Luk 9:1-62
-
A vwẹ odjekẹ kẹ Ihwivẹ na kpahen iruo rẹ aghwoghwo na (1-6)
-
Ẹwẹn ri Hẹrọd yanghan ku fikirẹ Jesu (7-9)
-
Jesu ghẹrẹ ihwo 5,000 (10-17)
-
Pita vughe Kristi na (18-20)
-
A mraro kpahen ughwu ri Jesu (21, 22)
-
Obo ra sa vwọ dia uvi rẹ odibo (23-27)
-
Jesu wene oma (28-36)
-
E sivwin ọmọshare ọvo rẹ ẹwẹn rẹ Idẹbono kpokpo (37-43a)
-
A rhoma mraro kpahen ughwu ri Jesu (43b-45)
-
Idibo na phraphro kpahen ohwo rọ ma rho (46-48)
-
Kohwo kohwo rọ vwọso avwanre-e jẹ ọ vẹ avwanre obọ (49, 50)
-
Ihwo rẹ ọko ri Sameria ọvo sen Jesu (51-56)
-
Obo re se vwo nene Jesu (57-62)
9 Ọyena vwọ wan nu, o de se Ihwivẹ na koko, ọ da kẹ ayen ogangan vẹ uturhi vwẹ enu rẹ ẹwẹn rẹ Idẹbono eje kugbe rere ayen vwo sivwin ega.
2 O de ji ayen yanran re ghwoghwo Uvie rẹ Ọghẹnẹ na, ji sivwin ihwo,
3 ọ da ta kẹ ayen nẹ: “Ovwan ghwa orọnvwọn vuọvo nene oma vwẹ oyan na-a, owenẹ ọ dia ọkpọ yẹrẹ ekpu rẹ emu yẹrẹ ibrẹdi yẹrẹ igho;* ovwan ghwa iwun ivẹ-ẹ.*
4 Ẹkẹvuọvo kasan kasan rẹ ovwan da ro uwevwin, ovwan dia etiyin bẹsiẹ rẹ ovwan vwo vrẹn no.
5 Kasan kasan rẹ ihwo rhe rhiabọreyọ ovwa-an, ọke rẹ ovwan de nẹ orere yena, ovwan tue ekpẹn nẹ awọ rẹ ovwan rọ vwọ dia oseri vwọ kẹ ayen.
6 Ayen de mu oyan phiyọ, ayen da yan ekogho na vwo nẹ ọko kpo ọko, jẹ ayen ghwoghwo iyẹnrẹn esiri na ji sivwin ihwo vwẹ kasan kasan.
7 Asaọkiephana Hẹrọd* rọ dia osun rẹ ubrakpọ na de nyo kpahen erọnvwọn eje re phia na, ẹwẹn rọyen rhe totọ kakaka-a, kidie ihwo evo tanẹ a kpare Jọn nẹ ughwu re,
8 ẹkẹvuọvo efa tanẹ Ilaija vwomaphia re, efa je tanẹ ọvo vwẹ usun rẹ emraro rẹ awanre na vrẹn re.
9 Hẹrọd da tanẹ: “Mi bru uyovwin ri Jọn no. Kẹ ono yen ohwo nana ri mi nyo erọnvwọn nana kpahan na?” Ọtiọyena kọ davwẹngba rọ vwọ mrẹ.
10 Ọke rẹ iyinkọn na vwo rhivwin rhe, ayen da niyẹnrẹn rẹ erọnvwọn eje rẹ ayen ruru vwọ kẹ Jesu. Ọtiọyena, ọ da reyọ ayen nene oma, ayen da bẹbẹ siomareyọ kpo orere ọvo re se Bẹtsaida.
11 Ẹkẹvuọvo otu na vwọ riẹn kpahọn, ayen de nene. Ọ da nabọ rhiabọdede ayen, kọ ta ota kẹ ayen kpahen Uvie rẹ Ọghẹnẹ na, o de sivwin ihwo re guọnọ esivwon.
12 Ọke she re. Ihwivẹ na de bro rhe, ayen da ta kẹ nẹ: “Siobọnẹ otu na rere ayen ro evunrẹ eko kugbe irere re riariẹ etinẹ na phiyọ, ra guọnọ asan rẹ ayen cha dia kugbe oborẹ ayen cha re, kidie etinẹ na rẹ avwanre hepha na sherabọ vwọ kẹ irere na.”
13 Ẹkẹvuọvo ọ da ta kẹ ayen nẹ: “Ovwan kẹ ayen oborẹ ayen cha re.” Ayen da tanẹ: “Ibrẹdi iyorin kugbe erin ivẹ ọvo yen avwanre vwori, jokpanẹ kẹ avwanre komobọ yanran ra dẹ emu vwọ kẹ ihwo nana eje.”
14 Vwọrẹ uyota, ihwo rehẹ etiyin te omarẹ eshare 5,000. Ẹkẹvuọvo ọ da ta kẹ idibo rọyen nẹ: “Ovwan jẹ ayen chidia ẹkuẹko rẹ omarẹ 50.”
15 Ayen de ru ọtiọyen, ayen eje de chidia totọ.
16 Rọ vwọ reyọ ibrẹdi iyorin kugbe erin ivẹ na, ọ da kpare opharo rọyen ni odjuvwu, ọ da nẹrhovwo phiyọ ayen. O de bru ayen, kọ vwẹ ayen kẹ idibo na rere ayen mu ayen phiyọ obaro rẹ otu na.
17 Ọtiọyena ayen eje da re, evun da vọn ayen, ayen da ghwẹ e ra re chekọ na koko, ibere 12.
18 Ọke vwọ yan obaro, rẹ ọyen ọvo vwọ nẹrhovwo, idibo na de bro rhe, ọ da nọ ayen nẹ: “Ono yen otu na tanẹ me hepha?”
19 Ayen da kpahen kẹ nẹ: “Jọn ro Brẹ Ihwo Phiyame, ẹkẹvuọvo efa tanẹ Ilaija, efa je tanẹ ọvo vwẹ usun rẹ emraro rẹ awanre na vrẹn re.”
20 Ọ da ta kẹ ayen nẹ: “Kẹ ovwan vwo, ono yen ovwan tanẹ me hepha?” Pita da kpahen nẹ: “Kristi rẹ Ọghẹnẹ na.”
21 Ọ da vwẹ orhọesio ọgangan kẹ ayen nẹ ayen vuẹ ohwo vuọvo kpahen ọnana-a,
22 ẹkẹvuọvo ọ da tanẹ: “Ọmọ rẹ ohwo na cha rioja rẹ erọnvwọn buebun, ekpako na kugbe irherẹn ride na kugbe isiẹbe na cha siọn ji hwe, vwẹ ẹdẹ rerha, ka cha kparọ vrẹn.”
23 Ọ da ta kẹ ayen eje nẹ: “Ọ da dianẹ ohwo guọnọ nene uvwe, e jẹ ọ sen oma rọyen rere o mu urhe rẹ oja* rọyen kẹdi kẹdẹ, rere o rhe nene uvwe.
24 Kidie kohwo kohwo rọ guọnọ sivwin arhọ* rọyen che kuo kufia, ẹkẹvuọvo kohwo kohwo ro ku arhọ* rọyen kufia fiki mẹ yen ohwo ro che sivwon.
25 Vwọrẹ uyota, erere vọ yen che te ohwo siẹrẹ o de vwo akpọ na ejobi, jẹ o ku oma* rọyen kufia yẹrẹ rioja rẹ oghwọrọ?
26 Kidie kohwo kohwo rẹ oma voro fiki mẹ kugbe eta mẹ, oma je cha vo Ọmọ rẹ ohwo fikirẹ ohwo yena ọke rọ da rhe vwevunrẹ urinrin rọyen kugbe ọ rẹ Ọsẹ na kugbe ọ rẹ emekashe efuanfon na.
27 Ẹkẹvuọvo me ta kẹ ovwan vwọrẹ uyota nẹ, o vwo ihwo evo vwẹ usun rẹ ihwo ri mudia etinẹ na re cha davwen ughwu kakaka-a, jokpanẹ ayen ka mrẹ Uvie rẹ Ọghẹnẹ na tavwen.”
28 Vwọrẹ uyota, omarẹ ẹdẹ ẹrenren rọ vwọ ta eta nana nu, ọ da reyọ Pita, Jọn, kugbe Jems nene oma, o de yerin kpo enu rẹ ugbenu na ra nẹrhovwo.
29 Rọ vwọ nẹrhovwo na, opharo rọyen de wene, ewun rọyen kọ fuan popo.
30 Nighere! eshare ivẹ ki nene ta ota; ayen yen Mosis vẹ Ilaija.
31 Ayen vwomaphia vẹ urinrin, kẹ ayen ta ota kpahen ukpo rọyen ro che rugba kẹrẹkpẹ vwẹ Jerusalẹm.
32 Asaọkiephana ovwerhẹn muẹ Pita vẹ ihwo re vẹ ọyen gba herọ gangan, ẹkẹvuọvo ovwerhẹn na vwọ nabọ nẹ ayen ẹro re, ayen da mrẹ urinrin rọyen vẹ eshare ivẹ re vẹ ọyen gbe mudia na.
33 Rẹ enana vwọ yan jovwo re, Pita da ta kẹ Jesu nẹ: “Oyono, o yovwirin rẹ avwanre vwọ dia etinẹ. Ọtiọyena jẹ avwanre bọn itughẹ erha, ọvo vwọ kẹ wẹ, ọvo vwọ kẹ Mosis, ọvo vwọ kẹ Ilaija.” Ẹkẹvuọvo ọ riẹn obo rọ ta-a.
34 Rọ vwọ ta eta nana, evwru ọvo de mu, ko rhurhu ayen. Rẹ evwru na vwo rhurhu ayen na, oshọ ko muẹ ayen.
35 Urhuru ọvo de nẹ evwru na rhe, rọ tare nẹ: “Ọnana Ọmọ mẹ, ọ ra jẹreyọ na. Ovwan kerhọ rọyen.”
36 Rẹ urhuru na je vwọ ta ota na, Jesu ọvo kọyen ayen mrẹre. Ẹkẹvuọvo ayen de din oborẹ ayen mrẹre na phiyọ oma, ayen niyẹnrẹn rọyen vwọ kẹ ohwo vuọvo vwẹ ọke yena-a.
37 Vwẹ ẹdẹ rọ vwọ kpahọn rẹ ayen vwo wontọ nẹ enu rẹ ugbenu na rhe, otu buebun da vwa.
38 Nighere! ọshare ọvo de kperi vwo nẹ otu na rhe nẹ: “Oyono, me rẹ wẹ nẹ wo ni ọmọshare mẹ, kidie ọyen ọvo yen mi vwori.
39 Nighere! ẹwẹn ọvo muo kọke kọke, o mi kperi phia siẹvuọvo, ọ nẹrhẹ o she eshe rẹ ewẹnwẹn, jẹ ugbunu rọyen gbe iphughẹ, ọke rọ da wan oma nu ọvo yen ọ ke vwẹ ẹgbẹgba yan jovwo.
40 Me rẹ idibo wẹn nẹ ayen djẹ no oma, ẹkẹvuọvo ayen se ruo-o.”
41 Jesu da kpahen nẹ: “E uvwiẹ ro jẹ esegbuyota evwo rọ je pha chachahen na, bro ọke yen mi che nene ovwan dia kri te ji chirakon rẹ ovwan? Mu ọmọshare wẹn na rhe obonẹ.”
42 Ẹkẹvuọvo rọ tobọ vwo bro ra na, ẹwẹn rẹ Idẹbono na de muo vwọ ghwiotọ je nẹrhẹ o she eshe rẹ ewẹnwẹn ọgangan. Ẹkẹvuọvo Jesu da ghwọku ẹwẹn ro jẹfuọn na, o de sivwin ọmọshare na, ọ da reyọ vwọ kẹ ọsẹ rọyen.
43 Ẹgba rode rẹ Ọghẹnẹ na de gbe ayen eje unu gangan.
Rẹ erọnvwọn eje ro ruẹ ji vwo gbe ayen eje unu na, ọ da ta kẹ idibo rọyen nẹ:
44 “Ovwan nabọ kerhọ je karophiyọ eta nana, kidie a cha shẹ Ọmọ rẹ ohwo, e mi phio phiyọ obọ rẹ ihworakpọ.”
45 Ẹkẹvuọvo ayen vwo ẹruọ rẹ obo rọ ta na-a. Vwọrẹ uyota, e siro nu kẹ ayen rere ayen vwo jẹ ẹruọ rọyen e vwo, jẹ oshọ rẹ ayen vwọ nọ enọ kpahen ota nana muẹ ayen.
46 Ọyena vwọ wan nu, aphro ọvo da vwomaphia vwẹ ohri rayen kpahen ohwo rọ ma rho vwẹ usun rayen.
47 Jesu vwọ riẹn oborẹ ayen roro vwẹ ubiudu rayen, ọ da reyọ omotete ọvo, o de vwo mudia kẹrẹ oma rọyen,
48 ọ da ta kẹ ayen nẹ: “Kohwo kohwo ro rhiabọreyọ omotete nana fikirẹ odẹ mẹ ji rhiabọreyọ ovwẹ; kohwo kohwo ro rhiabọreyọ ovwẹ, ji rhiabọreyọ Ohwo ro ji vwe rhe. Kidie ohwo rọ vwẹ oma rọyen kpotọ vwẹ ohri rẹ ovwan eje yen ohwo rọ rhoro.”
49 Jọn da kpahen nẹ: “Oyono, avwanre mrẹ ohwo ọvo rọ vwẹ odẹ wẹn vwọ djẹ ẹwẹn rẹ Idẹbono phia, avwanre da davwẹngba rẹ avwanre vwọ dobọ rọyen ji, kidie o nene avwanre-e.”
50 Ẹkẹvuọvo Jesu da ta kẹ nẹ: “Ovwan davwẹngba rẹ ovwan vwọ dobọ rọyen ji-i, kidie kohwo kohwo rọ vwọso ovwa-an, jẹ ọ vẹ ovwan obọ.”
51 Rẹ ọke ra cha vwọ reyọ kpo obenu vwo siẹkẹrẹ re,* o de brorhiẹn kokoroko nẹ ọyen che kpo Jerusalẹm.
52 Ọtiọyena o de ji ikọn kobaro kẹ oma rọyen. Ayen da yanran, ayen da ro evunrẹ ọko rẹ ihwo ri Sameria ọvo re muegbe phiyotọ hẹrhẹ.
53 Ẹkẹvuọvo ayen dedire-e, kidie o brorhiẹn ro vwo kpo Jerusalẹm.
54 Ọke rẹ idibo rọyen Jems kugbe Jọn vwọ mrẹ ọnana, ayen da tanẹ: “Ọrovwori, wọ guọnọre nẹ avwanre se erhanre nẹ obodjuvwu rhe rere ọ ghwọrọ ayen?”
55 Ẹkẹvuọvo o de kuomarhẹriẹ, ọ da ghwọku ayen.
56 Ọtiọyena ayen de kpo ọko ọfa.
57 Asaọkiephana rẹ ayen vwọ hẹ idjerhe yanran na, ohwo ọvo da ta kẹ nẹ: “Mi che nene uwe kpo kasan kasan ru wọ ra.”
58 Ẹkẹvuọvo Jesu da ta kẹ nẹ: “Irhirako vwo inu, emephran rẹ odjuvwu na vwo ẹho, ẹkẹvuọvo Ọmọ rẹ ohwo vwo asan vuọvo rọ cha vwẹ uyovwin kpahe-en.”
59 Ọ da ta kẹ ọfa nẹ: “Dia odibo mẹ.” Ọshare na da tanẹ: “Ọrovwori, kẹ vwẹ uphẹn rere me yanran re shi ọsẹ mẹ tavwen.”
60 Ẹkẹvuọvo ọ da ta kẹ nẹ: “Jẹ irivwin na shi irivwin rayen, ẹkẹvuọvo wẹwẹ, yanran re ghwoghwo Uvie rẹ Ọghẹnẹ nene asan eje.”
61 Ọfa da je tanẹ: “Mi che nene uwe, Ọrovwori, ẹkẹvuọvo kẹ vwẹ uphẹn rere me ra vuẹ ihwo rẹ evwruwevwin mẹ kẹsiẹfa tavwen.”
62 Jesu da ta kẹ nẹ: “O vwo ohwo vuọvo rọ yọnrọn eghwro nu, ro de ni erọnvwọn rehẹ obuko, ro fo vwọ kẹ Uvie rẹ Ọghẹnẹ na-a.”
Eta rehẹ obotọ na
^ Vwẹ Grik, “idọnọ ọfuanfo-on.”
^ Yẹrẹ “ewun ọfa-a.”
^ Kọyen, Hẹrọd Antipas. Ni Eta re Vwomaphia.
^ Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “arhọ.”
^ Vwẹ Grik, “vwọ gba re.”