshare ọvo rẹ obọrhen rọyen sida* hẹ etiyin.
7 Isiẹbe na vẹ ihwo ri Farisi na da tẹnrovi Jesu rẹ ayen vwo no sẹ o che sivwon vwẹ Ẹdẹ Urovwoma na, rere ayen vwọ mrẹ asan tanẹ o ru chọ.
8 Ẹkẹvuọvo ọ riẹn oborẹ ayen roro, ọtiọyena ọ da ta kẹ ọshare rẹ obọ rọyen sida* na nẹ: “Vrẹn wo rhi mudia uherevie na.” O de vrẹn, o de mudia etiyin.
9 Jesu da ta kẹ ayen nẹ: “Juvwe nọ ovwan, urhi rhọnvwere nẹ e ru obo ri yovwirin yẹrẹ so omaẹwan, nẹ e sivwin arhọ* yẹrẹ ghwọrọ vwẹ Ẹdẹ Urovwoma na?”
10 Ọke ro vwo ni ayen ejobi riariẹ nu, ọ da ta kẹ ọshare na nẹ: “Rionbọ wẹn phia.” O de ru ọtiọyen, obọ rọyen de shephiyọ.
11 Ẹkẹvuọvo ayen de muophu rẹ ẹkpa, kẹ ayen ta ota kẹ ohwohwo kpahen oborẹ ayen se ru Jesu.
12 Ẹdẹ ọvo vwẹ uvwre rẹ ọke yena, o de kpo ugbenu na ra nẹrhovwo, ọ da ghwọrọ ason na ejobi vwọ nẹrhovwo rhe Ọghẹnẹ.
13 Ọke vwo rhie, o de se idibo rọyen te oma, ọ da sane 12 vwo nẹ ohri rayen, o de ji se ayen iyinkọn:
14 Saimọn ro ji se Pita, Andru oniọvo rọyen, Jems, Jọn, Filip, Batolomio,
15 Matiu, Tọmọs, Jems ọmọ rẹ Alfiọs, Saimọn re se “ọ ro vwo oruru na,”
16 Judas ọmọ ri Jems, kugbe Judas Iskariọt rọ rhe dia ohwo rọ shẹrẹ.
17 Ọ vẹ ayen de wontọ rhe, ayen de mudia asan ọvo rọ pha riẹriẹriẹ, ihwo buebun re dia idibo rọyen hẹ etiyin, kugbe ihwo buebun ri nẹ Judia ejobi kugbe Jerusalẹm kugbe ekogho ri Taya vẹ Saidọn re kẹrẹ urhie rhe, rhi nyo eta rọyen rere o ji sivwin ega rayen.
18 A je tobọ sivwin ihwo rẹ ẹwẹn ri jẹfuọn kpokpo dede.
19 Otu na ejobi ke guọnọ djobọte, kidie ẹgba nẹ oma rọyen, ko sivwẹn ayen ejobi.
20 Ọ da kpare opharo kpenu vwo ni idibo rọyen, kọ tanẹ:
“Omavwerhovwẹn dia vwọ kẹ ovwan re dia igbere, kidie Uvie rẹ Ọghẹnẹ na ọ rẹ ovwan.
21 “Omavwerhovwẹn dia vwọ kẹ ovwan rẹ owẹnvwe hwe asaọkiephana, kidie evun cha vọn ovwan.
“Omavwerhovwẹn dia vwọ kẹ ovwan re viẹ asaọkiephana, kidie ovwan cha hwẹ.
22 “Omavwerhovwẹn dia vwọ kẹ ovwan kọke kọke rẹ ihwo de vwo utuoma kpahen ovwan kugbe ọke rẹ ayen da djẹ ovwan nẹ oma, hanrhe ovwan, ji miovwo odẹ rẹ ovwan nẹ ovwan erharhe rẹ ihwo fikirẹ Ọmọ rẹ ohwo.
23 Ovwan ghọghọ vwẹ ẹdẹ yena, rere ovwan pho kpenu vẹ aghọghọ, kidie nighere! osa rẹ ovwan pha rhuarho vwẹ obodjuvwu, kidie erọnvwọn yena vuọvo na yen esẹ rayen ride ji ruẹ kẹ emraro na jovwo.
24 “Ẹkẹvuọvo okpetu rode kẹ ovwan re dia edafe, kidie ovwan nabọ riakpọ vọnvọn enẹna.
25 “Okpetu rode kẹ ovwan rẹ evun vọnre asaọkiephana, kidie owẹnvwe che hwe ovwan.
“Okpetu rode kẹ ovwan re hwẹ asaọkiephana, kidie ovwan che vweri je viẹ.
26 “Okpetu rode kẹ ovwan kọke kọke rẹ ihwo eje da ta omamọ rẹ ota kpahen ovwan, kidie ọnana yen oborẹ esẹ rayen ride ru vwọ kẹ emraro rẹ efian na.
27 “Ẹkẹvuọvo me ta kẹ ovwan re kerhọ na nẹ: Ovwan rhe vwo ẹguọnọ rẹ ivwighrẹn rẹ ovwan, ru erhuvwu vwọ kẹ ihwo ri vwo utuoma kpahen ovwan,
28 bruba kẹ ihwo re hanrha ovwan, nẹrhovwo kẹ ihwo ri yinvwaro kpahen ovwan.
29 Ohwo rọ ghwiẹ wẹ vwẹ ọhwa ọvo, je rhẹriẹ ọ ro chekọ kẹ; ohwo rọ reyọ ewun rẹ obotafe wẹn, wo ji siẹ ọ rẹ obevun na nẹ kẹ-ẹ.
30 Kohwo kohwo rọ yare owẹ, vwọ kẹ, ohwo rọ reyọ erọnvwọn wẹn, wọ nokpẹn rayen mie-e.
31 “Vwọba, kirobo rẹ ovwan guọnọre nẹ ihwo ru kẹ ovwan, ovwan ji ru ọtiọyen kẹ ayen.
32 “Ọ da dianẹ ihwo ri vwo ẹguọnọ rẹ ovwan yen ovwan vwo ẹguọnọ rayen, erere vọ yen che te ovwan? Kidie irumwemwu na dede vwo ẹguọnọ rẹ ihwo ri vwo ẹguọnọ rayen.
33 Ọ da dianẹ ihwo ri ruẹ erhuvwu kẹ ovwan yen ovwan ruẹ erhuvwu kẹ, erere vọ yen che te ovwan? Irumwemwu na dede ji ruẹ ọtiọyen.
34 Vwọba, ọ da dianẹ ihwo re ovwan rhẹro rọyen nẹ e cha hwosa kẹ ovwan rhivwin yen ovwan momo kẹ, erere vọ yen che te ovwan? Irumwemwu na dede ji momo kẹ irumwemwu rere ayen sa vwọ hwa rhivwin kẹ ayen abavo.
35 Ukperẹ ọtiọyen, ovwan rhe vwo ẹguọnọ rẹ ivwighrẹn rẹ ovwan, ovwan ru erhuvwu ji momo kẹ ihwo, ẹkẹvuọvo ovwan rhẹro rẹ emu vuọvo rhivwi-in; osa rẹ ovwan kọ cha dia rhuarho, ovwan ke cha dia emọ rẹ Ọ ro Me Kpenu na, kidie o ruẹse kẹ ihwo re kpẹvwẹ ẹse-e kugbe irumwemwu.
36 Ovwan rhe gbe arodọnvwẹ kirobo rẹ Ọsẹ rẹ ovwan ji gbe arodọnvwẹ.
37 “Vwọ vrẹ ọyena, ovwan rha vwẹ ihwo vwo guẹdjọ-ọ, a rha je cha vwẹ ovwan vwo guẹdjọ-ọ; ovwan rhe brẹ hwe ihwo-o, e rhe ji che bru hwe ovwa-an. Ovwan rhe vwo ghovwo,* ke ji che vwo ghovwo* ovwan.
38 Ovwan rha kẹ, ihwo ke je cha kẹ ovwan. Ayen che ku omamọ rẹ ovwanvwọ ra nabọ nyẹ, re kpogho kugbe, rọ mwavwa hwẹ phiyọ ekpoghawọ rẹ ovwan. Kidie ovwanvwọ rẹ ovwan vwọ vwanvwa kẹ ihwo yen ayen je cha vwọ vwanvwe kẹ ovwan.”
39 O de ji ru udje ọvo kẹ ayen: “Orhuẹro che se sun orhuẹro-o, gbanẹ o se ruo? Ayen ivẹ na che shephiyọ ọgọdọ, gbanẹ ọ dia ọtiọyen?
40 Ọ re yono* rho vrẹ oyono rọye-en, ẹkẹvuọvo kohwo kohwo ra nabọ yono gbagba cha dia kerẹ oyono rọyen.
41 Ọtiọyena diesorọ wo vwo nẹ ẹmẹbẹre urhe tutuno rọhẹ ẹro rẹ oniọvo wẹn, jẹ wo se vwo oniso rẹ urhe rode rọhẹ ẹro wẹ-ẹn?
42 Mavọ wọ sa vwọ ta kẹ oniọvo wẹn nẹ, ‘Oniọvo, juvwe nene uwe si ẹmẹbẹre urhe tutuno rọhẹ ẹro wẹn na no,’ jẹ wẹwẹ komobọ sa mrẹ urhe rode rọhẹ ẹro wẹ-ẹn? Ohwo rẹ omeru na! Ke si urhe rode rọhẹ ẹro wẹn na no, ọke yena ku wọ sa mrorẹ fiotọ je riẹn oborẹ wo se vwo si ẹmẹbẹre urhe tutuno rọhẹ ẹro rẹ oniọvo wẹn na no.
43 “Kidie o vwo urhe esiri vuọvo rọ mọ orharhe omamọ-ọ, o ji vwo urhe ogbongbon vuọvo rọ mọ omamọ esiri-i.
44 Kidie omamọ rẹ urhe ọvuọvo yen e vwo vughe. Kerẹ udje, ihwo koko ifigi vwo nẹ idjigbẹ-ẹn, yẹrẹ kọrọ igrepu vwo nẹ umurhe ro vwo inwe-e.
45 Ohwo esiri reyọ erọnvwọn esiri vwo nẹ efe esiri rọhẹ evunrẹ ubiudu rọyen cha, ẹkẹvuọvo ohwo umwemwu reyọ erọnvwọn umwemwu rehẹ evunrẹ efe umwemwu rọyen cha; kidie obo re vọn evunrẹ ubiudu na yen unu rọyen ta.
46 “Ọtiọyena diesorọ ovwan vwo se vwe ‘Ọrovwori! Ọrovwori!’ jẹ ovwan ruẹ obo re me ta-a?
47 Kohwo kohwo ro bru vwe rhe, ro nyo eta mẹ ji ru ayen, mi che dje oka rẹ ohwo rọ hepha kẹ ovwan:
48 Ọ họhọ ohwo rọ bọn uwevwin, rọ nabọ tọn kokodo ọ da vwẹ uchivwo rọyen vi vwẹ enu rẹ oragha. Ọke vwọ yan obaro, oghwe de ku, ame rẹ urhie na da teyen uwevwin na, ẹkẹvuọvo ọ gan te ẹdia ro de kpogho-o, kidie a nabọ riẹn bọn.
49 Vwọ fẹnẹ ọyena, kohwo kohwo ro nyori jẹ o ru emu vuọvo kpahọ-ọn, pha kerẹ ohwo rọ bọn uwevwin phiyọ otọ fefe ro vwo uchivwo-o. Ame rẹ urhie na da teyọn, ugege yena o de she, oghwọrọ rẹ uwevwin yena rhoro mamọ.”
Eta rehẹ obotọ na
^ Yẹrẹ “Ọshare ọvo rọ sa kpara obọrhen rọye-en.”
^ Yẹrẹ “ọshare rọ sa kpara obọ-ọ.”
^ Yẹrẹ “erhi.” Ni Eta re Vwomaphia.
^ Yẹrẹ “Ovwan rhe siobọnẹ.”
^ Yẹrẹ “ke ji che siobọnu.”
^ Yẹrẹ “Odibo.”